Яқинда Оливер Бирхофф иш бўйича Италияга қайтди - Европа чемпионати-U-21 финалини кузатди. Ўйин Удинеда, германиялик собиқ футболчининг «А» серияда энг яхши тўпурар (1997|1998 йиллар мавсумида «Удинезе» таркибида 27та гол урган) мақомини қўлга киритишига гувоҳ бўлган стадионда ўтказилди. 20 йил аввал эса у «Милан» билан скудеттони қўлга киритган, чемпионатдаги барча 34та ўйинда майдонга тушиб, 19та тўп киритган. Хорижлик ҳамкасбларимиз Бирхоффни суҳбатга чорлаб, унга ўзларини қизиқтирган саволлар билан мурожаат этишди.
- Чемпионатдаги ғалабани эсладингизми? Бу кутилмаганда содир бўлганди, «Милан» мавсум охирида «Лацио»ни қувиб ўтганди. Ўша жамоа ҳақида гапиринг.
- Заккеронининг «Милан»и, у билан «Удинезе»дан бирга келгандик. Ўшанда мураббий фалсафаси фақат менга ёрдам беришини айтишганди, лекин ўша чемпионатда Веа 8та, Леонардо 12та гол урган. «Удинезе»да бўлгани каби барча футболчилар рақиб дарвозасини ишғол қилишарди. Заккерони қўл остида ҳамма яхши ўйнарди.
- Мальдини ва Бобан ўша жамоанинг етакчилари бўлишган. Энди биргаликда «Милан»ни бошқаришмоқда. Улар самарали ишлай олармиканлар?
- Ҳа, ажойиб дуэт, чунки иккисининг қараши турлича. Звоне ҳар доим журъатли бўлган, муҳокама пайти агрессивлик намойиш этарди. Фикрини дадил билдирарди. Паоло анча пухта, оғир-босиқ, кам гапириб, кўп ҳаракат қиларди. Кўпчилик ибрат олса арзигулик хислатлар.
- Улар «Милан»га қандай ёрдам беришлари мумкин?
- Ҳар бир клубга футболни яхши тушунадиганлар керак. Ўша жамоанинг тимсоли бўлса янада яхши. Улар босимга кўникиб қолишган, бутун фаолиятлари давомида босимни енгишга ўрганишган, муҳим қарорлар чиқаришни яхши билишади. Паоло ва Звоне - икки хил олам, аммо биргаликда - катта куч. Боз устига, уларнинг борлиги футболчиларни руҳлантиради. Бу каби афсоналар сени «Милан»га чақиришса, гапларига қулоқ тутишинг аниқ.
- Энг муҳим қарорлардан бири - Европа Лигасидаги иштирокдан воз кечишдир. Бу ҳақда нима дейсиз?
- Европа Лигаси кўп куч талаб этади. Финалгача етиб боролмасанг, фойда кўп бўлмайди. Ҳозир «Милан» хотиржам тарзда қайта шаклланиш жараёнидан ўтиши, Чемпионлар Лигасига чиқиш тараддудини кўриши мумкин. Менимча, ЕЛдан воз кечиш ўзига хос устунликни тақдим этади. Бу ҳақда Юрген Клопп билан гаплашгандим. Унда шунга ўхшаш фикр бор - ё Чемпионлар Лигаси ёки ҳеч нарса. «Милан»нинг ҳолатида, дарҳақиқат, фақат ЕЧЛ муҳим.
- «Милан»нинг сўнгги йиллардаги муаммолари, раҳбарият ўзгариши ва унинг оқибатлари ҳақида қандай фикрдасиз?
- Ҳатто катта клубларда ҳам қийин давр бўлиб туради. Агар шу давр чўзилиб кетса, буни аниқ лойиҳанинг йўқлиги билан изоҳлаш мумкин. Вақт ва барқарорлик керак. Футбол йил сайин бизнесга айланиб бормоқда, буни барча тушуниб турибди. Аммо мени кўпроқ ҳайрон қолдиргани, шундай буюк тарихга эга клуб яхши инвестор топа олмаяпти.
- Янги «Милан» янги стадионда ўйнашни хоҳлаяпти. Сизга қолса «Сан Сиро»нинг бузилишига рози бўлармидингиз?
- Жуда қийин қарор. Берлинда ҳам худди шундай муаммога йўлиққанмиз. Стадионнинг аҳамияти нуқтаи назаридан бундай қилиш нотўғри бўлади...
- Бироқ...
- Аммо замон ўзгармоқда, янги технологиялар бор, уларни ишлатиш керак. Эҳтимол, реконструкция қилинганда яхшироқ бўларди, лекин инқироздан кейин келажакка қараб иш тутиш лозим. АҚШда ҳозир Америка футболи ўйналадиган стадионларни фаол тарзда қайта таъмирлашмоқда. Томошабинлар трибуналарда интернет, замонавий инфратузилмага эҳтиёж сезишади. Буни «Сан Сиро» майдонида тўп суриб, ўзгача ҳиссиётларни бошдан кечирган футболчи сифатида айтяпман.
- 20 йил аввал чемпионатнинг барча учрашувларида майдонга тушган ягона футболчи бўлгандингиз. Бунга сабаб нима: омадми, немисларга хос бардошми ёки бошқа бирор нарса?
- Ҳеч қачон сабр-тоқат ва жисмоний ҳолатимдан нолимаганман, ҳозир 50 ёшимда ҳам шундай. Профессионал спортчининг ҳаёт тарзи мустаҳкам соғлиқ ва атлетик тайёргарликдан иборат. Ва албатта, ўша кўрсаткич «Милан»даги дастлабки мавсумимда ҳис қилган эйфория самарасидир.
- Сильвио Берлускони сизга скудетто учун мукофот берганми ё шунчаки маошингизни оширганми?
- Мукофот бўлмаган, аммо унинг қувонгани, барчамизни мақтагани ёдимда. Мен Берлусконининг ёқимтойларидан бири бўлмаганман, лекин ўшанда урган 19та голим ва «Милан»да ўйнаганим билан фахрланаман.
У.УМАРОВ тайёрлади.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20