14 август куни футбол тарихида ўзгача янги саҳифа очилади. Истанбулда Европа суперкубоги-2019 учун бўладиган ўйинни аёл рефери бошқариб боради. Йўқ, УЕФА эркаклар жамоалари ўртасидаги баҳсни илк марта гўзал жинс вакилига ишониб топшираётгани йўқ. Мисол учун, швейцариялик Николь Петинья вақтида УЕФА кубоги саралаш босқичи доирасида ўтказилган «Стабек» - «Хеккен» ва «Стреймур» - «Манчестер Сити» ўйинларида ҳакамлик қилганди. У шунингдек, Швейцария кубоги финалини бошқариб борган, яна Лихтенштейн - Греция учрашувида ҳам ишлаган. Бироқ Петинья хоним меҳнат дафтарчасидаги бирор ўйин мақоми бўйича Европа суперкубогига етолмайди, барибир. Хуллас, «Ливерпуль» ва «Челси» ўртасидаги ўйинни бошқариб борадиган франциялик 35 ёшли Стефани Фраппар УЕФАнинг юксак ишончига кирган биринчи аёл реферидир.

Стефани хоним 11 йилдан буён футбол ҳаками сифатида фаолият юритмоқда. Эътиборлиси, у вақтида жонажон шаҳарчаси - Эрбле-Сюр-Сенда ўйнаш баробарида ҳакам вазифасини ҳам бажарган. Кейинчалик ўйин қоидаларини тўлиқ ўзлаштирган Стефани аёллар футболидаги ишидан қониқмай, ўзини эркаклар йўналишига урди - аввалига болалар миқёсидаги турнирларда тажриба тўплади, кейин навбати билан ярим ҳаваскорлар лигаси (тўртинчи дивизион), Лига 3 ва Лига 2га ўтди. Шу йил 28 апрель куни эса Фраппар хоним «Амьен» - «Страсбур» ўйинида элит дивизиондаги дебютини нишонлади. Яна бир ҳафтадан кейин эса «Ницца» - «Нант» учрашувини ҳам Стефанига ишониб топширишди. Мана, у энди яна бир янги қадам - халқаро дебют олдида турибди. Буниси чинакам синов, албатта.