«Валенсия» бош мураббий Марселино Гарсия Торални истеъфога чиқарди. Клуб соҳиби Питер Лим ва мураббий ўртасидаги келишмовчилик шу тариқа ўз исботини топди. Ички чемпионатни муваффақиятсиз (3 ўйинда 4 очко) бошлаган жамоа ЕЧЛда Альберт Селадес раҳбарлигида стартга чиқади. Марселинонинг айтишича, уни Испания кубогини қўлга киритгани учун... вазифасидан озод этишганмиш. Чиндан ҳам шундайми?
Истеъфога натижа сабаб эмас
Кўпчиликни ажаблантирган ғайритабиий қарорга туртки бўлган омилни аниқлаш учун биринчи галда жамоанинг натижаларини таҳлил қилиб кўрайлик.
«Валенсия»нинг Марселино келишидан аввалги икки мавсумдаги натижалари:
* Примерани икки марта 12-ўринда якунлади;
* Испания кубоги ярим финали;
* ЕЛ нимчорак финали.
«Валенсия»нинг Марселино давридаги икки мавсум натижалари:
* Примерада икки марта «Барселона», «Реал» ва «Атлетико»дан ке-йин 4-ўринни эгаллади;
* Испания кубогида аввал ярим финалга чиқди, кейинги мавсумда кубокни қўлга киритди;
* ЕЛда ярим финалга қадар етиб борди.
Кўриниб турибдики, Марселинонинг ўз лавозимидан четлатилишига жамоа натижалари сабаб бўлмаган.
Айб ўйинчиларда эмас
Балки футболчилар орасида мураббийдан норози бўлганлари ҳам йўқ эмасдир, аммо бу борада ҳеч ким нолимаган. Аксинча, жамоадаги ички муҳит аъло даражада эди. Бунга Испания кубоги финалидаги ғалабадан кейинги кўтаринкилик мисол бўла олади: ўшанда «Валенсия» ҳимоячиси Габриэл қувлик билан мураббийга қарши «подкат» қўллади, Марселино эса мамнуният билан яшил майдонга йиқилди.
Шунингдек, клуб ҳазил тариқасида футболчиларни VAR тизимига мурожаат қилишга чақирди. Бир неча ойдан кейин тизим Марселинонинг истеъфоси хусусидаги шафқатсиз буйруқни эълон қилди.
«Валенсия» ўйинчиларидан миннатдорчилик
«Мистер, мен учун қилган хизматларингизга муносиб раҳмат айтиш имконини берадиган ибораларни ҳеч қачон топа олмасам керак. Келажакдаги фаолиятингиз янада ёрқинроқ бўлишига тилакдошман ва бунга ишонаман. Омадсиз кунлар ва жароҳатларга қарамасдан, менга билдирган юксак ишонч учун яна бир бор раҳмат айтаман. Чексиз ҳурмат билан: Денис Черишев»
Родриго Морено, Дани Парехо, Хосе Гайя, Эсекиэль Гарай ва бошқа футболчилар ҳам дил изҳорларини тегишли фотосуратлар остига битиб, устозга миннатдорлик билдиришди.
Ҳамма гап раҳбарият билан мураббий ўртасидаги кескинликда
Июль охирида Marca «Валенсия» бош директори Матео Алемани клуб соҳиби Питер Лим билан чиқиша олмай қолгани ҳақида хабар берганди. Алемани ва Маселино - бир-бирига қаттиқ ишонадиган аҳил жуфтлик. Лим билан можаронинг келиб чиқишига трансферлар бобидаги келишмовчиликлар сабаб бўлди. Денис Суарес ва Рафинья «Валенсия» таркибидан жой олишга шай туришганди. Бироқ соҳиб уларни кўришни истамади. Боз устига, у Родригони «Атлетико»га сотиш тараддудида эди. Мураббий билан бош директор эса Родригодан жудо бўлишни истамадилар.
Кескинликнинг кучайишига олиб келган сабаблардан яна бири - Лимнинг таниқли агент Жорже Мендеш билан яқинлиги. Мендешнинг ташаббуси билан «Валенсия» таркибидан жой олган бир қатор футболчилар, масалан, Негредо, Перес, Нани, Абденнурлар кутилган савияни кўрсата олмадилар. Шундан кейин Марселино Мендешнинг мижозлари билан ҳамкорлик қилишни истамади. Шу тариқа ўзаро муносабатлар издан чиқди.
Истеъфодан кейин икки кун ўтгач, матбуот анжумани ташкил этилди ва Марселино унда воқеага қуйидагича изоҳ берди: «Ишончим комилки, биз қўлга киритган кубок юзага келган вазиятнинг асосий сабабчиси бўлди. Турнир жараёнидаги кураш бизнинг ЕЧЛда иштирок этиш имкониятимизга таъсир кўрсатиши мумкин эди. Мавсум давомида биздан турли хабарлар орқали мусобақадан чиқиб кетишимизни талаб қилишди. Бироқ биз - мухлислар, футболчилар ва мураббийлар штаби нуфузли соврин учун курашишни истардик. 19 июлда Сингапурга йўл олдим. Лим мени ЕЧЛ йўлланмасига эга бўлганимиз билан табриклади, лекин кубок хусусида оғиз очмади. Ҳайратдан қотиб қолганимни тасаввур қилиш қийин эмас. Ўзимни ғолиб мураббий деб ҳисоблайман. Шу боис, шогирдларим ҳам мен каби бўлишларини истайман. «Валенсия» шунчаки, ҳаммасидан воз кечади, деб ўйлайсизми? Унда менинг профессионаллигим қаерда қолади? Айтинг-чи, агар шогирдларимга кубокни бой бериш топшириғини берганимда, ёнимда нечта футболчи қолган бўларди?!»
Энди жамоа «Барселона» ва «Реал» сафида тўп сурган Альберт Селадес раҳбарлигида майдонга тушмоқда. Селадес шу пайтгача бош мураббий сифатида бирорта клубни бошқарган эмас, ёшлар терма жамоаларига устозлик қилган, Испания термаси ва «Реал»да бош мураббий ассистенти лавозимида фаолият олиб борган.
Тақдирнинг қалтис ҳазилига биноан, Селадес ўзининг янги жамоадаги дебютини «Барселона»га қарши учрашувда йирик (2:5) мағлубият билан нишонлади. Марселино эса айнан шу жамоани 2:1 ҳисобида доғда қолдириб, «Валенсия»ни кубок соҳибига айлантирганди...
МУҲАММАДСОДИҚ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20