Ўтган мавсум «Хаддерсфилд» АПЛни тарк этди. Ёзда жамоа устози Давид Вагнер кетди, унинг ўрнини Ян Зиверт эгаллади. Ушбу мутахассис билан вазият янада ёмонлашди: Чемпионшипнинг сўнгги 6 туридан кейин бир очкога эга «Хаддерсфилд» 23-ўринни эгаллаб турибди. Клуб тезда Зивертни ҳам истеъфога чиқариб, янги мураббийларни таклиф этди. Ҳа, тўғри ўқидингиз - мураббийларни: жамоани Дэнни ва Ник Коули - биргаликда елкама-елка ишлайдиган қадрдон ака-укалар қабул қилиб олишди.

Беш йил аввал улар 9-лига жамоасида ишлаб, бир вақтнинг ўзида мактабда жисмоний тарбиядан дарс беришарди. Илк марта бу мураббийлар ҳақида 2017 йилда гапира бошлашди. Ўшанда Англия кубогида «Линкольн Сити» чорак финалгача чиқиб, «Эмирейтс»да «Арсенал» билан куч синашганди. Бу провинция клубининг 115 йиллик тарихидаги энг ёқимли дамлар эди.

Дэнни Никдан уч ёш катта. Икковлон болаликдан футбол билан шуғулланишган, аммо ярим ҳаваскорлар даражасидан кўтарила олишмаган. У ерда кундалик харажатлар учун етарлича маош ололмайсиз, шу боис Дэнни ва Ник коллежни битиргач, мактабда жисмоний тарбия ўқитувчиси бўлиб ишлай бошлашди. 29 ёшида Дэнни тиззасидаги жароҳат туфайли футболчиликни йиғиштирди. Ўша кезлари у «Конкорд Рейнжерс» (9-дивизион) шарафини ҳимоя қиларди ва клуб унга тезда курсларда ўқиб, жамоага мураббий сифатида қайтишни таклиф қилди. Дэнни клубдагиларга ушбу таклиф учун муносиб миннатдорлик билдирди. «Конкорд» янги мураббий билан беш мавсумдан учтасида юқори лигага кўтарилди, бир нечта кичик кубокларни қўлга киритди ва ўз тарихида илк маротаба Англия кубогининг асосий тўрига йўл олди. Ники эса шу пайт мобайнида акасининг қўл остида ўйнаб, таркибдаги энг яхши футболчилардан бири бўлди. Аммо 2014 йили у ҳам тиззасидан жароҳат олиб, кўп ўтмай Дэннининг ёрдамчисига айланди.

Ака-укаларнинг кейинги клуби «Брейтри Таун» бўлди. Раҳбарият Коулиларнинг олдига аниқ вазифа қўйди: 50 очко тўплаб, 6-лигага тушиб кетмаслик. «Брейтри» 81 очко жам-ғарди ва учинчи ўринни эгаллади - клубнинг 118 йиллик тарихидаги энг яхши натижа. Шу вақт мобайнида, клубни бошқаришдан ташқари, ака-укалар мактабда ҳам иккита лавозимда ишлашди: жисмоний тарбия ўқитувчилари ва спорт ишлари бўйича илмий мудир. Ҳар икки жойга улгуриш учун улар суткада 15 соатдан ишлашди, тонгги тўртда уйғонишди. Бироқ 2016 йили мактабдан кетишларига тўғри келди - уларни нуфузи бў-йича юқорироқ бўлган клуб - «Линкольн Сити»га таклиф қилишди.

«Линкольн» ака-ука Коулилар учун дастлабки профессионал клуб бўлди, лекин улар келишганида жамоа ўзининг энг оғир дамларини бошдан кечираётганди. Клуб стратегияга эга эмасди, Англиянинг бешинчи лигасида зўрға кун кечирарди, ходимлар эса ўз вазифаларига масъулиятсизлик билан ёндашишарди.

Кейинроқ ака-укалар шундай де-йишганди: «Биз келибоқ ҳар бир ходим билан гаплашдик - оддий тамаддихона ишчисидан тортиб, президентгача. «Линкольн»нинг мақсад ва йўналишини англашга уринардик. Суҳбат жараёнида клубнинг оқим бўйлаб сузаётганини тушундик. Беш йил аввал савия бўйича қуйироқ лигага тушиб кетиш сабабли вужудга келган мотам ҳамон давом этаётганди. Биз дарҳол «reset» тугмасини босдик».

Дастлабки мавсумдаёқ Коулилар Миллий лигада (Англиянинг бешинчи дивизиони) ғолиб чиқишди ва бутун мамлакат эътиборини ўзларига қаратишди: кубок баҳсларида «Брайтон» ва «Бернли»ни енгишди ва чорак финалда кутилганидек «Ар-сенал»­га имкониятни бой беришди.

Ўйиндан кейин Арсен Венгер ака-укаларни ўз хонасига таклиф қилди ва улар бир соат мобайнида суҳбатлашишди. Дэнни ўша учрашув ҳақида шундай деганди: «У футбол ҳақида жуда эҳтирос билан гапирарди. Ундан кўп янгиликларни эшитдик. Венгер - ҳақиқий моҳир».

Кейинги мавсумда «Линкольн Сити» Футбол лигаси (Англияда нуфуз бўйича учинчи кубок. Ушбу турнирда учинчи ва тўртинчи дивизиондан жами 48та клуб қатнашади) бош совринини қўлга киритди. Яна бир мавсумдан кейин эса - Лига 2да биринчи ўрин ва учинчи дивизион йўлланмасига эга бўлди. «Линкольн» бу ерда 20 йилдан буён қатнашмаётганди.

Янги мавсум ва яна ажойиб кўрсаткичлар:

t Лига 1 доирасидаги дастлабки учта ўйиннинг барчасида ғалаба (1989|1990 йиллар мавсумидан буён илк марта).

t Учта турдан кейин турнир жадвалида биринчи ўрин.

t Тўққизта гол урилди, бирорта ҳам тўп ўтказилмади.

t Футбол лига кубоги мусобақасидан «Хаддерсфилд» чиқариб юборилди. Бир ойдан кейин Коулиларни айнан шу клубга таклиф қилишди.

t Дэнни ва Ник турлича маош олишади (Дэнни кўпроқ топади, чунки у доим юқорироқ лавозимда туради), аммо маошни тенг бўлишади. «Маошимиз ҳар хил, аммо уни йўналтирадиган жойимиз бир, шу боис топганимизни тенг бўламиз», - дейди ака.

t Дэнни - Никидан фарқли ўлароқ, нисбатан мулойим ва сергап. Шу боис, футболчилар билан гаплашишда уларнинг роли турлича. «Ўйинчиларга бироз ҳазил-мутойиба ва енгиллик керак. Дэнни уларга шуни бера олади», - дейди Ники.

t Дэннининг ўзи футболчиларга бундай муносабат билдиришига бобосининг таъсири бўлганини таъкидлайди: «Фарзандли бўлишимга яқин бобом мен ва рафиқамга шундай деганди: «Бир пайтнинг ўзида болалардан ранжимаяпсизми, шуни англашга урининглар. Дардларини айтишлари учун бирингиз уларга елка тутиб туришингиз керак». Футболчилар - бу катта болакайлар, шундай эмасми? Айнан шу принцип Ники иккимизнинг ишимизда ҳам, оилада ҳам асқотяпти».

t «Линкольн»да ака-ука рақибни ўрганиш учун 12 соатдан кам вақт сарф­лашмасди - бешинчи лига жамоаси учун катта муддат. Бундай иш кўлами клуб ходимлари ва ишқибозларни лол қолдирарди: «Грэм Тейлордан кейин Дэнни ва Ники сингари ишлаганларни кўрмагандим. Улар иш устида 20 соатлаб ўтиришлари мумкин. Ҳатто дам олиш кунлари ҳам шундай!» - деганди «Линкольн»га 60 йилдан буён мухлислик қилаётган Крис Эштон.

t Ака-ука рақамлар ва статистикани астойдил ўрганишади. Ҳатто энг қуйи лигаларда ҳам улар футболчиларнинг тезланишлари сони, узатмалар сифати ва тўпни йўқотганидан сўнг уни қайтариб олишга қанча вақт сарф­лашини ҳисоблаб чиқишарди.

t Айрим ўйин принципларини Коулилар спортнинг бошқа турларидан олишади. Дэнни баскетбол баҳсларини таҳлил қилиш орқали кўп нарсани тушунганини таъкидлаганди: «Биз амалга оширадиган аксарият аут ва бурчак тўплари баскетбол ҳаракатларидан намунадир. «Бернли»га бурчак зарбасидан урилган гол бунга яққол мисол. Ўйинчилар бир неча марта тезланишларни амалга оширишди ва керакли бўшлиқни яратиб, сўнг рақиб дарвозасини ишғол қилишди».

Биз «Линкольн»нинг ўйинларини кўрмаганмиз, аммо бизнинг ўрнимизга бу ишни Total Football Analysis сайтидаги англиялик ҳамкасбларимиз амалга оширишди. Улар Коулилар бошқарувидаги «Линкольн»нинг тактик вазифатларини ипидан-игнасигача сарҳисоб қилишди. Кўпинча «Линкольн» 4-4-1-1 ҳамда 4-2-3-1 схемасида ўйнаган. Коулилар жамоаси индивидуал фалсафага даъвогарлик қилмаган ва рақибдан келиб чиқиб ўйнашни маъқул кўрган. Шунингдек, схема ва кўрсатмалар ўйинчилар ва майдон сифатидан келиб чиққан. «Линкольн» турлича ўйин кўрсатарди: бир қарасангиз, ҳужумлар дарвозабон орқали бошланиб, ҳимояда майда паслар билан ўйнаса, бошқа сафар тўпни ҳужумчи томон тез-тез йўналтирарди.

«Линкольн» ўйинида деярли ҳеч қачон ўзгармаган иккита муҳим деталь бор - жамоа ҳар доим кучли прессинг ишлатган ва тўпсиз тартибли ўйнаган. Коулилар жамоасининг ўйини уюшқоқлик ва юқори темп ҳисобига қурилган.

«Хаддерсфилд»дан таклиф тушганидан кейин Дэнни таассуротлари билан ўртоқлашди: «Ники иккимиз учун «Хаддерсфилд»да ишлаш эртакдек гап, буни яширмаймиз. Фаолиятимизни 9-лигада бошлаганмиз, тасаввур қиляпсизми? Футболдаги мўъжизаларга ишониш керак. Биз ишондик ва улар содир бўляпти. Бизга янги чақирувлар керак. Мен яшаб, курашишни хоҳлайман. «Линкольн»да қолиш хавфсизроқ эди, бу клубни яхши кўрамиз, унга алоқадорлигимизни сезамиз, лекин бизни оддий вазифалар қониқтирмайди. Ҳар доим ўзимизни синаб кўришни истаймиз. Қийинчиликлар билан юзма-юз келиш - айнан шу менинг ҳаётимдир. Худди шу нарсани сабрсизлик билан кутяпман. Гарчи «Хаддерсфилд» ҳозир мураккаб даврни бошдан кечираётган бўлсада, ушбу клубга ўтишни идеал имконият сифатида баҳолаяпмиз. Ники билан биргаликда ишлашга ўрганиб қолганмиз. Ҳатто кўп ҳолларда битта гапни иккимиз бир вақтнинг ўзида гапириб юборамиз. Биздаги кўникмалар турлича, турфа хил персонажлармиз, аммо ҳамиша бир томонга қараймиз. Бизнинг дастлабки вазифамиз - футболчилар, раҳбарият, ходимлар ва мухлислар билан суҳбатни йўлга қўйиш. Оддий инсондек гаплашмай туриб жамоани ижобийлик сари етаклаш мушкул. Бизнинг принципимиз шунақа. Асосийси - биз футболнинг телбанамо оламига ишонамиз. Акс ҳолда, ҳозир бу ерда бўлмасдик».

А.АБДУВАЛИХЎЖАЕВ тайёрлади