ЕЧЛнинг охирги финалида қайд этилган мағлубият фаолиятидаги энг машъум оқшомни туҳфа этганини «Тоттенхэм» бош мураббийи очиқ-ойдин тан олди. Бироқ жанубий америкалик мутахассиснинг номдор касбдошлари ҳам бундай қисматдан бенасиб эмаслар. Қуйидаги материал Почеттинодек аламзадаларга тасалли бўлса, ажабмас.

Маурисио Почеттино (Аргентина) - ЕЧЛнинг 2018|2019 йиллар мавсуми финалида «Ливерпул»га имкониятни бой берган

Почеттино бугунги авлоднинг кўзга кўринган мураббийларидан бири эканига шак-шубҳа йўқ бўлсада, фаолиятидаги ёрқин кунлари билан ҳозирча фахрлана олмайди. Чунки жавонининг совринларга мўлжалланган токчаси бўм-бўш. Лекин мураббийликдаги «қаро тун»ни бошидан кечиришга улгурди. Танишинг, аргентиналик мутахассиснинг дил изҳори: «Ҳа, бу жуда оғир эди. Финал арафасидаги 3 ҳафтани ақл бовар қилмас даражада ўтказганимиз боис, мағлубият биз учун кучли зарба бўлди. Ўша пайтдаги ҳолатимизни таърифлашга тил ожиз. Беихтиёр 2002 йилдаги омадсизлик хаёлимдан ўтди. Ўшанда биз бир ҳафта ичида Швеция билан дуранг ўйнаб, Англиядан енгилган ва гуруҳда қолиб кетгандик. Футболчи ва мураббий сифатида ана шу икки омадсизликни фаолиятимдаги энг ёмон натижа, деб биламан. Финалдан кейинги кун поездга ўтирдимда, Мадриддан Барселонага жўнадим. 10 кун давомида уйдан кўчага чиқмадим. Ахир биз зафарга яқин тургандик. Назаримда, биз «Ливерпул»дан кучлироқ эдик. Афсуски, финалга «буюк» мақомини бера олмадик».

Юрген Клопп (Германия) - ЕЧЛнинг 2017|2018 йиллар мавсумида «Реал»га имкониятни бой берган

«Ванда Метрополитано»да аргентиналик ҳамкасбига «қаро кун»ни раво кўрган германиялик мутахассис аслида Почеттинонинг кейинги фаолияти учун мукаммал намуна бўлади, десак муболаға бўлмайди. Чунки у шу пайт­гача кўпгина мусобақаларда фақат чўққини кўзлади, бу йўлда вақтини, куч-қувватини аямади, аммо ҳал қилувчи баҳсда совринни рақибига топширди ва эвазига жамоатчиликдан ёқимтой омадсиз унвонини олди. Қаторасига 6 марта! Энди бир тасаввур қилинг: бир марта, икки марта, боринг ана уч марта соврин турган майдонга шогирд­ларингизни олиб тушсангизу, кейин рақибингиз уни боши узра мағрур кўтарган пайтда чапак чалиб турсангиз... Балки фикрим нотўғридир, лекин бошқа мураббийнинг бундай синовга дош бера олишини тасаввур қила олмаяпман, «боре-е» деб касбидан воз кечиб юбориши ҳақиқатга яқинроқдек туюлмоқда. Юрген эса шундай азобга 6 йил чидаб келди, мақсад сари интилди, ҳеч кимдан ҳеч кимга нолимади, иродаси букилмади. Ниҳоят, 6 финалли омадсиз серияга Клопп еттинчи уринишда барҳам берди. Биз эса унинг аввалги лақабини бекор қилиб, яхши маънода «футбол девонаси»га алмаштиришга жазм этдик.

Келинг, германиялик мураббийнинг сабоқ бўлишга арзийдиган ўй-фикрлари билан танишайлик: «Омадсизликлар - ўта бебаҳо тажриба! Сиз ҳеч қачон енгилмасликни исташингиз табиий. Аммо мағлубият ҳам ажойиб дори воситаси. Чунки ундан аччиқ, лекин таъсирчан сабоқ олиш мумкин. Мен қаторасига 6 марта финалда иштирок этиб, енгилдим. Уларни ҳаётимнинг энг тотли дамлари дея олмайман. Бироқ омадсизликлар мени руҳи синиқ кишига айлантира олмади. Мен учун ҳаётнинг мазмуни тинимсиз изланиш ва интилишда. Мақсадга эришишда тажриба ва ундан фойдалана олиш асосий роль ўйнайди».

Зайниддин Зидан (Франция) - 2017|2018 йиллар мавсумида «Леганес»га имкониятни бой бериб, «Қироллик кубоги» турниридан чиқиб кетган

2018 йилнинг январида Зидан раҳбарлигида қаторасига учинчи марта ЕЧЛда зафар қучиш илинжида бўлган «Реал» кутилмаганда Испания кубоги чорак финал беллашувида «Леганес» тўсиғидан ўта олмади. Ваҳоланки, жамоа сафар учрашувини қийинчилик (Асенсио, 89) билан бўлсада ўз фойдасига ҳал қилган ва ярим финал йўлланмаси нақддек эди. Бироқ «Сантьяго Бернабеу»даги жавоб учрашуви меҳмонларнинг 2:1 ҳисобидаги ғалабаси билан ниҳоясига етди ва сафарда урилган голлар эвазига «Леганес» кейинги босқичга чиқди. «Реал» эса қадрдон мухлислари қаршисида майдонни бош эгиб тарк этди. Мазкур шармандалик учун масъулиятни Зайниддин Зидан ўз зиммасига олди: «Биз бундай ўйнашга ҳақли эмасдик. Натижа ўйинга яраша бўлди. Чунки рақиб ўз услубини намойиш эта олди. Биз эса - йўқ. Тўғри, бундай ечимни ҳеч ким кутмаганди. Бироқ бу футбол. Шахсан мен ушбу мағлубиятни шармандалик сифатида қабул қиламан ва жавобгарликни ўз зиммамга оламан. Ҳозир асабий ҳолатдаман, ҳеч нарсани тушунмаяпман. Аммо шуниси аниқки, мураббийлик давримдаги энг мудҳиш оқшомни ўтказдим».

Дарҳақиқат, ўшанда Зизунинг дарғазаб бўлишига сабаблар етарли эди. Бироқ шогирдларининг «Атлетико»дан қабул қилган шармандали мағлубиятини (3:7) франциялик афсона қандай қабул қиларкин? Агар у шунчаки ўртоқлик учрашуви мақомида бўлмаганида, мураббий аввалгидан ҳам даҳшатлироқ оқшомга дуч келганига шубҳа қолмасди.

Хосеп Гвардиола (Испания) - АПЛдаги илк мавсум омадсизликлари

«Манчестер Сити»даги фаолиятини Гвардиола расмий учрашувларда қаторасига 10та ғалаба билан бошлади. Лекин кейинги беллашувлар стартдагидек омадли бўлмади: аввалига «шаҳарликлар» 6та ўйинда зафар қуча олишмади, кейин барқарорлик қаёққадир ғойиб бўлиб, ғалабалар кутилмаган омадсизликлар билан ўрин алмаша бошлади. Якунда Пеп «Эвертон»дан қабул қилинган йирик (0:4) мағлубият ва «Монако» туфайли ЕЧЛни барвақт тарк этганини мураббийлик давридаги «қаро кун»ларга қиёслади. Тўғри, кейинги икки мавсумда ҳам «Сити» АПЛдаги қўшнилари тўсиқларидан ўта олмай, ЕЧЛда омадсизликка учради. Бироқ шогирдларининг на ўйин, на натижа кўрсата олган даври каталониялик мутахассисни қаттиқ ранжитганди: «Ҳаётимда илк бора узоқ вақт ғалабага эриша олмай юришга мажбур бўлдим. Ҳа, мазкур аччиқ тажриба мен учун сабоқ бўлади, ундан тегишли хулосалар чиқараман».

Кейинги икки мавсумни «Сити» чемпион сифатида якунлаб, яна бир қатор совринларни қўлга киритганини инобатга олсак, Гвардиола тўғри хулоса чиқара олганига амин бўламиз.

Диего Симеоне (Аргентина) - ЕЧЛнинг 2та финалида «Реал»га имкониятни бой берган

«Матрасчилар» шарафини аввал футболчи, кейин мураббий сифатида муносиб ҳимоя қилаётган аргентиналик афсонанинг кўрган-кечирганлари орасида унутилмас омадсизликлар ҳам йўқ эмас. Европа тожидек нуфузли совринни бир эмас, икки марта қўлдан чиқаришни унутиб бўладими, ахир?! Боз устига, уни бир шаҳарда яшаб, бир ҳаводан нафас оладиган азалий рақиб илиб кетганига нима дейсиз? Ўша баҳслар исталган паллада дон Диегони шоҳсупага олиб чиқиши мумкинлигига-чи? Аммо иккала беллашувда ҳам омад «Қироллик клуби» вакилларига кулиб боқди. 2014 йилда Серхио Рамоснинг 93-дақиқадаги ягона голи тож тақдирини ҳал қилди. 2016 йилда эса «лотерея» Диего ва унинг шогирдлари учун омадсиз чиқди.

Карло Анчелотти (Италия) - «Ювентус»даги фаолияти

Дон Карло ҳам аксарият касбдошлари қатори аламли мағлубиятлар таъмини тотиб кўрди. Масалан, «Милан» билан аввалига «Депортиво»га ўз уйидаги ғалаба (4:1)дан кейин имкониятни бой бериб (0:4), ЕЧЛни тарк этди. Бир йилдан кейин Истанбул финалида мухлислар учун шокотерапия сеансини намойиш этди. «Реал» бошқарувини ўз қўлига олганида жамоа Мадрид дербисида «Атлетико» «тарсаки»сига (0:4) дуч келиб, боши берк кўчага кириб қолди, унинг «Бавария»си эса «ПСЖ» қаршисида тиз чўкишга мажбур бўлди. Бироқ «Алленаторе» қайд этган бу омадсизликлар унинг «Ювентус» билан мураббийлик соҳасига кириб келганда чеккан аламлари олдида денгиздан томчи, холос. «Ювентус»га розилик бериб, тарихий хатога йўл қўйгандим. Турин ҳеч қачон менга маъқул келган эмас, «Ювентус» эса доимо мен учун ёқимсиз жамоа бўлган. Бундан кейин ҳам унга меҳр бера олмасам керак. Жамоа мен учун нотаниш экотизим эди, у ерда ҳеч қачон ўзимни бахтли ҳис этмаганман. Мен шунчаки, машинанинг бир гайкаси эдим, холос».

Жозе Моуриньо (Португалия) - «Барселона»га 0:5 ҳисобида имкониятни бой берган

Ўз вақтида шонли зафарларга эришиб, «Беназир» тахаллусига сазовор бўлган португалиялик мутахассис ҳозирда фаолиятидаги инқироз даврини бошдан кечирмоқда. Моунинг ови юриб турган энг ёрқин даврини оладиган бўлсак, уни «Барселона» бош мураббийи Хосеп Гвардиола ўта қаттиқ ранжитган. Яъни, «Реал» бош мураббийи лавозимини эгаллаган португалиялик мутахассис ўзининг дастлабки «Класико»сида «Камп-Ноу»га ташриф буюрган ва албатта, ким эканлигини кўрсатиб қўйишни мўлжаллаганди. Бироқ мезбонлар унинг жамоаси дарвозасига 5та жавобсиз гол уришганди.

Хўжа АБДУЛРАҲМОН тайёрлади.