Хатони тан олиш яхши, уни такрорламаслик янада яхши. «Навбаҳор»га чинакамига мухлислик қилмасамда, Андрей Канчельскиснинг жамоа бош мураббийи лавозимига қайтарилганидан жуда хурсанд бўлдим. Зеро, унинг натижаларини бир четга суриб турайлик, номиёқ катта рекламадир. Тан олиш керак, Канчельскис Наманганда ишлаб турганида, Россия матбуотининг футболимизга нисбатан эътибори бир қадар ошганди. Қолаверса, «МЮ»дек клуб тарихида ёрқин из қолдирган россиялик мутахассис қисқа вақтда футболчилар ва мухлислар меҳрини қозонди. Афсуски, «Навбаҳор» раҳбарияти буларни ҳисобга олмай, унинг ўрнига Ўзбекистон миллий жамоадаги иш даврида бирор нарсани қойиллатмаган Деян Журжевични олиб келди. Хайриятки, бунинг хато қарор эканлиги тан олинди, фақат «Навбаҳор»даги шашт ва маром бузилгани чатоқ бўлди-да. Энди Канчельскис ўша маромни тезроқ қайтарса, бас. Клубнинг бу сафар у билан 3 йиллик шартнома тузгани эса таҳсинга сазовор иш.

--------------------------------------------------------

Камолиддин БОЗОРОВ (Асака шаҳри).