Зайниддин Зидан ўлчовидаги «қолип»га мос келмай қолган испаниялик ярим ҳимоячи Дани Себальос «Қироллик клуби» билан бутунлай хайрлашишни истамади, шекилли, «Арсенал»да ижара шартномасини ўташга рози бўлди. Ҳозирча унинг ишлари чакки эмас. Дани яқинда The Guardian нашрига интервью бериб, «Реал» ва «Арсенал» ўртасидаги фарқли жиҳатлар, Унаи Эмери билан ўзаро муносабати ва туманли ўлкадаги фаолиятига тўхталди. Себальоснинг АПЛ доирасидаги дастлабки ўйинларда 2та самарали узатмага муаллифлик қилиб, мухлислар меҳрини қозонишга улгурганини алоҳида таъкидлаш керак.

«Мадрид» ва «Арсенал» ўртасидаги тафовут

- Лондон, АПЛ ва «Арсенал»ни бирдек ёқтириб қолдим. Чиндан ҳам, шундай ажойиб жамоанинг бир бўлагига айланганим билан фахрланаман. «Мадрид» ва «Арсенал» ўртасида айтарли фарқ йўқдек. Дейлик, бу ерда ҳам мухлислар ўта самимий, ўйинчиларга ҳурмат билан қарашади. Шунинг учун жамоа муҳитига кўникиш нисбатан осон. «Арсенал»га келган футболчи ўзини айнан шу клубда улғайгандек сезади. Демоқчиманки, жамоада ички муносабат жуда зўр. Хусусан, клубда менга катта ишонч бағишлашди.

Зайниддин Зидан қарори

- Воқеликка холис баҳо бериш лозим. Мана, «Арсенал» таркибига қўшилиб, яхши ўйинлар ўтказдим. «Мадрид»да эса 2 йилда ҳам бунга эришолмагандим. Қисқаси, «Реал»да кўп ўйнамадим, ўйнаганда эса, кучим етганича эмас. Бу аввало, ишончга боғлиқ - футболчи ўзига нисбатан талабчанликни асло сусайтирмаслиги керак.

Унаи Эмери истаги

- Эмери мени яхши билади: у хусусиятларим ва ўрганишга чанқоқлигимни тўлиқ намойиш этишимни хоҳлайди. Ҳали ёшман ва футболга ташнаман. «10-рақам» ёки «8-рақам» позициясида бемалол тўп сура оламан, етакчилик масъулиятини ҳам ҳис этаман. Мураккаб вазиятларда ўзимни четга олишни эмас, аксинча, таклиф этишни истайман. Хуллас, ҳамиша «Шу ердаман» қабилида жамоага ёрдам беришни истайман. Ўйин жараёнида кайфиятни туширмаслик муҳим. Зеро, ўз хусусиятларингни қандай кўрсатишинг ҳам, бажараётган ишингдан завқланишинг ҳам айнан кайфиятга боғлиқ.

«Арсенал» услуби

- Жамоамиз тўпга эгалик қилишни хуш кўради. Бу мен учун ҳам айни муддао. Чунки майдонда тўп билан ўзимни эркинроқ ҳис қиламан. Ўйлашимча, мавсумнинг иккинчи ярмида энг яхши спорт формасига чиқсам керак. Тўғри, тўп билан бўлиш ижобий фазилатларимни юзага чиқаради, аммо баъзида позициямни йўқотиб қўйишимни ҳам тан оламан.

 Шахсий тараққиёт

- Маҳоратимни ошириш учун етарли имкониятга эгаман: мавжуд тажрибам эвазига ўзим истаган даражага кўтарилишига ҳам ишонаман. Эмерининг салоҳиятимга мутлақо ишонаётгани иштиёқимни оширяпти. Мураббийнинг ўзи қўнғироқ қилиб, «Арсенал»га ўтишимни, клубда муҳим ўринни эгаллашимни айтганди. Унинг ғоялари маъ-қул тушди. Айтишим жоиз, Эмери иш услуби билан ҳайратлантирмоқда. Қайтараман, футболчи мураббий ишончини сезса, бошқача ўйнайди. Энди ишончни оқласам, бас. Ҳамма қатори футболчиларда ҳам ҳиссиёт бор. Баъзан нохуш ҳолатлар учраб турадики, уларни енгиб ўтиш учун руҳан тетик бўлиш талаб этилади. Ўзгача гапирсам, ёлғончи бўлардим...

Англия чемпионати

- Мураббий сенга ишонаётганини билишинг - муваффақиятнинг 60 фоиз кафолатидир. Чунки мабодо хатога йўл қўйсанг ҳам, у қўллаб-қувватлаши ва руҳингни чўктирмаслигини биласан. Мана, клуб сафига қўшилганимга ҳали кўп бўлгани йўқ. Шунинг учун ҳозирча баралла гапиришим жоиз эмас. Аммо кўрганларимдан шуни айтишим мумкинки, жамоаларнинг жисмоний тайёргарлиги бобида Англия чемпионати энг иззатталаб лига. Ундаги мезонлар ҳам, талаблар ҳам юксак даражада.