Криштиану Роналдунинг бир ўзи оладиган маош миқдори «А» серияда иштирок этаётган 4та жамоасига тегишли жами иш ҳақи тўловидан кўпроқ. Қойилмисиз? Айтиш керак, Италияда маош тўлови суммаси рекорд даражага етди. La Gazzetta dello Sport яқинда «А» серия клубларининг маош тўлови юзасидан олиб борган ҳар йиллик «тафтиш-таҳлил»лар натижасини эълон қилди. Криштиану Роналдунинг бир йил олдин Италияга кўчиб ўтгани «А» серия маош жамғармаси кескин ошишига олиб келди. Асосан португалияликка белгиланган катта иш ҳақи ҳисобига жами тўлов суммаси 1,129 миллиард еврога етди. Бу 2017 йилги кўрсаткичга нисбатан 200 миллион, мавсум-2011Ғ2012да қайд этилган аввалги рекорд натижадан эса 29 «лимон» кўпдир. Хуллас, 2019 йилга келиб, рекорд янгиланди.

Энди «А» серия маош тўловига оид айрим факилар билан танишиб чиқамиз. Таъкидлаш керак, кўрсаткичларда клублар чекига тушадиган базавий маош, бонус ва солиқ тўлови ҳисобга олинган.

1. 1,36 миллиард евро - бу Италия чемпионати тарихидаги энг юқори кўрсаткич.

2. «Ювентус» маош харажатига ҳаммадан кўп ажратмоқда - 294 миллион евро. 2-ўриндаги «Интер» ўз футболчиларига бундан нақ 2 баравардан ҳам камроқ тўламоқда - 139 миллион евро.

3. «А» сериянинг энг кўп маош олувчи футболчиси — Криштиану Роналду. «Ювентус» юлдузининг бир мавсумлик улуши 31 миллион еврога тенг (ҳафтасига - 600 минг евро). Бу сумма чемпионатда қатнашаётган 4та жамоанинг жами маош тўловидан ҳам кўп. Қисқаси, «Удинезе», СПАЛ (30 миллиондан), «Брешия» (28 миллион) ва «Верона» (25 миллион) клубларининг барча футболчилари биргаликда роналдудан камроқ маош олишади.

4. Футболчилар орасида 2-ўрин Маттейс де Лигтга тегишли. Устамон агент Мино Райола 20 ёшли мижози 12 миллион евро миқдорида маош олишини таъминлади: 8 «лимон» расман кўрсатилган иш ҳақи + 4 «лимон» турли бонус тўловлари.

5. Криштиану Роналду ва Маттейс де Лигтдан ташқари, яна 11 нафар футболчи (8 нафари «Ювентус»дан) йилига 6 миллион евро ёки кўпроқ олади. Булар - Ромелу Лукаку (7,5 млн. Қ 1,5 млн.), Гонсало Игуаин (7,5 млн.), Пауло Дибала (7,3 млн.), Адриен Рабьо (7 млн. Қ 2 млн.), Аарон Рэмзи (7 млн.), Миралем Пьянич (6,5 млн.), Дуглас Коста, Марио Манжукич, Сами Хедира, Жанлуижи Доннарумма ва Калиду Кулибали (6 миллиондан).

6. «Интер» маош тўлови рўйхатини клубнинг 3 нафар янги футболчиси бошқариб турибди: Ромелу Лукаку (7,5 млн. + 1,5 млн.), Диего Годин (5 млн. + 1 млн.) ва Алексис Санчес (5 млн.).

7. «А» сериянинг ўтган мавсумдаги энг яхши тўпурари Фабио Квальярелла «Сампдория»да йилига атиги 1,2 млн. евро олади.

8. Энг катта маошга эга футболчиларнинг рамзий терма жамоаси: Жанлуижи Доннарумма — Маттейс де Лигт, Леонардо Бонуччи, Калиду Кулибали — Алексис Санчес, Аарон Рэмзи, Адриен Рабьо, Дуглас Коста — Пауло Дибала, Ромелу Лукаку, Криштиану Роналду.

«А» серия клубларининг маош тўлови

- «Ювентус»нинг маош тўлови ўтган мавсумга нисбатан 75 миллион еврога кўпайди. Ўсиш даражаси - деярли 33 фоиз.

- «Ювентус»нинг маош бобидаги харажати 2-3-кўрсаткич соҳиблари - «Интер» ва «Рома»нинг жами тўловидан ҳам кўп.

- «Ювентус» энг камтарин маош тўловига эга «Верона»дан нақ 12 баравар кўп тўлайди.

- «А» серияда ишлаётган 11 нафар бош мураббий ўз жамоасида энг кўп ҳақ оладиган 3 киши қаторидадир. Жумладан, «Интер», «Торино», «Болонья», «Сампдория», «Аталанта» ва «Сассуоло» жамоаларида энг катта маош айнан бош мураббийга тегишли.

- «Удинезе»да бирор футболчи ёки ходим маоши 1 миллион евродан кўп эмас. Жамоа бу масалада «А» сериянинг ягона иштирокчисидир.

- «Наполи» маош бериш бобида ўз тарихида илк марта 100 миллион евролик маррага етди.

- «Рома» маош тўловини мавсум-2018Ғ2019га нисбатан бирданига 25 фоиз оширди.

- 10 клуб («Фиорентина», «Сампдория», «Аталанта», «Парма», «Сассуоло», «Верона», «Брешия», «Лечче», «Удинезе» и СПАЛ) ўз футболчилари маошига биргина «Ювентус» билан тенг миқдорда маблағ ажратмоқда.

«А» сериянинг энг кўп маош олувчи футболчилари

- 6 миллион евро ёки кўпроқ маош олаётган 13 нафар футболичидан 10 нафари «Ювентус»да ўйнамоқда.

- Криштиану Роналду  рейтинг бўйича 2-ўринда турган клубдоши Маттейс де Лигтдан деярли 4 баравар кўп маош олмоқда.

- Жанлуиджи Доннарумма энг катта маошга эга 13 нафар футболчи орасида ягона италияликдир.

- Карло Пинсолио (учинчи рақамли дарвозабон) «Ювентус»да 1 миллион евродан кам маош оладиган ягона футболчидир. «Кекса синьора» сафига қайтган Жанлуижи Буффон эса 1,5 миллион еврога тенг иш ҳақи билан Карлодан бир поғона олдинда.

«А» серия клублари бош мураббийлари маоши

- Антонио Контенинг йиллик иш ҳақи Карло Анчелотти ва Маурицио Саррига тегишли жами суммадан ҳам кўп.

- «А» серияда ишлаётган 7 нафар бош мураббийнинг маоши 1 миллион еврога ҳам етмайди.

- Биргина Антонио Конте маош бобидаги рейтингда 11-20-қаторлардан жой олган 10 нафар ҳамкасбининг жами иш ҳақидан кўпроқ маошга эга.