Яқинда Мадриддаги «Рейна-София» ижод марказида Серхио Рамос Amazon Primer Video томонидан тайёрланган «El corazon de Sergio Ramos» (таржимаси - «Серхио Рамоснинг қалби») деб номланувчи янги ҳужжатли фильм тақдимотини ўтказди. «Реал» сардори тадбирдан сўнг маросим бошловчисининг саволларига жавоб берди.
- Сизнингча, оммада қандай таассурот уйғотдингиз ва ушбу ҳужжатли фильм уларнинг нуқтаи назарини ўзгартириши мумкинми?
- Умид қиламанки, улар мен ҳақимда етарли тасаввурга эга бўлиб, футболчи сифатида менга баҳо беришади - биз ҳам оддий одамлармиз, бизда ҳам барча сингари яхши ва ёмон кунлар, иштиёқ ва қизиқиш бўлади... Кимнингдир фикрини ўзгартириш ниятим йўқ, шунчаки, омма мен ҳақимда кўпроқ билишини, астойдил қилинган меҳнат эвазига юқори натижаларга эришиш мумкинлигини англашларини хоҳлайман.
- «Аякс»нинг «Реал»ни Чемпионлар Лигасидан чиқариб юборишини трибунадан туриб кузатиш қандай бўлди? Ўшанда сариқ карточкалар кўпайиб кетгани сабабли дисквалификация қилингандингиз.
- Ушбу лойиҳага рухсат олганимизда, бажаришимиз керак бўлган мажбурият ва вазифалар бор эди. Сариқ карточка ва ЕЧЛдан чиқиб кетиш ҳақида кўп гапирилди. «Реал»нинг ўша куни турнирни тарк этишини ҳеч ким кутмаганди. Бу барчамиз учун ёқимсиз тажриба бўлди. Ҳеч нарса идеал эмас, ҳар доим ҳам ишлар қовушавермайди.
- Сизнинг ҳужжатли фильмингизда «Олтин тўп» ҳақида гапирилмаган. Афтидан, ушбу совринни Виржил ван Дейк қўлга киритади. Нима деб ўйлайсиз, сизнинг ҳеч қачон номзодлар қаторида бўлмаганингизни инобатга олсак, бу адолатданми?
- Индивидуал совринлар билан боғлиқ ҳамма нарсага баҳо бериш қийин. Ван Дейк - ажойиб марказий ҳимоячи, у мавсумни жуда яхши ўтказди. Бунинг учун жуда кўп ишлади - одамлар ҳар доим Криштиану ва Месси ҳақида гапиришади, аммо бу ўзгача йўналиш бўйича ташланган қадамдир, бошқаларнинг ҳам ғалаба қозониши ёқимли. Ҳа, сўнгги йилларда бошқа футболчилар ҳам «Олтин тўп»ни қўлга киритишлари мумкин эди, лекин бундай бўлмади ва мазкур ҳолат кишини ўйлантириб қўяди. Футбол - жамоавий спорт тури, шу боис индивидуал баҳолар бериш мушкул. Агар Виржил ғолиб чиқса, уни табриклашимиз керак.
- Ҳужжатли фильмнинг ишланиши «Реал»нинг сўнгги йиллардаги энг омадсиз мавсумларидан бирига тўғри келганидан бироз ранжигандирсиз?
- Охир-оқибат, ҳаётдаги нохуш лаҳзалар туфайли кўп нарсани ўрганасиз. Фаолиятим муваффақиятли кечди, бироқ тарихимиз ҳақида сўзлаб беришни хоҳлаган йилимизда ишимиз қовушмади. Бу ҳам ҳужжатли фильмнинг таъсирли қисмларидан биридир - одамлар баъзан ҳеч нарса ўхшамаслиги мумкинлигини ҳам кўришлари мумкин. Бу ҳам янги умидлар туфайли катта совринларни қўлга киритиш йўлида бизга мотивация беради.
- Нимадан афсусландингиз?
- Ҳаётда афсусланишга сабаб бўладиган кўплаб воқеалар кузатилади, биз хатолардан сабоқ оламиз. Хатолар - бу ҳаёт дарси. Мен жуда оптимистик руҳдаги одамман, баъзан янглиш қарорлар мени бахтиёр қилади, чунки бу шахс сифатида ўсишга эришишимга ёрдам беради.
- Яна қандай ушалмаган орзуларингиз қолди? Чемпионлар Лигаси, жаҳон чемпионатида ғолиб чиқиш, «Олтин тўп»...
- Орзу қилишдан тўхтамайман. «Реал» билан бешинчи марта ЧЛда ғолиб чиқишни хоҳлайман. Терма жамоада ҳам шундай - яна бир Европа чемпионати ёки мундиалдаги ғолиблик... Ажойиб бўларди. «Олтин тўп»? Балким. Уни қўлга киритишга яқинманми, йўқми, билмайман. Фабио Каннаваро ютган экан, нега энди буни уддалай олмаслигим керак? Бундай ёқимли воқеалар кузатилиши учун Камасда кечган болалик пайтларимдаги умидни сақлаб қолишим керак. Танам вақти келганини англатса, бу ҳақда ўйлаб кўраман, яна бир неча йил юқори савияда ўйнай олишимга ишонаман.
- Месси кейинги йили «Барселона»ни тарк этиши мумкин. Унинг «Реал»га ўтишини хоҳлармидингиз?
- Бошқа футболчилар фаолияти ҳақида гапириш менга тўғри келмайди. Ҳар доим Лео ҳақида илиқ фикрлар билдирганман, унинг барча учун намуна экани, футбол тарихидаги энг яхши футболчилардан бири бўлганини таъкидлаганман. У ўзи муносиб кўрган қарорларни чиқаради. Менинг ихтиёримда яна икки йиллик шартнома қолди, шу муддатни совринлар ютишга сарфламоқчиман. Бундан кейин нима бўлишини кўраверамиз. Ҳар бир лаҳзадан роҳат олмоқчиман, эртанги куннинг нима беришини вақт кўрсатади. Ҳар бир вазиятни охирги имкониятдек баҳолаб, ундан максимал фойдаланишга ҳаракат қиламан.
А.ҲАМИДОВ тайёрлади.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20