«Атлетико» раҳбарияти «Барселона»га йўл олган Антуан Гризманн трансфери масаласида Испания Қироллик футбол федерацияси ва Ла-лигага расман мурожаат қилди. Каталонияликлар футболчи учун шартномада кўрсатилган 120 миллион евро миқдоридаги товон пулини тўладилар ва Антуан 12 июль куни «Барса» футболчисига айланди. «Матрасчилар» эса яна 80 миллион евро ундиришни кўзлашмоқда. Уларнинг фикрларига кўра, «Барселона» Гризманн билан март ойидаёқ келишиб олган. Ўша пайт франциялик голеадорнинг товон пули 200 миллион еврога тенг эди. 1 июлдан эса товон миқдори 120 «лимон»га тушди. «Атлетико» презиенти Энрике Сересонинг таъкидлашича, «Барселона» томонидан йўл қўйилган қоидабузарлик борасида унда исботлар бор. Жамоа шулардан фойдаланиб, қўшимча 80 миллион евро олмоқчи. Бундан ташқари, «Атлетико» иш юзасидан ФИФАга ҳам мурожаат қилмоқчи эди. Аммо ташкилот клублар ўртасидаги муаммони ҳал қилиш ваколатига эга эмаслигини билдирди. Испания Қироллик футбол федерацияси эса Гризманн трансфери бўйича аллақачон текширув бошлади.