Ўзбекистон Кубоги 1/8 финали доирасида "Сурхон" майдонида (3:1 ҳисобида) учралган мағлубиятдан кейин "темирйўлчилар" бош мураббийи Самвел Бабаян ўз фикрларини билдириб ўтди.

- Биринчи навбатда рақибларни навбатдаги босқичга чиққани билан табриклайман. Ўйинга тўхталадиган бўлсам, бугун ташаббус бизнинг томонда бўлди. Аммо ҳимояда йўлга қўйилган қўпол хатолардан кейин ўйинда иккинчи рақамли бўлиб кўринган жамоа ғалабани қўлга киритди. Ҳимояда хатоларимиз катта эканлиги кўриниб турибди. Бу борада ишлашимиз керак. Ҳимоя ва ҳужумнинг боғланиши эса муаммо бўлаяпти.

Бугун таркибда ўзгаришлар қилишга мажбур бўлдик. Чап қанот ҳимоячимиз Олег Зотеев жароҳатланганди. Унинг ўрнини марказий ҳимоячи Ислом Тўхтахўжаев билан тўлдирдик. Балки хатоларнинг бир қисми шу жиҳат билан боғлиқдир. Умумий олганда эса ўйин сифатимизда кичик пасайишни кўрдим. Шу боисдан хатоларни кўриб чиқиб, уларни тўғрилаш борасида ишлашимиз керак. Пенальти? Буни муҳокама қилиш мен учун жуда қийин. Чунки вазият мен учун унчалик кўринмади. Тўғрисини айтсам, бу ҳозир муҳим ҳам эмас. Ҳимоядаги хатоларимизни тахлил қилиш мен учун муҳимроқ.
***

- Ғалабаларга осонликча эришилмайди. Шу боисдан улар ёқимли бўлади. Умуман олганда ўйин оғир ўтди. Ўйин томонлама биз рақибларга мағлуб бўлдик. Аммо йигитлар ўзларида куч топа олишди, мувозанатни тиклашди ва ҳисобда олдинга ҳам ўта олишди. Йигитлар ҳақли ғалабага лойиқ эдилар. Уларни табриклайман.

Ўзбекистон Кубогидаги барча жамоалар узоққа боришни ўйлайди. Бу совринни қўлга киритиш - клуб раҳбарлари, футболчилари, мураббийларининг орзуси. Аммо бунга лойиқ ҳам бўлиш керак. Яна бир бор рақиб ушбу рақиб билан ўйнаймиз. Айта оламанки, навбатдаги ўйин бундан-да оғир ўтади.