Сешанба куни «Навбаҳор» бош мураббийи Андрей Канчельскис иштирокида матбуот анжумани бўлиб ўтди. Унда россиялик мутахассис ОАВ вакилларини қизиқтирган саволларга жавоб берди.

- Бугунги кунда сиз наманганлик футбол мухлисларининг эътибор марказидасиз. Шу муносабат билан футболга кириб келишингиз, олдинги ўйнаган жамоаларингиз ҳақида сўзлаб берсангиз.

- Умуман олганда, бунинг тарихи узун. Барчаси ҳақида ўз автобиографиямда ёзганман. Мазкур китоб яқин орада Наманганга ҳам келади. Ана ўшани ўқиб, барчасини билиб олишингиз мумкин. Агар ҳозир айтишни бошласам, кўп вақт кетади. Натижада машғулотга улгурмай қолишимиз мумкин. Ҳозирда китобни Москвада кўпайтиришни режалаштирганмиз. Тез орада клубга ҳам тақдим этилади. Уни мухлисларга қай тарзда ҳавола қилиш клубнинг иши. Умуман олганда, китобни ёзишда ундан фойда олишни кўзламаганман. Оз миқдорда сотилган. Асосан болалар уйлари, интернатларга тарқатганмиз. Бу ерга келганидан сўнг балки ўзбек тилига ўгиришар. Муҳими, китоб бор ва тез орада Наманганга келади.

- «Навбаҳор»га қайтишингизга сабаб нима бўлди?

- Кетишимизга кичик кўнгилсизликлар сабаб бўлганди. Барчасини Хайрулло Ҳайитбоевич билан гаплашиб олдик. Умуман олганда, вазиятга икки томонлама баҳо бериш лозим. Қайсидир маънода, мен хато қилдим, бош­қа тарафдан... Нима қилган тақдирда ҳам тил топиша олдик. Барчасини юзма-юз, очиқ гаплашдик. Сўнгги қайтишим Наманган футболи, хусусан, «Навбаҳор» учун фодали деб ҳисобладик. Муҳими, вилоят ҳокими мен билан гаплашиш учун вақт топиб, Тошкентга борди. Ҳамма раҳбар ҳам вақт топиб, суҳбатлашишга рози бўлавермайди. Мен билан бундай вазият учинчи бор юз бермоқда. Биринчиси, Валерий Лобановский Донецкнинг «Шахтёр» клубига қўйиб юбормагани. Иккинчиси, Алекс Фергюсон билан орамизда совуқчилик бўлган. Аммо кўп ўтмай у «бутун жамоа олдида узр сўрашим мумкин. Сен ҳақсан» деганди. Учинчиси, мана Хайрулло Ҳайитбоевич билан юз берди. Хуллас, ўзаро гаплашиб олдик. Энди биргаликда Наманган футболини ривожлантиришга ҳаракат қиламиз.

- Шартномангиз қанча муддатга тузилган?

- Келишув муддати уч йил. Бу вақт оралиғида кўп иш қилишимиз лозим. Асосий вазифа - жамоани Осиё Чемпионлар Лигасига олиб чиқиш. Бу вазифани яқин йилларда амалга оширишга ҳаракат қиламиз. Келгуси мавсум камида иккинчи ўринга ҳаракат қиламиз. Албатта, асосий мақсадимиз биринчи ўрин. Тўғри, ҳамма жамоа биринчи ўринни олишни истайди. Шундай экан, бу вазифани уддалаш осон эмас. Бунинг учун кўп иш қилишга тўғри келади. Ўйинчиларни танлаш ҳам шулар жумласидандир. Ўзингиз гувоҳи бўлганингиздек, «Пахтакор»га қарши учрашувда таркиб борасида муаммоларга дуч келдик. Ўйинда беш нафар футболчимиз иштирок этолмади. Бунча футболчининг ўрнини тўлдириш ҳар қандай жамоа учун ҳам оғирлик қилади. Ҳаттоки, «Милан», «Интер», «Барселона» ёки «Реал» каби клублар ҳам муаммога дуч келишади. Айтайлик, «Реал» таркибида Бэйл, Бензема, Модрич ва бошқа футболчилар бўлмаса, жамоа ўз ўйинини кўрсата олмайди. «Пахтакор»га биз қайсидир маънода «фора» бердик. Ўзи Тошкент жамоаси биринчи ўринда бормоқда. Шундоқ ҳам бу жамоага қарши ўйнаш оғир. Олдимизда еттита ўйин бор. Ушбу баҳсларда муносиб ўйнашга ҳаракат қиламиз. Шунингдек, медаллар учун курашишга имкониятимиз бор. Ҳозир энг муҳими тушиб қолган инқирозимиздан чиқиб кетишимиз керак.

- Сизни «Манчестер Юнайтед»га ким таклиф қилган? Ушбу жамоада ўйнаш учун қай даражада бўлиш керак?

- Албатта, Фергюсон таклиф қилган. У олдин ўйинларимни кузатган. Шунингдек, футболчида омад ҳам бўлиши керак. Ўйин услубим «МЮ»никига мос келиши қайсидир маънода омадимга ҳам боғлиқ, деб ҳисоблайман. Ўша пайтларда «Динамо» (Киев) ҳам худди «МЮ» каби 4-4-2 схемасида ўйнарди.

- «Навбаҳор»нинг бугунги инқирозига сабаб нимада?

- Ўзингиз кўриб турганингиздек, жамоа гол уролмаяпти, очко ололмаяпти, функционал тайёр эмас. Бу инқироз. Ундан чиқиб кетиш учун ишлашимиз керак. Мана, заводда одамлар ишлаяптими? Биз ҳам шундай ишлашимиз лозим. Гол уролмаяпмизми, демак муаммо ҳужумчиларимизда. Бунинг учун тайёргарлик яхши бўлиши керак. Олдин тўп киритардик. Демак, жамоа ҳар жабҳада тайёр бўлган. Ўзингизга маълум, жамоа ҳисобда ортда бораётганида футболчиларда асабийлашиш кузатилади. Шундай вазиятдан чиқиб кетишни уддаласак, демак руҳий тайёргарликни яхши олиб борган бўламиз.

- Сиздан олдин ишлаган Журжевич билан кўришиб, мулоқот қилдингизми?

- Йўқ, кўришмадим. Агар кўришиб қолганимизда, гаплашиб олган бўлардик. Унинг ўз қарашлари, менинг ўз қарашларим бор. Ҳар ким футболни турлича кўради. Якунда натижа биринчи ўринда туради. Шундай экан, ҳаммаси нима билан тугашини кўрамиз. Шундан кейингина бир хулосага келиш мумкин. Ҳозир у ёки бу инсонни айбдор қилишдан наф йўқ. Бу футбол. Ҳаёт шунақа. Ким ҳақ ёки ким ноҳақлигига ўйинларни кўрганлар баҳо беришади. Айни пайтда бировни айбдор қилишдан наф йўқ. Энг асосийси, тушиб қолган чуқурликдан чиқиб олишимиз даркор. Футболда майда-чуйдалар бўлмайди. Бу гапларни мендан олдин ҳам айтишган, кейин ҳам айтишади.

- Янги мавсумга янги футболчиларни қай тартибда танлаб оласиз?

- Ҳозир ҳам шунинг устида иш олиб боряпмиз. Ҳар бир номзодни яхшилаб ўрганиб чиқамиз. Мақсад - олдингидек хатоларга йўл қўймаслик. Айни пайт бизда шу йўналишда селекционер иш олиб бормоқда. У бизга футболчилар борасида маълумотлар бериб туради. Шунингдек, ўзимизнинг кузатувчиларимиз ҳам ўйинларга бориб, бу борада иш олиб боришади. Керак бўлса, ўзим кузатаман. Кетишимдан олдин бир ҳужумчини кузатаётгандик. Лекин вазият ўзгариб кетгани боис уни таклиф қила олмадик. Вазифа жиддий бўлгани сабабли ҳам бунга жиддий эътибор қаратишимиз талаб этилади. Афсуски, ҳозирда айрим футболчиларимиз «Навбаҳор» даражасига жавоб беришмайди. Тўғрисини айтганда, улар биринчи ёки иккинчи лигага мос ўйинчилар. Бундай футболчилар билан юқори натижаларга эриша олмаймиз. Шунинг учун мавсум якунланганидан сўнг айрим ўйинчилар билан хайрлашамиз.

- Янги ўйинчиларни танлашда фақат Ўзбекистонга эътибор қаратасизларми?

- Айни пайт таркибимизда тўрт нафар легионер бор. Албатта, биринчи ўринда эътиборимизни Ўзбекистонга қаратамиз. Балки яна бирорта легионер таклиф қилармиз.

- Юқорида айтган слекционер мураббийнинг номини ошкор қила оласизми?

- Ҳозир у Ўзбекистон ёшлар терма жамоасида ишлаяпти. Исми Отабек (Ғуломхўжаев).

- Сиз бошқаришни истаган Суперлига жамоасининг қайси жиҳатларида муаммолар бўлмаслиги керак?

- Ҳар соҳада, инфратузилма, майдон, база. Хуллас, фаррошдан тортиб клуб президентигача. Бундан ташқари, клубнинг молиявий ҳолати ҳам катта роль ўйнайди. Футболчи пул ҳақида ўйламаслиги керак. Кетишимдан олдин футболчилар пул борасида кўп савол беришарди. Умуман олганда, мураббий жамоанинг молиявий масалалари билан шуғулланмаслиги лозим. Агар футболчи пул олмаса, уни яхши машғулот ўтказишга ундаш қийин. Одам бошқача фикрлайдиган бўлиб қолади. Агар ҳамма масала ҳал қилинган бўлса, мен футболчидан барчасини талаб қила оламан. Катта пул тўлаш шарт эмас. Муҳими - вақтида маош бериш.

- Айни пайт «Навбаҳор» маошларини вақтида оляптими?

Суҳбат давомини газетамизнинг 18 сентябрда нашрдан чиққан пайшанба сонида ўқишингиз мумкин...