Деян Ловрен анчадан буён «Ливерпул»нинг асосий таркиб ўйинчиси эмас. Унинг жароҳати туфайли Виржил ван Дейкка даст­лаб Жо Гомес, кейин эса Жоэль Матип ҳамкорлик қилишди. Ёзда эса «Ливерпуль» хорватиялик футболчидан бутунлай қутулмоқчи бўлди. Лекин унинг трансфери борасида «Рома» билан келиша олмади. Клоппнинг фикрича, Ловрен ЕЧЛнинг «плей-офф» ўйинлари даражасида эмас. Лекин Деяннинг фикри бошқа.

- Кетиш ҳақида ўйлаётгандим. «Ливерпуль» учун ҳаммасини бериб бўлганимни билдим, Чемпионлар Лигасида ғалаба қозондим. Айримлар «Катта клубда ўйнаяпсан. Индамай пулингни олиб, ишлаб юравер», ҳам дейишди. Лекин мен ундай эмасман. Ҳеч қаерга кетмоқчи эмасман. Шунинг­дек, кимгадир қандай ўйнашимни исботлаш ниятим ҳам йўқ. Профессионалман, ЕЧЛда ғолиб бўлдим, жаҳон чемпионатида кумуш медалларга эга чиқдим. Футболда катта ютуқларга эришдим. Шундай экан, ижарага кетишим ёки бирор нарсани исботлашим шарт эмас.

Ловренн ўзини жаҳоннинг энг яхши марказий ҳимоячиларидан бири деб ҳисоблайди.

- Агар хатога йўл қўйсам, ўзимни ўзим танқид қиламан. Бошқалар билан бир неча кун гаплашмайман. Характерим шунақа. Бу ўзим учун жазо. Бошқа одамларнинг мен ҳақимда нима дейишаётгани қизиқтирмайди. Фақатгина мураббийнинг фикри муҳим. Чунки у асосий фигура. Агар у мендан мамнун бўлса, демак АПЛнинг энг яхши ҳимоячиларидан бириман.

ЖЧ-2018 ярим финалида Хорватия Англияни мағлуб этганидан сўнг у шундай деганди:

- Одамлар мен учун мавсум осон ўтмаганини айтишди. Лекин бу фикр­га қўшилмайман. «Ливерпуль» билан Чемпионлар Лигасининг финалигача етиб бордим. Энди терма жамоам сафида жаҳон чемпионатининг ҳал қиувчи учрашувида ўйнаш учун тайёргарлик кўряпман. Одамлар энг яхши ҳимоячилардан бири эканлигимни тан олиб, ахмоқона фикрлар билдиришни тўхтатишгани маъқул.

Мундиал финалидан кейин эса шундай деганди:

- Биз кучли ўйнадик. Франция футбол ўйнамади, балки гол уриш учун имкониятини кутди. Улар бутун чемпионат давомида тактикаларидан воз кечишмади. Бунга қойил қолиш керак. Рақибга нисбатан яхши ўйнаган ўйинимизда мағлуб бўлганимиздан афсусдаман.

***

- Ўзимни жаҳоннинг энг яхши ҳимоячиларидан бириман, дегандим. Ҳақиқатан ҳам шундай. Албатта, тан-қидчилар бундай эмаслигини айтишади. Бу ерда нима дейиш мумкин? Ҳеч ким идеал эмас. Одамлар ҳамиша хатоингизни топишга ҳаракат қилишади. Ижобий вазиятларга эса эътибор қаратишмайди.

Мана, Рамосга қаранг. У мендан кўра кўпроқ хатога йўл қўяди. Лекин у «Реал»да ўйнайди. Агар жамоангиз 5:1 ёки 5:2 ҳисобида ғалаба қозонса, ҳеч ким камчилигингизни қидириб ўтирмайди. Агар мен хато қилсам, биз ҳамиша 0:1 ҳисобида имкониятни бой берамиз.

Жорий мавсумда Ловрен бир дақиқа ҳам майдонда ҳаракат қилмади. Лекин ўзига ҳамон юқори баҳо бермоқда.

- Мен ҳеч қачон жаҳоннинг энг яхши ҳимоячисиман, демаганман. Балки кучли бешталикка кирарман. Менга ЕЧЛ финалида ўйнаб, бир ойдан сўнг жаҳон чемпионати финалида ўйнаган футболчини айтиб беринг-чи. Премьер-лигада бундай футболчилар икки нафар холос - мен ва Тьерри Анри. Буни текшириб кўрдим. Тўғри, менинг жамоаларим ҳал қилувчи ўйинларда мағлуб бўлишди. Аммо мен мақтовга лойиқман, деб ўйлайман.

Жаҳонда ўзига бунчалик юқори баҳо берадиган футболчи бўлмаса керак. Лекин Деян ажойиб марказий ҳимоячи эканлигини ҳеч ким инкор этмайди. У «Ливерпуль» учун муҳим голларни урган, Хорватия терма жамоасининг ғалабаларида ўзинги катта ҳиссасини қўшган. Аммо «Ловрен жаҳоннинг энг яхши ҳимоячиси» деганда одамларнинг юзида кулги пайдо бўлади. Албатта, Ловреннинг ўзидан ташқари.

Ж.БОБОХОНОВ тайёрлади