Самвел Бабаяннинг «Локомотив» бош мураббийи лавозимига тайинлангани футболимизда кенг муҳокама қилинди. Бу мавзу маълум вақт барчанинг диққат марказида турди. Миллий жамоамизни бошқарган пайт мухлисларнимнг кучли эътирозларига учраган Самвел Вячеславовичнинг яна мураббийликка қайтгани кўпчиликка ёқмагани аниқ. Футбол аҳли уни танқидий руҳда қабул қилгани ҳам рост. Аммо танганинг иккинчи томони ҳам бор - «Локомотив» жорий мавсум орқага кетаётганди. Дейлик, «темирйўлчилар» ОЧЛда ҳеч қандай каромат кўрсатолмадилар, Суперлигада эса «Пахтакор»дан анча орқада қолиб кетишди. Бундай вазиятда клубда ниманидир ўзгартириш талаб этилади. Бабаян эса «Пахтакор»­даги узоқ йиллик фаолияти давомида бир қатор ёшларни катта футболга йўналтирган, асосийси, иштиёқи баланд мутахассислардан биридир. Бабаяннинг бош мураббий ваколатини қўлга олгани четда турган мухлисларга ёқмагандир, аммо клуб ичида бу ўзгаришга муносабат қандай? Шу саволга жавоб топиш учун «Пахтакор»­да айнан Самвел Вячеславович қўл остида кўзга ташланган ва миллий жамоаларимизнинг келажаги сифатида умид уйғотган Жамшид Искандеровни суҳбатга тортдик. Бинобарин, мавсум бошида «Локомотив» сафига қўшилган ярим ҳимоячи ҳозирда секин-аста аввалги ҳолатини тикламоқда.

- Бошида аччиқ савол: ҳамма футболимиз келажаги сифатида эътироф этган Жамшид Искандеров негадир маълум муддат сояга ўтди. Ўйинингиздаги кескин пасайишнинг асл сабаби нима?

- Жароҳатлар. Айнан жароҳатлар ортидан орада етарли ўйин амалиётига эга бўлмадим ва бу ҳолат спорт формамни йўқотишимга олиб келди. Оддий айтганда, ўйинлардан четда қолиш салбий таъсир қилди. Хусусан, аввалги мавсум асосан захира ўриндиғида қолишимга тўғри келди. Тезроқ тикланишим учун эса кўпроқ ўйин амалиёти зарур эди. Шуларни ҳисобга олиб, «Пахтакор»дан кетишга қарор қилдим. Лекин ўз ўрнида айтишим керак, мени элга танитган клубни ҳеч қачон унутмайман. Хуллас, «Пахтакор»га қандайдир хусуматим йўқ. 

- Нега айнан «Локомотив»? Бу клубда аввалги даражангизни тиклай олишингизга нечоғли ишоняпсиз?

- Агар шубҳа қилганимда, бу жамоа таклифини рад этардим. Биласиз, «Локомотив! ҳамиша ўз олдига энг юксак мақсадларни қўйиб келган, бундан кейин ҳам шундай бўлади. «Локо» сафида тўп суриб, янги қирраларимни кашф этиш баробарида жамоа ғалабаларига муносиб ҳисса қўшиш ниятидаман. Мана, чемпионатимизда биринчи давра ортда қолди, менимча, яхшигина амалиётга эга бўлдим. Ҳар ҳолда, голлар урдим, Осиё Чемпионлар Лигасида иштирок этдим. қисқаси, олдинга силжиш бор.

- Футболчининг йўли қизиқ: бир неча йил олдин «Пахтакор»нинг ажралмас қисмига айланган эдингиз, жамоадаги ўйинларингиз ортидан миллий терма сафига кирдингиз, халқ назарига тушдингиз. Кейин ҳаммаси бирдан ўзгариб кетди...

- Аввало, бу тақдир. Таъкидлаганингиздек, футболчининг ҳаёти шундай кескин бурилишлардан иборат экан. Начора, бунга кўникишдан бошқа илож йўқ. Ўтган ишни ўйлаб, сиқилишдан эса наф чиқмайди. Энг маъқули барчасини яхшиликка йўйиш керак. Ахир ҳаёт давом этади, мухлислар кутган кунлар ҳам келар насиб этса...

- Лекин яна бир ҳолат борки, ундан кўз юмиш нотўғри - кетма-кет жароҳатлар замирида қандайдир омиллар бўлади, барибир. Эҳтимол, сизни узлуксиз йиғинлар, меъёридан ортиқча ўйинлар қийнаб қўйгандир... Бошқача айтганда, дам олишсиз ўйнаш, чарчоқ, босим... Бу борада нима дея оласиз?

- Эҳтимол, организмим юкламаларни кўтаролмагандир. Аммо ҳозир кимнидир айблашим ноўрин. Ахир ўзим ҳамиша ўйнаш иштиёқида ёниб турганман. Хуллас, агар меъёр бузилган бўлса ҳам, аввало, ўзим айбдорман. Яна унутмаслик керак, футбол тўқнашувларга бой спорт тури. Ўйин жараёнида ўзингизни аяб ҳаракатланишингизнинг иложи йўқ. Умуман, жароҳатлар - футболнинг ажралмас қисми. қолаверса, ҳеч бир спортчи - хоҳ боксчи ёки кураш, хоҳ футболчи ёки баскетболчи бўлсин, жароҳатдан тўлиқ ҳимояланмаган. Менимча, бундан бошқа изоҳга ҳожат йўқ.

- Яна бир оғриқли масала - охирги пайтлар мухлисларнинг стадионларга ташрифи пасайиб кетди. Шахсан сиз бунинг биринчи сабаби сифатида қайси жиҳатни кўрсатасиз?

- Бугунги кунни назарда тутиб айтсак, об-ҳавонинг кескин ошиши мухлислар камайишига олиб келди. Энг катта сабаб шу, менимча. Лекин тан олиш керак, томошабоп, муросасиз, шиддатли баҳсларнинг камайгани ҳам хоҳлаймизми-йўқ, мухлисларга таъсир қилади. Умумий ҳолатни яхшилаш учун эса ҳар бир жамоа имкон борича ҳужумкор футбол кўрсатиши керак.

- Энди бевосита янги бош мураббий Самвел Бабаян ҳақида. Жамоа бошқаруви унга топширилгани футболчиларга қандай таъсир қилди?

- Шундоқ сезилиб турибди, йигитлар Самвел Вячеславовични яхши қабул қилишди. Футболда мураббийларнинг алмашиб туриши ҳар бир жамоа ҳаётида рўй берадиган ҳолат. Буни тўғри тушуниш керак. Асосийси, жамоадошларим ўзгаришга профессионалларга хос тарзда ёндашиб, янги мураббийга ижобий хислатлари намойиш қилиш учун машғулотларда астойдил тер тўкишмоқда.

- Амалдаги чемпион жамоа Лига кубогидан чиқиб кетишга улгурди. Нима, «темирйўлчилар» бу турнирни ортиқча билишдими? Умуман, жамоангизнинг гуруҳ боқичида қайд этган натижасини қандай изоҳлайсиз?

- Турнир бирор жамоага ортиқча эмас - бу аниқ. Ахир Лига кубоги ёшларга қўшимча имконият-ку. Шунингдек, мураббийлар ҳам захирада қолаётган шогирдларини синаб кўришлари мумкин. Хуллас, бу мусобақа айниқса, катта футбол остонасида турган иқтидорлар учун айни муддао. Нега гуруҳ босқичидан чиқолмадик? Ҳозир нима дейишимдан қатъий назар, баҳонадек туюлади. Шундай экан, оддийгина изоҳлайман - ҳаракатларимиз ўхшамади, ўйин қовушмади...

- «Локомотив» бу йил чемпионлик мақомини ҳимоя қилиши керак. Биринчи даврадан кейинги турнир жадвалига қарасак, жамоангиз ва пешқадам - «Пахтакор» очколари ўртасидаги фарқ 8тани ташкил қилмоқда. Хўш, «Локо» чемпионатнинг иккинчи қисмида «олтин» учун курашни қизита оладими?

- Адашмасам, 2012 йили «Бунёдкор» иккинчи даврада «Пахтакор»дан нақ 7 очко илгарилаб кетганди, шунга қарамай, якунда собиқ жамоам билан чемпионликни тантана қилган эдик. Демак, олдиндан қўл кўтармаслик керак - озгина имконият бор экан, ундан фойдаланишга ҳаракат қиламиз.

 Абдулазиз ИСКАНДАРОВ суҳбатлашди.