«Богемиан» клуби Ирландия миллий чемпионати турнир жадвали 3-поғонасида бормоқда. Бу ўрин еврокубокларга чиқиш имкониятини беради, лекин бронза медалига яна 2та жамоа жиддий даъвогар бўлиб турибди. «Богемиан» яқинда улардан бири - «Дерри Сити» билан ўйнади. Мавсумнинг энг аҳамияти баланд учрашувларидан бирида кучлар тенг келди - 0:0. Эътиборли томони, бу ўйин 14 ёшли Эван Фергюсон дебюти билан ҳам эсда қолди. Ёш болакай охирги дақиқада майдонга тушди.
Ҳа, Ирландияда 14 ёшли бола профессионал даражада дебют қилди. Англиялик матбуотчилар эса дарров Эван Фергюсон шахсига қизиқиб, у ва Лионель Месси ўртасида қизиқарли боғлиқлик борлигини аниқлашди. Эван 2004 йилнинг октябрида туғилган бўлса, Месси бу вақтда «Барселона» сафидаги илк расмий ўйинида майдонга тушган. Аргентиналик даҳо ва янги вундеркиндни ўзаро боғлаб турган ягона жиҳат шу. Тўғри, машҳур фамилия соҳиби Ирландияда анча танилиб улгурган.
Йигитчанинг ўзгача иқтидори ҳақида илк марта ёзда баралла гапира бошладилар. Ўшанда «Богемиан» ва «Челси» клублари ўзаро ўртоқлик ўйини ўтказди. Фрэнк Лэмпарднинг «аристократлар» бош мураббийи ролидаги илк ўйини 1:1 ҳисобида тугади, 14 ёшли Эван эса қанот орқали бир неча чиройли юришни амалга ошириб, жамоасининг ҳужум ҳаракатларини анча жонлантирди. Хуллас, Эван стадион трибуналарида ўтирган барча яқинларининг тинимсиз қўллаб-қувватлашларидан илҳомланиб, «Челси» таркибидаги тажрибали ҳимоячиларни роса қийнаб қўйди. Учрашувдан кейин футболчилар ҳам, «Богемиан» мураббийлари ҳам йигитча ҳақида алоҳида гапиришди. «Эван - юқори талабларга тўлиқ жавоб берадиган ёш ўйинчи. Ҳозирдан Англия Премьер-лигасининг кўплаб клублари унга кучли қизиқиш билан қарамоқда. Эваннинг отаси - Барри бир неча йил Ирландия лигасида «Лонгфорд» ва бошқа клублар шарафини ҳимоя қилган. Шундай экан, футбол болакайнинг қонида бор», - деди «Богемиан» устози Кейт Лонг ёш шогирди ҳақида. Айтганча, «Челси» дарвозаси ишғол қилинган ҳужумда Фергюсон ҳам иштирок этди. Тўғрироғи, йигитча тўпни қулай имконият ҳосил қилган жамоадошига ўтказиб юборган ва у осонлик билан гол урганди.
Фергюсон St Kevin~s Boys спорт мактабида таҳсил олган. Айтиш жоиз, вақтида АПЛда ҳам йўқолиб қолмаган Жефф Хендрик ва Робби Брэди айни шу даргоҳда шуғулланишган. Умуман, Фергюсон ҳозирнинг ўзида Англиянинг бир қатор кучли клублари тинчини бузишга улгурди. Жумладан, «Ливерпул»нинг скаутлик хизмати ирландиялик вундеркиндни диққат билан кузатмоқда. «Брайтон» эса «Челси»га қарши ўша ўйиндан кейиноқ уни ўз машғулотларига таклиф қилди. Ирландияликлар Эван маҳаллий чемпионатда узоқ вақт қолмаслигини яхши тушуниб туришибди. Қўшимча қилиш ўринли, у гавда тузилиши ва жисмоний кўрсаткичлари билан 14 ёшли болакайга сира ўхшамайди. Қолаверса, йигитчада «Богемиан»нинг кейинги ўйинларида кўпроқ ўйнаш учун яхшигина имконият бор. Ҳар ҳолда, жамоанинг бирданига 7 нафар асосий футболчиси жароҳат туфайли сафдан чиққан. Бош мураббий эса улар ўрнига асосан ёшларни майдонга туширишга мажбур. Дейлик, «Дерри» билан баҳсда Фергюсондан ташқари, яна 3 нафар 20 ёшдан кичик футболчига имконият берди. «Ҳа, ҳозирги ҳолатда жамоамиз учун натижа жуда муҳим, бироқ ёш йигитларнинг ўйини келажакка катта умид боғлашимиз мумкинлигини кўрсатмоқда» - «Богемиан» мураббийи Кейт Лонг ҳаттоки, шундай мураккаб ҳолат (ахир 7 нафар шогирди хизматидан фойдаланолмаяпти)да ҳам мутлақо хотиржам.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20