2000 йилги Европа чемпионати финалида «олтин гол» муаллифига айланган, «Монако» ва «Ювентус» клублари сафида муносиб тўп сурган франциялик собиқ ҳужумчи Давид Трезеге яқинда Россиянинг «СЭ» нашри меҳмони бўлди. Маълумот ўрнида айтиш керак, у Евро-2020 элчиси ҳисобланади. Хуллас, россиялик ҳамкасбларимиз Трезегенинг бўлажак турнир ҳақидаги фикрлари билан қизиқишди. Собиқ ҳужумчи ўз навбатида фаолиятининг ёрқин лаҳзаларини эсга олди.
Энг муҳим гол
- Бельгия |Голландия-2000 - бу сиз учун илк Европа чемпионати. Хўш, ҳаммаси қандай бўлганди?
- Ажойиб! ЖЧ-98даги ғалабадан сўнг Франция терма жамоаси олдида аниқ мадсад бор эди - Европада ҳам тахтга чиқиш. Зеро, барчага бизникидан кучлироқ жамоа йўқлигини исботлашимиз зарур эди. Амалда буни уддалаганмиз. Менимча, ўшанда 2 йил олдингига нисбатан ҳам қизиқарлироқ ва ишончлироқ ўйнаганмиз.
- Финал куни айнан нималар ҳақида ўйлаганингиз эсингиздами?
- Франция термаси учун итальянларга қарши баҳслар ҳамиша ўзгача кечган. Қайсидир маънода - дерби ёки класико. Ўшанда кўпчилигимиз Италия миллий чемпионатида ўйнардик. Бу ҳам бошқача эҳтиросларни таъминлаган. Ўйин кутилганидек, ўта мураккаб тус олганди. Дейлик, сўнгги дақиқалардагина ҳисобни тенглаштирганмиз. Бунинг учун катта куч талаб этилгани ўз-ўзидан тушунарли. Кейин «олтин гол» муаллифига айландим. Буни сўз билан таърифлаш қийин...
- Ўша гол фаолиятингиздаги энг яхшисими?
- Менимча, энг муҳими. Шунингдек, энг чиройлиларидан бири, албатта.
Евро-2020 - катта янгилик
- Евро-2020нинг формати ҳақида нима дея оласиз?
- Бизни янгилик кутиб турибди - 12та мезбон мамлакат. Тушунарлики, уларнинг айримлари бундай юқори даражадаги футбол байрами билан таниш эмас. Энди эса бирданига турнирнинг бир бўлагига айланади. Ҳа, бўлажак чемпионатнинг қандай кечиши шахсан мен учун ҳам жуда қизиқ.
- Боку борасида хавотирлар йўқми? Ҳар ҳолда, ЕЛ финалидан олдин ҳам, кейин ҳам эътирозлар янгради.
- Ҳа, етарлича танқидлар бор. Лекин асосан ташкилий масалалар юзасидан. Ҳар ҳолда, стадион чиройли ва катта. Унутмаслик керак, Боку бундай воқеликка биринчи марта мезбонлик қилди. Бошланиши ҳеч қачон идеал бўлмайди. Тўғри, Озарбайжон Европанинг асосий қисмидан анча узоқда. Бироқ айни шундай тажриба мамлакат пойтахтига жуда қўл келади. Ўйлайманки, Боку ҳам Евро-2020нинг ажралмас қисми сифатида тарихга киради.
- Хўш, қайси жамоани бўлажак турнир фаворити ўрнида кўряпсиз?
- Франция термаси жаҳон чемпионатида бошқалардан устун эканлигини исботлади. Ҳамюртларим Евро-2016да бор имкониятни ишга сололмай, финалда португалларга ютқазиб қўйишганди. Шу боис ҳам, улар Россия мундиалида ғалаба қозонишга мажбур эдилар. Евро-2020га келсак, Испания, Германия ва Италия терма жамоаларидан ҳам кўп нарса кутяпман. Инқилобий ўзгаришлар шу жамоалар фойдасига ишласа керак.
- Французларнинг Туркиядаги омадсизликлари - бу нима?
- Ҳамиша юқори савияни ушлаб туриш шарт эканлигига далолат. Зеро,замонавий футболда рақиб энг кичик хатоларни ҳам кечирмайди. Ўзи Европада кучсиз терма жамоанинг ўзи қолмади. Қолаверса, ҳар бир рақиб жаҳон чемпиони билан ўйинга ўзгача шайланади. Шундай экан, Франция термаси асло бўшашмаслиги керак.
Головин чакки эмас
- «Монако» якунланган мавсум ўзига сира ўхшамади. Буни нима билан изоҳлаш мумкин?
- Монегасклар бирданига ҳам футбол, ҳам бошқарув тизимига боғлиқ муаммоларга дуч келишди. Раҳбарият аввалига бош мураббийни ҳайдади, вазият ўнгланмагач, уни яна ортга қайтарди. Асосийси, Жардим жамоани қуйи дивизионга тушиб кетишдан сақлаб қолди. Қўшимчасига, клуб вице-президенти ўзгарди. Булар табиийки, клуб ўйинига салбий таъсир ўтказди. Менимча, мавсум воқеалари «Монако» учун чинакам сабоқ бўлди.
- Сизнингча, Тьерри Анрининг иши нега юришмади?
- У футболчилар билан тил топишолмади ва бошқарувни ўз қўлига ололмади. Яна барқарорлик етишмади, муайян ўйин тизими кўзга ташланмади. Тўғриси, Анрига ачиндим, чунки у ўз ғояларига эга ёш мураббий. Афсуски, «Монако»да ўйлаганларини амалга тадбиқ этолмади.
- Александр Головин ўйини ҳақида нима дея оласиз?
- Аввало, айтишим керак, Головин ажойиб футболчи ва амбицияси кучли клуб сафига қўшилди. Ҳа, унга ҳам осон бўлмади - жароҳатлар, «Монако» натижалари туфайли мухлислар норозиликлари... Лекин ўйлашимча, Головинда Франция футболига мослашиб, ўзини кўрсатиш учун барчаси мужассам. «Монако» кейинги мавсум евротурнирларда иштирок этмайди ва бу ҳам россиялик футболчи учун қўшимча имконият. Демоқчиманки, у бор эътиборини клубдошларини яқинроқ билиб олиш ва ҳамкорликни яхшилашга қаратиши мумкин.
- Ҳозирда «Ювентус» элчисисиз. Айтингчи, Клаудио Маркизионинг «Зенит»га ўтганидан ажабланмадингизми?
- Россия футболи охирги йилларда анча ўзгарди. Хусусан, етакчи клублар энди ўз олдига бошқача мақсад қўймоқда. Ўйлайманки, айнан шу жиҳатлар Клаудионинг қарорига таъсир қилган. «Зенит» - Европанинг кўзга кўринган клубларидан бири. Мана, бу йил чемпион бўлди ва келаси мавсум ЧЛда ўйнайди. Шундай экан, Маркизиони тўғри тушуниш керак.
- Лекин «Зенит» мухлислари ундан унча хурсанд эмаслар. Чунончи, Маркизио ҳозирча асосан музейларга боряпти ва қаҳва рекламаси билан банд...
- Бу борада гапиришим қийин, чунки вазиятдан бехабарман. Клаудио билан «Юве»да бирга ўйнаганман ва уни ҳақиқий профессионал сифатида биламан. Лекин фанатларда салбий фикр туғилган экан, у аввало, қандай футболчи эканлигини майдонда исботлаши керак.
Лўнда савол-жавоблар
- Қачон қаттиқроқ ухлагансиз: жаҳон чемпионати финали олдиданми ёки Европа биринчилиги ҳал қилувчи ўйини арафасида?
- Евро-2000 финалидан олдин хотиржамроқ ухлагандим.
- Футбол бобидаги асосий иримингиз нима?
- Майдонга ҳамиша биринчи бўлиб ўнг оёғимни ташлардим.
- Фаолиятингиз давомида Россия клубларидан бирор марта таклиф олганмисиз?
- Йўқ. Ҳеч қачон.
- Жаҳоннинг айни пайтдаги энг яхши футболчиси...?
- Охирги 10-15 йилни олсак, Роналду ва Мессидан бирини танлаш қийин. Ҳозир ҳам улардан кучлиси йўқ. Мбаппе, Салоҳ, Неймар каби футболчилар ҳамон бироз ортдалар.
- Болалигингиздаги лақабингиз...?
- «Француз». Ахир Францияда туғилганман. Кейин оиламиз Аргентинага кўчиб борган. У ерда менга дарҳол «француз» лақабини беришганди.
А.ҲАМИДОВ тайёрлади.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20