Кўпчилик ўз сафида кўришни хоҳлаган футболчи «Ювентус»ни танлади. «Кекса синьора» унинг учун 70 миллион евродан кўпроқ пул тўлади. Бугунги ҳикоя «Аякс» афсонасининг шогирди, Криштиану Роналдунинг фанати бўлган Маттайс де Лигт ҳақида.
Ярим ҳимояни ўрганиш ва парҳезли ҳаёт
Маттайс де Лигт - ҳақиқий «аяксоид». Бу жамоага Голландия футболининг бўлажак юлдузи Амстердамга кўчиб келганига меҳр қўйганди. Кичкинтой Маттайс укаси билан телевизор қаршисида ўтирганча «Аякс»га мухлислик қиларди, 9 ёшга тўлганида эса уни машҳур клуб скаутлари пайқаб қолишди. Академияда де Лигтни дастлаб ярим ҳимояда синаб кўришди. Бунга унинг ўрта чизиқда иқтидорли экани сабаб бўлмаганди, шунчаки, мураббийлар ностандарт услубда унда айрим ўйин сифатларини ривожлантиришни кўзда тутишганди. Позиция танлаш, тўп билан ўйнаш тезлиги ҳамда қарорлар чиқариш. Шундан кейингина у мудофаага қайтди, майдон марказида орттирилган ўйинни ўқий олиш хусусияти энди жуда асқотди. Бунинг эвазига де Лигт позиция танлашни қойиллатади, гарчи тезлиги спринтерларникидек бўлмасада, энг жиддий рақибларини тўхтатишни уддалайди.
«Де Лигтда қандай вариантлар бор эди? «Барселона», «ПСЖ» ва «Юве». Кўриниб турибдики, агар спортни танласангиз, «Барса»га ўтиш лозим. Аммо у бошқа нарсани хоҳлади ва бу танлов қисман иқтисодий аҳамиятга эга».
Кристоф Дюгарри,
«Бордо», «Милан», «Марсель», «Барселона» клубларининг собиқ ҳужумчиси
Маттайснинг яна бир муаммоси ортиқча вазн бўлиши мумкин эди, академияга кираётганда ушбу масалада мураккаб вазият вужудга келганди. Ўспиринни диетолог қабулига жўнатишди ва шундан буён у парҳезга жиддий амал қилиб келмоқда. Айтишларича, Англияда бундай саъй-ҳаракатлар муносиб баҳоланмаган. Гўёки, вазн билан боғлиқ гипотетик муаммолар сабаб «Манчестер Юнайтед» ҳали музокараларга киришмай туриб, де Лигтга даъвогарлик қилганлар рўйхатидан биринчи бўлиб тушиб қолган.
Афсонанинг шогирди
Де Лигтнинг устозларидан бири - «Аякс» афсонаси Барри Хюльсхофф. У тотал футбол отаси Ринус Михелс қўл остида Йохан Кройф билан биргаликда ҳимояда ўйнаган, уч марта Чемпионлар кубогини, олти марта Голландия чемпионлигини қўлга киритган. Иттифоқо, 68 ёшли Хюльсхоффни амстердамликларнинг ёшлар жамоаси ўйинини кузатишга чақиришганда, унинг нигоҳи де Лигтни пайқаганди.
Кейинчалик Барри ўз шогирдини тўлиқ ишланмаган олмосга қиёслаган, ундан ажойиб ҳимоячи чиқишини таъкидлаб, 14 ёшли Маттайснинг отасига унинг агенти бўлишни таклиф қилганди. Афсонавий фахрий ўспиринга бутун қалбини бағишлади. У де Лигт билан нафақат унинг барча ўйинларини муҳокама қилиб, ривожланиш режасини тузарди, балки унга клуб тарихидан сўзлаб, ҳаётий тавсиялар берарди. «Ювентус»нинг янги футболчиси Хюльсхоффни футболдаги отаси ва устози деб аташи бежиз эмас. Маттайснинг иши билан айни пайт жаҳоннинг энг номдор агентларидан бири Мино Райола шуғулланаётган бўлсада, Хюльсхофф ва де Лигт алоқаларни узишмаган.
«Барселона»? Шунча уйдирма ёзилдики... Бунақаси ҳатто Уолт Диснейнинг ҳам хаёлига келмасди. Гап унга қайси жамоаларнинг қизиқишида эмас, балки «Ювентус» Маттайс учун нисбатан мосроқ эканлигида. Ҳимоячи учун Италияда тажриба тўплаш муҳим. Энг буюк бўлишни хоҳласанг, ушбу босқичдан ўтишинг шарт».
Мино Райола,
Де Лигтнинг агенти
Футбол гўзали
Де лигт - анча жиддий йигит. Кўп вақтини уйда ўтказади, ҳозир ҳам ота-онаси билан яшайди, дискотека ва тунги клубларга илк бор19 ёшида борганди. Унинг суюкли қаллиғи ҳам бор. Аннеки Моленар - машҳур модель. Футболчилар учун бу одатий ҳол, бироқ де Лигтнинг ҳолатида муҳим деталлар бор. Гап шундаки, голландиялик гўзалнинг отаси Кейе ўтган асрнинг 1980 йиллари бошларида «Аякс» сафида тўп сурган, жамоа билан иккита чемпионлик унвони ва Голландия кубогини қўлга киритган.
Тилла бола
Де Лигт ёш бўлишига қарамай, кўплаб персонал рекордларни қайд этган. «Аякс»нинг асосий таркибидаги бир нечта ўйинлар ўтказган футболчини Данни Блинд миллий термага таклиф қилганди. Ўсмир йигитнинг бош жамоадаги дебюти муваффақиятли чиқмагани, иккита ўтказиб юборилган голларнинг бош сабабчиси бўлгани бошқа масала, асосийси - унда стрессларга қарши тура билиш қобилияти бор, хатолардан сўнг ўзини йўқотиб қўймайди. Акс ҳолда, нафақат «Аякс», балки Чемпионлар Лигаси «плей-офф» босқичи тарихидаги энг навқирон сардор бўлмасди.
Кимдир Маттайснинг ёш бўлишига қарамай жисмонан бақувват ва ўйинда анча заковатли эканини эътироф этади. Айримлар эса ундаги етакчилик сифатлари ҳамда клубдошларига эътиборли эканини алоҳида ажратиб кўрсатади.
Бундай хислатларнинг бари унга «Голден бой»ни қўлга киритган биринчи ҳимоячи мақомини туҳфа этди. Ушбу соврин Европанинг 21 ёшгача бўлган энг яхши футболчисига топширилади. Авваллари уни ижодкорлар қўлга киритишганди, энди эса де Лигтнинг номи лауреатлар рўйхатида Месси, Руни, Иско ва Погба сингари юксак маҳорат соҳиблари қаторида зикр этилади.
«Ювентус», Роналду, тақдир
«Аякс» учун муваффақиятли тарзда ўтган мавсум давомида амстердамликлар бош мураббийи Эрик тен Хаг шундай деганди: «Де Лигтнинг жамоамизда қолиш эҳтимоли нолга тенг». Трансфер ойнаси очилишига оз фурсат қолгани сари голландиялик вундеркинднинг «совчи»лари сони ортиб бораверди. Табиийки, Маттайсдан қайси клубга мойиллиги борлигини сўраб, «Барселона» ва «ПСЖ»дек грандлар унга даъвогарлик қилаётганини қистириб ўтишди. Аммо футболчи шундай жавоб бердики, натижада саволлар яна кўпаяверди.
«Де Лигт - ёшлар орасида биринчи рақамли. Унда Павел Недведнинг психологияси ва Златан Ибрагимовичнинг характери мужассам».
Мино Райола,
Де Лигтнинг агенти
Шунга қарамай, ўша паллада футболчининг қайси клубга мойиллиги борлиги аста-секин сезила бошлади. Мисол учун, интервьюларининг бирида де Лигт Кьеллини билан бир жамоада ўйнамоқчи эканлигини таъкидлаганди. Гарчи ўша суҳбат пайти бошқа номлар ҳам тилга олинган, улар орасида термадаги шериги ван Дейкни ҳам айтган бўлсада, танлов «Ювентус»да тўхташи аниқроққа ўхшаганди.
Воқеанинг узвий давоми Миллатлар лигаси финалидан кейинги даврга тўғри келди. Ҳал қилувчи баҳсда Португалия термаси Голландияни мағлубиятга учратгач (1:0), навбатдаги совринини қўлга киритган Криштиану Роналду майдоннинг ўзида голландиялик вундеркиндни Туринга ўтишга чақирганди. «Ўша пайт ҳайрон қолгандим, шу боис кулиб юбордим, - деганди де Лигт. - Энди таътилга чиқаман ва барчасини обдон ўйлаб кўраман».
Афтидан, ўша воқеа Маттайс учун ҳал қилувчи аҳамият касб этган кўринади, ваҳоланки, уни «Барселона»га ҳам таклиф этишган, бу пайтга келиб каталонияликлар Френки де Йонг билан шартнома имзолаб улгуришганди. Маттайс ёшликдаги дўсти билан бир жамоада ўйнашни орзу қилганди, лекин де Лигт якунда бошқа йўлни танлади. Бу йўлни у илк либосининг орқасида номи ёзилган футболчи - Роналду ҳамроҳлигида босиб ўтади.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20