Англия терма жамоасининг собиқ ҳужумчиси Эмиль Хески FourFourTwo наш­рига интервью берди. Қуйида ана шу суҳбатни ўқишингиз мумкин.

- Эмиль, сизга бутун даврларнинг энг буюк исмларидан бирини қўйишган: Айвенго. Ота-онангизнинг ноодатий танловига муносабатингиз қандай?

- Улар айлана стол рицарларини кўришган. Шунга бўлса керак, менга Айвенго исми мос деб ҳисоблашган. Тўғриси, бунга қарши эмасман. Бу шунчаки иккинчи исмим. Ундан ҳеч ким фойдаланмайди. Кўпчилик эса исмим Айвенго эканлигини билмайди. Айтганча, укамнинг исмини бразилиялик футболчи шарафига Ревелино деб қўйишган.

- Сиз ҳам фарзандларингизга антиқа исмлар қўйганмисиз?

- Йўқ. Одамлар устидан кулишларини истамайман (кулади). Айниқса, ўз фарзандларим устидан. Уларга Рейган ва Жаден деб ном берганмиз.

- 1952 йили ишлаб чиқилган «Айвенго» фильмини кўрганмисиз?

- Ҳа, кўрганман. Унчалик ёмон ишланмаган. Бу Айвенго исмига салбий таъсир кўрсатади, деб ўйламайман.

- Ўша даврларда яшай олган бўлармидингиз?

- Менимча, яшай олардим. Ўйлашимча, муносиб етакчи бўлардим.

- Ўрта асрлардаги қуролингиз қандай бўларди: булава, болта, жанговар болға, арбалет..?

- Отиш мумкин бўлган қуролни танлардим. Менимча, арбалетни. Олдинлари отиб турардим. Дубайда бир-икки хил «қурол»ни синовдан ўтказганман. Тўғрисини айтсам, мерганлигим ёмон эмас. Лекин бу мен учун эмаслигини тушуниб етганман. Қурол одамларга зарар келтириши менга ёқмайди.

- Қайси собиқ жамоадошингизнинг жангда ёнингизда бўлишини истардингиз?

- Стивен Айрленд. Сиз жанга ўйлаб ўтирмай киришиб кетадиганини назарда тутяпсизми? Стивен айнан шундай персонаж бўла олади. У сиз билан охиригача боришга тайёр. Дўсти учун суриштирмай жангга киришади. Балки дипломатик инсон эмасдир, лекин унга ишонса бўлади.

- Агар кашшоф бўлганингизда, маросимларда қатнашармидингиз? Уларни нима билан ҳайрон қолдирардингиз?

- Менимча, янги рақсларни кўрсатган бўлардим. Менга Жесси Лингард ёқади. Унинг захирасида ҳар доим янги ҳаракатлар бўлади. Менда ҳам кўрсатишим мумкин бўлган ҳаракатлар бор. Бир пайтлари ўша ҳаракатларни майдонда кўрсатишимни талаб қилишган. Аммо йўқ деб жавоб берганман.

- АҚШ аёллар терма жамоаси жаҳон чемпионатида ғолиб чиққач, чемпионликни нишонлашларига қандай муносабатдасиз?

- Уларни ёқтириб қолдим. Кўпчилик салбий фикрларни билдирди. Лекин уларнинг фикрига қўшилмайман. Ахир улар жаҳон чемпионатида ўйнашди. Агар кучсизроқ жамоага тўққизта гол уришганида, голларини тўққиз хил тарзда нишонлашарди. Одамлар уларнинг устидан арз қилишмоқда. Лекин ўша танқид қилаётганлар уларнинг ўрнида жаҳон чемпиони бўлганида нима қиларди? Улардан ҳам баттар қилишарди.

- 11 январь куни туғилган кунингизни нишонлайсиз. Худди шу куни Жейми Варди ҳам туғилган. Сиз унинг афсонавий кечаларидан бирида бўлганмисиз?

- Йўқ, Варди билан ҳеч нишонламаганман. Бу уятли бўларди. Ўз вақтида мен ҳам яхши кечаларни уюштирганман. Бир сафар кечамга Жо Бадден ташриф буюрган. Бироқ ҳозир ёшим ўтиб қолди. Вардиларга ўхшаб кўнгилхушлик қилолмайман.

- Туғилган кунингиз Рождестводан кейин бўлиши қийнамайдими?

- Даҳшат. Жуда ёмон пайт. Чунки ҳамма янги йил туфайли пулларини сарфлаб бўлган. Совуқлигидан ҳеч ким кўчага чиқишни истамайди. Агар ёз ойларида туғилган бўлсангиз, кўчага чиқиб, туғилган кунингизни яхшилаб нишонласангиз бўлади. Аммо мен ҳар сафар ўзим учун яхши байрам ташкил қилишга ҳаракат қиламан.

- Австралиянинг «Ньюкасл Жетс» клубида ўйнагансиз. Ньюкасл Жордилендга ўхшайдими?

- У ердагилар ҳам ичишни яхши кўришади. Бу яхши фанатларга эга бўлган кончилар шаҳри. Иқлим эса умуман бошқача, шунчаки фантастика. Австралиядаги ҳар бир дақиқамдан роҳатланганман.

- Сан-Хосега қандай боришни биласизми?

- Йўқ, қандай борилишини хаёлимга ҳам келтира олмайман. Бироқ замонавий технологиялар туфайли осонгина топиб олишим мумкин. Шунчаки, Waze иловасига Сан-Хосе сўзини ёзсам, йўналишни кўрсатади.

- Марсда ҳаёт борми?

- Менимча, бўлса керак. Лекин қачонки у ерга бормасак, аниқ билмаймиз. У ерга боришдан олдин роса ҳаяжонлансам керак. Агар биринчи учишимга тўғри келса, ҳаммасини уддалайман, деб ўйлайман. Келинг, бироз кутайлик. Кейин у ерда ҳаёт бор ёки йўқлигини билиб оламиз. Ҳозирча бу саволга жавоб бериб бўлмайди.

ЖАЪФАРАЛИ тайёрлади