36 ёшли Франк Рибери мавсум охирида «Бавария»дан кетишини маълум қилди. У «Альянц Арена»даги хайрлашув учрашувида гол уришга ҳам муваффақ бўлганди. Кўпчилик Риберининг фаолиятини якунлашини кутганди. Аммо франциялик футболчи ҳозирча тугатмоқчи эмас. Яқинда L’Equipe наш­рига интервью берган футболчи жиддий таклифларни кутаётганини маълум қилди.

- 2007 йилнинг июнида «Бавария» билан шартнома имзолаганингизда жамоада 12 йил қолиб кетишингизни кутганмидингиз?

- Албатта, кутмагандим. Ўшанда «Бавария» бундеслигада тўртинчи ўринни олиб, ЕЧЛда ўйнамасди. Ўтган ўн икки йил ичида эса биз турли мусобақаларда 23та сов-ринни қўлга киритдик. Яъни бир мавсумда деярли иккитадан. Ҳаммасини юқори нотада якунламоқчи бўлгандим ва бунинг уддасидан чиқдим. Бу ерга келганимда фақатгина битта соврини - Туркия кубоги (2005 йил) бор эди. Ҳақиқатдан ҳам «Бавария» билан кўп нарсага эришдим. Албатта, финал ҳам ажойиб бўлди...

- Ҳақиқатдан ҳам ажойиб якунланди. Тўққизинчи бор Германия чемпиони бўлдингиз, охирги ўйинингизда чиройли гол урдингиз...

- Ҳа, кеча ажойиб бўлди. «Айнтрахт» (5:1) устидан қозонилган ғалаба, «Альянц Арена»даги сўнгги гол, 75 минг мухлиснинг реакцияси, ишқибозлар ва яқинларим билан байрам. Ҳаммасини тайёрлаб қўйгандим. Барча сиғиши учун автобус ижарага олгандим.

- Ўзингиз туғилиб ўсган Булонь- сюр-Мердан ҳам кимлардир келдими?

- Барча танишларимни таклиф қилдим. Кимдир Франциядан, яна кимдир бошқа мамлакатлардан келди. Рафиқам Вахиба ҳаммаси юқори савияда ташкиллаштирди. Бутун стадион фақат менга қараётгандек туюлди. Трибуналар машғулотлар пайтидаёқ номимни айтиб қичқира бошлашди. Худди боксчилар жангидаги каби: «Ри-бе-ри !!! Ри-бери !!!». Гол урганимдан кейин эса янада кутилмаган холат бўлди.

- Гол чиройли чиқди.

- Ҳа, кетишимни худди шундай нишонладим.

- Ўйиндан сўнг нима бўлди?

- Ҳамма уйимга ташриф буюрди. Байрамни ўша ерда давом эттирдик. «Бавария» базасидаги икки ошпазни ҳам таклиф қилгандим. Барча меҳмонлар ўша кечани бир умр эсдан чиқармасликларини истадим.

- Келажак режаларингиз қандай?

- Фаолиятимни давом эттирмоқчиман. Ҳали кўрсатадиган жиҳатларим бор деб ўйлайман. Оёқларим югуриб турса, истагим ўлмаса ўйнашда давом этавераман. Умид қиламанки, бирор бир топ-клубдан таклиф оламан. Лекин ҳаммасини яхшилаб ўйлаб кўриш керак. Тажрибам бор ва айнан шу туфайли яхши бўла оламан. 36 ёшимда шундай гол урдим. Бу шунчаки омад эмас. Ҳамон тонусдаман. Чунки ўз ишимга ҳамиша профессионалларча ёндашганман. Айнан шу туфайли фаолиятим узоқ давом этмоқда.

 - Замонавий футболда бир жамоага 12 йил содиқ ҳизмат қилиш ҳақиқий жасорат. Шу фикрга қўшиласизми?

- «Бавария» билан тарихим анча олдин бошланган. ЖЧ-2006дан сўнг. Ўшанда Германияни ёқтириб қолганман. Ули Хёнесс ўшандаёқ «Бавария»га ўтишимни истаган. У Роберт Луи-Дрейфус («Марсел»нинг ўшандаги хўжайини) билан дўст эди. Лекин Роберт мени қўйиб юбормаган. Орадан бир йил ўтиб «Бавария» яна таклиф билан чиқди. Натижада бундеслиганинг ўша пайтдаги энг йирик трансфери (26 милион евро) амалга ошди. «Бавария»даги биринчи мавсумимдаёқ требл қайд этдик.

- «Бавария»да босим остида қолган вақтларингиз ҳам бўлганми?

- Йўқ. Мен футболни ўзимга ва мухлисларга қувонч улашиш учун ўйнайман. Футбол менинг ишим. Ҳақиқий профессионалман. Футболни яхши кўрганим учун ҳам ҳаммаси жойида бўлди. «Булон»да ўйнаб юрганимда, кеч­қурунлари дўстларим билан кўчада ўйнашни ҳам канда қилмаганман.

- Қайси жиҳатларингизни энг кучли дею ҳисоблайсиз?

- Меҳнатсеварлик, тезлик ва техника. Яна руҳий холат ҳам. Чунки оғриқни ҳис қилишни ҳам билиш керак. Неча марта жароҳат олган бўлсам, бирор марта ҳам тақдирга тан бермаганман. Умуман олганда, фаолиятимнинг аввалида ҳаммаси кўнгилдагидек бўлмаган. Ҳаётий муаммолар ҳам бўлган. Учинчи лига вакили «Олимпик Алес»­ни тарк этганимда (2003) қарзга ботган эдим. Отам у ердан олиб кетган. 20 ёшимда у билан турли қурилишларда ишлаганман. Пулимиз ҳамиша етмасди. Ойлик маош 1000 евро холос эди. Ишчи кварталда катта бўлганман. Битта «кола» ёки чипсни олти киши бўлиб ейиши қандайлигини биламан. Лекин барчамиз ака-укалардек эдик. Буни ҳеч қачон унутмайман. Баъзи футболчилар борки, юқори чўққига осонлик билан чиқишади. Лекин биринчи муаммодаёқ синиб қолишади. Мени ҳеч нима синдира олмайди.

- 2013 йили «Олтин тўп»ни олишингиз мумкин эди...

- Бу фаолиятимдаги энг катта адолатсизлик. Нафақат мен, балки бош­қа инсонлар ҳам шундай ҳисоблашади. Барча кўрсаткичлар борасида биринчи ўринда эдим. Якунда эса учинчи ўринни олганман. Криштиану Роналду ёки Лионел Мессига нисбатан адоватим йўқ. Лекин ҳақиқат бу ҳақиқат. Ўша йили овоз бериш жараёнида ғалати воқеалар бўлган. Агар ҳозирги формат (фақат журналистлар орасида) бўлганида «Олтин тўп» меники бўларди.

- Турмуш ўртоғингиз Вахиба сиз учун катта аҳамиятга эгами?

- У билан 16 ёшимдан биргамиз. Вахиба ҳайтимдаги энг мухим инсон. Ҳамиша бмен билан бирга бўлган ва мени қўллаб турган. Агар шу аёл бўлмаганида ҳозирги даражамга чиқа олмасдим.

- 2009-10 йилларда Европанинг исталган клубига ўтишингиз мумкин эди. «Бавария»да қолганингизга афсусланмайсизми?

- Агар сизга «Реал», «Барса», «Манчестер Сити» ёки «Челси»дек клублар қизиқиб турса, ўз-ўзидан ҳаёлингиз бўлинади. Катта пул ишлаб олишим мумкин эди. Лекин агентим Алан Мильяччо «Бавария» мени ҳеч қаерга қўйиб юбормаслигини яхшилаб уқтирган. Бунинг устига Мюнхенда ишларим жойида эди.

- 2010 йилдан сўнг терма жамоа мураббийлари билан муносабатларингиз ёмонлашган...

- Ўзим айбдорман. Чунки аҳмоқликлар қилганман. Лекин адолатсизликлар ҳам бўлган.

- Футболчилик фаолиятингизни якунлаганингиздан сўнг «Бавария»-га қайтасизми?

- Ҳа. Ҳозирча фаолиятим давом этмоқда. Якунлаганимдан кейин эса қайтиш ҳақида ўйлайман.

- Режаларингиз?

- Ҳозирча билмайман. Яна бир-икки йил ўйнамоқчиман. Гап пулда эмас. Тўғри битта муаммо бор. Энди фақат ўзим ҳақимда эмас, балки хотиним ва беш нафар фарзандим ҳақида ҳам ўйлашим керак.