Газетамизнинг аввалги сонларида Павел Бугало билан уюштирилган суҳбатни эътиборингизга ҳавола этгандик. Диққат билан разм солган бўлсангиз, унда собиқ кипер «Динамо» (Самарқанд) жамоа­си ва МТЖдаги ажо­йиб ўйинлари билан танилган Евгений Сафонов ҳақида алоҳида тўхталиб ўтган, унинг фаолиятига муносабат билдирганди. Мазкур интервьюдан сўнг, мухлисларнинг талаб ва таклифларига биноан, ҳозир Россияда истиқомат қилаётган Сафонов билан суҳбат ташкил этиш истаги туғилди. Шу боис, Женя билан боғланиб, барчани қизиқтирган саволларга атрофлича жавоб олдик.

- Салом, Евгений. Сизни Ўзбекистонда барча футбол ихлосманд­лари ҳурмат қилишади. Шундай экан, ҳозирда нималар билан банд эканлигингиз кўпчиликни қизиқтиради.

- Эътибор учун катта раҳмат. Футболчилик фаолиятимни якунлагач, тадбиркорлик фаолиятимни бошладим. Ўзимни бегона соҳада синаб кўриш варианти пайдо бўлди. Кичик бизнесим бор, шу орқали кун кечир­япман.

- Ўзбекистонга охирги марта қачон келдингиз? Юртимизда диққатга сазовор ўзгаришлар талайгина.

- Ўзбекистонга, аниқроғи, Тошкент­га сўнгги бор 2013 йили ташриф буюрдим. Ўшандаёқ сезгандим, кўп нарсалар ўзгаришини. Хусусан, Ўзбекистон миллий жамоаси Бразилиядаги жаҳон чемпионатига жуда яқин келган, фақат иккита гол етишмаганди.

- Наҳотки, футбол билан буткул хайрлашган бўлсангиз?

- Йўқ. Сиз ўйлаган даражада футболни бир четга суриб қўймаганман. Ўз ҳудудимдаги фахрийлар жамоаси билан йиғилиб, ёшларга мастер-класс ўтамиз. Билганларимизни уларга ўргатишдан чарчамаймиз.

- Ўзбек футболидаги ислоҳотлардан хабарингиз борми? Хусусан, Равшан Эрматов ҳозир Ўзбекистон футбол ассоциациясининг биринчи вице-президенти, Андрей Канчельскис «Навбаҳор»да, Шота Арвеладзе «Пахтакор»да...

- Бу жуда қувонарли хабар мен учун. Айниқса, Равшан Эрматов учун хурсандман. Айнан унинг саъй-ҳаракатлари эвазига жаҳон чемпионатига йўлланма олишингизни тахмин қилиш мумкин. У ўз ишини сидқидилдан бажаради, қилаётган вазифасини севадиган инсон. Унга келгусидаги ишларига омад ва ривож тилайман. Канчельскис тажрибали ва халқаро билимга эга, Арвеладзега эса ортиқча таъриф беришнинг ҳожати йўқ.

- Терма жамоамиз сафида жаҳон чемпионати саралаш баҳсларида иштирок этган футболчи сифатида айтинг-чи, қачон биз мундиалга борамиз?

- Ишонасизми, ҳамон Ўзбекистон миллий жамоасининг жаҳон чемпионатида иштирок этишини хоҳлайман. Чунки озми-кўпми шу юрт термасида тўп суриб, танилдим. Шундай экан, мен ўзбек футболи тақдирига бефарқ бўлолмайман.

- Нима деб ўйлайсиз, бизга нима етишмаяпти? Омадни ўртага қўшмаган ҳолда...

- Рости, билмадим. Унинг сабабларига киришиш керак, ички чемпионатнинг аҳволи ва Осиёдаги термаларнинг қайси услубда ўйнаётганини ўрганиб иш кўриш мақсадга мувофиқ бўлади. Лекин бу муаммо тез орада ўз ечимини топади. Чунки Ўзбекистонда болалар футболига эътибор анча ошди. Замонавий академиялар, спорт мактаблари қурилди.

- Шу пайтгача Ўзбекистон миллий жамоасини кўплаб хорижлик мураббийлар бошқаришди. Владимир Сальков, Юрген Гёде, Боб Хоутон, Валерий Непомняший... Улар термага нима беришди ва бизга нимани мерос қолдиришди?

- Ҳар бири ўз билим ва салоҳиятидан келиб чиқиб нимадир бера олди. Ҳар нарсанинг яхши ва ёмон тарафи бор. Боб Хоутон тўрт кун ичида терма жамоани Қувайт билан ўйинга тайёрлаганди. Биринчи бўлимдан сўнг 0:2 ҳисобида мағлубиятга учраётган пайтда у керакли гапларни айта олган ва биз шу куни 3:2 ҳисобида ғалаба қозонганмиз.

- Владимир Маминов, Олег Пашининларнинг бизга фойдалари тегдими?

- Бу икки футболчи Москванинг «Локомотив» жамоасида алиштириб бўлмас ўйинчи бўлишган. Маминов марказда Қосимов билан тандем ҳосил қиларди, ҳужумларга эса Максим Шацких ажойиб нуқта қўярди. Поляковнинг танилишида ҳам Ўзбекистоннинг ўрни беқиёс.

- Ўзбекистоннинг Фаластинга мағлуб бўлишини кутилмаган ҳодисага йўйиш мумкинми?

- Ҳозир футболни ҳамма ўзлаштириб олган. Хатолар устида ишлаш зарур. Масалан, Қозоғистон терма жамоасининг Шотландияни мағлуб этиши ёки Арманистоннинг боснияликларга мағлуб бўлиши - булар ҳам сенсациями?

- Эктор Купер ҳар қандай ҳолатда ҳам ўзи билган прагматик футболни қўллайверди, ўйинни орқадан бошлаш миллий термамизга хосми?

- Ҳар бир мураббийнинг ўз услуби бор. Ўзбекистон миллий термаси азалдан ҳужумкор ўйин кўрсатиб келган. Фақат Жанубий Корея ёки Япония сингари рақиблар билан ўйин­ларда ҳимояга эътибор қаратганимиз рост.

- Сиз билан бирга тўп сурган футболчилардан иборат рамзий терма жамоа тузиб кўринг-чи.

- Павел Бугало, Андрей Фёдоров, Бахтиёр Ашурматов, Асрор Алиқулов, Николай Ширшов, Андрей Акопянц, Миржалол Қосимов, Сервер Жепаров, Виктор Карпенко, Максим Шацких, Александр Гейнрих.


А.ИСКАНДАРОВ суҳбатлашди.