Халқаро футбол федерацияси (ФИФА) қўмиталаридан бири футболчилар ижараси ва агентларга бериладиган тўловларни қисқартириш ғоясини қўллаб-қувватлади. Гап трансфер бозоридаги компенсация миқдорини кескин камайтириш ва ўйинчиларнинг вақтинчалик ўтишларига лимит қўйиш ҳақида бормоқда.
Принципиал қарор
Жаҳон футболида тез орада жиддий ташкилий ўзгаришлар рўй бериши кутилмоқда. 25 сентябрь куни ФИФАнинг спорт соҳаси бўйича манфаатдор томонлар қўмитаси аъзолари агентларга ажратиладиган тўловлар, шунингдек, мавсум давомида ижара билан боғлиқ трансферларга лимит қўллаш бўйича ташкилот кенгашига тавсия бериш бўйича қарор қабул қилишди.
Юқорида таъкидланганидек, Мазкур ўзгаришлар бутун дунёга тегишли бўлади ва ФИФАнинг 24 октябрь куни ўтадиган кенгаш йиғилишида тасдиқланиши мумкин.
Биринчи навбатда, жаҳон футболидаги «босс»ларга трансфер бозорида клублар ва «даллоллар» ўртасидаги молиявий оқимни қатъий назоратга олиш тавсия қилинди.
Гап агентларга тўланадиган пуллар ҳақида бормоқда. Уларга келишувдаги расмий сумманинг 10 фоизи ва футболчи маошининг 3 фоизидан кўп бўлмаган сумма тўланиши мақсадга мувофиқ деб ҳисобланмоқда. Ўша 3 фоиз янги футболчининг трансфер ҳуқуқини сотиб олаётган клуб вакиллари учун мукофот бўлади. Бундан ташқари, трансфер жараёни қатнашчиларининг сонини минимал даражагача камайтириш таклиф этилди. Бир футболчи билан бир нечта агентларнинг ишлашига йўл қўйилмайди.
Янги ғоялар жамоалар таркибини шакллантириш принципларига ҳам тааллуқли бўлади. Дейлик, кейинги мавсумдан клуб раҳбарлари футболчиларнинг ижара келишувларига жиддийроқ ёндашишларига тўғри келади.
Янги қоидалар лойиҳасига кўра, бир мавсум давомида бошқа чемпионатга кўпи билан 8 нафар ўйинчини бериш мумкин бўлади. Яна бир йилдан кейин, мавсум-2022|2023дан бу каби ўтишлар сони 6тагача туширилади. Мазкур ҳолатда бир хил клублар ўртасидаги ижара келишув сони ҳар бир томон учун учтадан ошмаслиги белгиланади.
Ижара бўйича чеклов чоралари 22 ёш ва ундан катта бўлган футболчилар учун қўлланади.
ФИФА бундан қандай мақсад кўзлаган?
Трансферларни янада шаффоф қилиш ғояси шахсан ФИФА президенти Жанни Инфантинонинг ташаббуси ҳисобланади. Функционер УЕФАда ишлаб юрган кезларидаёқ амалдаги моделни кескин танқид қилганди, 2016 йилги сайловларда ғолиб чиққанидан кейин эса жараённи ўз назоратига олди.
«Буни амалга оширишимиз керак, қандайдир қарорлар чиқаришимиз лозим. Трансферларни шаффоф ва соф қилишимиз даркор. Ишлаётган ҳар бир киши даромад орттириш ҳуқуқига эга. Бу жуда тўғри. Аммо мазкур юмуш назорат остида ўтиши мақсадга мувофиқ. Вазиятни назоратимиз остига олишимиз зарур, зеро гап футбол имиджи ҳақида бормоқда», - деганди Инфантино 2017 йилнинг ноябрида.
Кейинчалик ФИФА раҳбари бу каби назоратдан кўзланган мақсад турнирлар яхлитлигини сақлаш ва жаҳон чемпионатларига тоза рақобат кураши принципини қайтариш эканлигини таъкидлади. Шундагина мусобақалар соядаги агентлар ва рақиблар бюджетига боғлиқ бўлиб қолмайди.
Трансфер ижараларига лимит қўлланилишига келсак, бу чорани қўллашдан мақсад - жаҳон футболининг айрим грандлари мавсумлар оралиғида бошқа клубларга бир неча ўнлаб футболчиларни қўйиб юборишларига чек қўйиш.
Бу борада бир неча йиллардан буён 30 нафарга яқин футболчисини бошқа жамоаларга тажриба орттириш учун жўнатаётган Лондоннинг «Челси» клубини мисол келтириш мумкин.
Вақт ўтгани сари агентлар ишидаги янги фоиз ставкалари ҳам ўз сўзини айтади. ФИФА молиявий ҳисоб-китобларнинг бутун бошли тизимини нафақат футболдаги айрим раҳбарлар, балки ўйиннинг оддий ихлосмандлари учун ҳам тўлиқ шаффоф ҳолга келтирмоқчи.
Агентларга тўланадиган фоизларнинг камайтирилиши ФИФАга шубҳага сабаб бўладиган қимматбаҳо келишувларни кузатишда ёрдам беради, қолаверса, аста-секин халқаро федерация футболчилар маошини ҳисоб-китоб қилиш билан шуғулланишни ҳам режалаштирмоқда. Узоқ муддатли режаларда клубларнинг реал даромади ва футболчиларнинг маошлари миқдори ўртасидаги ўзаро боғлиқликни таъминлайдиган лойиҳани йўлга қўйиш ҳам бор.
А.ИСРОИЛХОНОВ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20