Франция чемпионатининг янги мавсуми бошланганига кўп бўлмади, томошабинлар янги номларга энди кўникишмоқда. Масалан, «ПСЖ»дек грандни енгган «Ренн»да ёрқин ўйинлар кўрсатаётган Эдуарду Камавингага.

Камавинга 41та пас узатди ва 98 фоиз аниқлик кўрсаткичи билан бемалол мақтанса бўлаверади. У Лига 1да ўз ҳисобига самарали узатма ёзиб қўйган энг ёш футболчи бўлди. Аслида, ушбу ярим ҳимоячининг дебюти ўтган мавсум якунига тўғри келганди - ўшанда у 16 ёшу 4 ойлик эди. Шон-шуҳрат сари эндигина қадам қўяётган навқирон йигит учун ажо-йиб ибтидо.

2005 йили Лига 1да 16 ёшли 19 нафар футболчи дебютини нишонлаганди. Келинг, ҳозир уларнинг фаолиятига батафсил тўхталамизда, Камавинганинг муваффақиятга эришиш эҳтимолини чамалаймиз.

Ушбу 19 вундеркинддан уч нафари ўзларини сўнгги икки мавсумда кўрсатишга эришишди - бу Пьетро Пеллегри, Виллем Жеббель ва Педру Бражау. Ҳозирча уларга эътибор қаратмаймиз - ҳали жуда эрта.

Альберт Рафетраниана «Ницца»да 2012 йили дебют қилган - ўшанда у 16 ёшу 27 кунлик эди. 2005 йилдан буён лигада дебютини нишонлаган энг ёш футболчи. Аммо ке-йинги етти йил ичида у 27та ўйинда қатнашиб, битта самарали тўп узатгани ҳолда, бирорта ҳам гол уролмайди. Ҳозир у «Ницца» захира жамоаси аъзоси, айни пайт 22 ёшда.

Нил Мопе буни яхшироқ уддалади. У ҳам «Ницца»да 2012 йили илк ўйинини ўтказган - Рафетраниандан бир ой аввал. Француз 53та ўйинда 9та гол урди, сўнгра «Сент-Этьен» сафига қўшилди. Бу клубда ўз ҳисобига 23та ўйинда 3та гол ёздирди ва кейинчалик «Брест» либосини кийди. Мазкур жамоада 30та учрашувда 11та гол уриш орқали инглизлар эътиборини ўзига қаратди. «Брентфорд» таркибига қўшилгач, фаолияти давомидаги энг яхши кетма-кетликни намойиш этди: 95та баҳсда майдонга тушиб, ҳисобига 41та гол ва 14та «ассист» ёздирди. Ўтган мавсум охирида у Чемпионшипда «Йил футболчиси» номини қўлга киритди. Натижада, августда 20 млн. фунт эвазига «Брайтон» билан шартнома тузганини оддий қабул қилиш мумкин. Дастлабки ўйиндаёқ гол урган дебютант учун ҳали ҳаммаси олдинда.

Билол Бутобба «Марсел»да ёрқин дебютантга айланди. Ўшанда у 16 ёшу уч ойлик эди. Аммо бу ерда воқеалар тез ривож олди: унинг профессионал даражадаги учинчи ўйинидан кейиноқ клуб амалдаги шартномани бекор қилди. Ўтган йилнинг сентябрида Билол «Монпелье» футболчиси эди, ушбу клуб сафида атиги иккита ўйин ўтказиб, захирага «михланди». Ҳозир у 20 ёшда, аммо фаолиятидаги оддийлик тўрт йилдан буён давом этмоқда.

Мбайе Ньянг майдонда кўриниш беришни бошлагандаёқ, Франциядаги иқтидорлар орасида энг яхшиси сифатида қабул қилинган, «Кан» эса ўз таркибида бўлажак суперюлдуз борлигига шубҳа қилмаганди. Ньянгнинг дебюти 2011 йилнинг апрелига тўғри келди, ўшанда у 16 ёшу 3 ойлик эди. Француз клуби таркибида Мбайе 30та ўйин ўтказиб, 5та гол урди ва 3 млн. фунт эвазига «Милан» сафини тўлдирди. Аммо «россонери» таркибида ўзини қулай ҳис этолмади ва кейинчалик ижара асосида бошқа жамоаларда тўп сурди. «Монпелье», «Женоа», «Уотфорд», «Торино», мана энди «Ренн» - афтидан, у ҳеч қаерда мустаҳкам ўрнаша олмайдигандек.

«Ньюкасл»ни кучайтирган янги футболчи Аллан Сен-Максимен 2013 йили илк бор Лига 1да тўп сурганида 16 ёшу 5 ойлик эди. Алланнинг иқтидори жуда қисқа муддатда намоён бўлди ва клуб уни сақлаб қолиш қийин бўлишини тушунди. Даставвал, «Монако» таклиф билан чиқди, князликларга рад жавобини бериб бўлмасди, лекин Сен-Максимен янги клубида муваффақиятга эришолмади. Кейинчалик ижара асосида «Ганновер» ва «Бастия»да ўйнагач, «Ницца» сафига қўшилди ва бу жамоада икки йил тўп сурди. Ҳозир эса «Ньюкасл»­да ёмон ўйнамаяпти, «зағизғонлар» уни 20 млн. фунтга сотиб олишган.

Люксембурглик ярим ҳимоячи Венсан Тилль «Метц»даги дебютини 2016 йили, 16 ёшу 7 ойлик пайтида нишонлаганди. Гарчи у ҳали ҳам анча ёш бўлсада, унинг келажагига ишониш қийин. «Метц»да ишлари қовушмаган ўспирин дастлаб «По», кейин эса «Орлеан» таркибида кўриниш берди. Люксембург термасида эса 23та ўйин ўтказиб, 3та гол урди. Унинг ёшини инобатга олсак, ёмон натижа эмас, аммо «қизил арслонлар» даражаси бу кўрсаткичдан ажабланишга имкон бермайди.

Жереми Порсан-Клемант қачонлардир «Марсел»нинг энг ёш футболчиси бўлган: 2014 йили 16 ёшу 8 ойлигида дебютини нишонлаганди. Унинг рекордини, мос равишда, Бутобба янгилади. Порсан-Клемантнинг фаолияти эса боши берк кўчага кириб қолди - у қайси клубга ўтмасин, ҳамма ерда омадсизликка учради. Айни пайт Жереми «Сент-Этьен»да тўп суряпти.

Кингсли Коман «ПСЖ»да 16 ёшу 8 ойлигида дебют қилган. Бошқалардан фарқли ўлароқ, у дарҳол жаҳон грандлари ишончига эришди. Дастлаб «Ювентус»да, кейин эса «Бавария»да тўп суриб, кўплаб совринларни қўлга киритди. Коман шунингдек, Франция термасида 16та ўйин ўтказиб, битта гол урди. Шубҳасиз, бугунги мақола қаҳрамонлари орасида энг катта муваффақиятга эришган футболчилардан бири.

Альбан Ляфон - Лига 1даги энг ёш дарвозабон. 2015 йилнинг ноябрида дебютини нишонлаганида у 16 ёшу 310 кунлик эди. Ляфон «Тулуза» таркибида пайдо бўлганида, жамоа иккинчи дивизионга тушиб кетиш хавфи остида қолганди. 24та «қуруқ» ўйин эвазига бу клуб элитадаги ўрнини сақлаб қолди. 2018 йилнинг июлида Ляфон 7 млн. фунт эвазига «Фиорентина»га ўтди. Мазкур жамоада у 38та ўйин ўтказган бўлсада, мақташга арзигулик натижаларга эришолмади - барқарорлик борасида муаммога йўлиқди. Ўша мавсумнинг ўзидаёқ Альбан ижара асосида «Нант» сафини тўлдирди.

Яна бир ёш дарвозабон Антони Мандреа 16 ёшу 10 ойлик пайтида дебют қилди. 2013 йили «Бордо»га қарши баҳсда «Ницца» дарвозасини айнан шу кипер қўриқлаганди. У Льяфоннинг даражасигача кўтарила олмади, ўшандан буён «Ницца» таркибида фақат бир марта майдонга тушди. 2016 йили «Анже»га ўтган кипер катталар жамоасидан ўрин ола билмади.

Энди рўйхатимиздаги энг машҳур ва муваффақиятли футболчи ҳақида гаплашамиз. Эден Азар 2007 йили «Лилль» сафида дебютини нишонлаганида 16 ёшу 10 ойлик эди. Шундан буён у мазкур клуб либосида 147та ўйин ўтказиб, 36та гол урди, 41та самарали узатма муаллифига айланди. Эден билан бирга «Лилль» «дубль» қайд этди, Азарнинг ўзи эса Лига 1да «Йил ўйинчиси» номига сазовор бўлди - шундай мақомга лойиқ кўрилган энг ёш футболчи.

2012 йили «Челси»га ўтган тезкор вингер АПЛ чемпионлигига эришди, Европа Лигаси бош совринини қўлга киритди, Англия кубогида зафар қучди... Азар 245та ўйинда қатнашиб, жами 146та голнинг урилишида бевосита қатнашди. Яқинда Эден 100 млн. евро эвазига Мадриднинг «Реал» клуби аъзосига айланди.

Азар «Челси»га ўтган бу тоифа дебютантлар орасида ягона эмас. Курт Зума профессионал дебютини 2011 йилнинг сентябрида нишонлаганди. Ўшанда у 16 ёшу 10 ойлик эди. Францияда ўтган кейинги уч йил ичида Зума 51та ўйинда майдонга тушди. Лондонда эса унинг ишлари юришмади - асосий ҳимоячи бўлолмади.

Энди яна ҳужумчиларга қайтамиз. Полен Пюэль 2014 йили «Ницца»да дебют қилганида 16 ёшу 11 ойлик эди. Ушбу клубда 14та ўйин ўтказиб, бирорта ҳам гол уролмади. Қизиғи, ўша кезлари «Ницца»ни унинг отаси Клод бошқарганди. Тасодифми? Унда бўлмаса керак. Ушбу клубдан кетгач, Пюэль «Монако» Б.да, сўнгра учинчи дивизион вакили «Авранш»да тўп сурди. Бу ерда ҳам у маҳаллий юлдузга айланолмади. Поленни келажакда ёрқин фаолият кутаётганига ишониш қийин.

Пьетро Пеллегри Килиан Мбаппенинг рекордини янгилаб, «Монако» тарихидаги энг ёш футболчи бўлди. Умуман, Мбаппенинг муваффақиятини такрорлаш ҳаммага ҳам насиб этавермайди. Килиан 16 ёшдалигидаёқ кўпчилик унга катта ишонч боғлаганди, футболчи эса бу ишончни оқлади.

Серж Орье - рўйхатимиздаги сўнгги футболчи. У ҳам фаолиятидан уялмаса бўлаверади: ивуарлик ҳимоячи «Ланс»да дебют қилганида 16 ёшу 11 ойлик ва 28 кунлик эди. Кўплаб таниқли жамоаларда ўйнади, Чемпионлар Лигасидаги дастлабки қадамларини 2009 йили қўйганди. Орье «Ланс»да 40та ўйин ўтказди, 2012 йили «Тулуза» сафига қўшилди ва 72та ўйинда 8та гол урди. 2014 йили «ПСЖ» таркибига қабул қилинган Серж ке-йинги уч йилни Париж жамоасида ўтказди. Пойтахтда икки марта лига рамзий термасига кирди. 2017 йили «Тоттенхэм» Орьени 23 млн. фунтга сотиб олди.

Мана, Лига 1нинг энг ёш дебютант­ларини кўриб чиқдик. Ҳамманинг натижалари турлича: кимдир омадсизликка учради, кимлардир муваффақиятга эришди. Рўйхатда келтирилганларнинг 14 фоизигина жаҳон даражасидаги футболчиларга айланишди (Мбаппе, Азар). 35 фоизи юлдуз ёки кучли ижрочилар сифатида улғайишди (Коман, Зума, Ляфон). Аммо навқирон дебютантларнинг аксарияти ё бир хил даражада қолиб кетишди ёки ярим профессионаллар даражасига қўшилишди.

Хўш, Камавингага умид боғласа бўладими? Шубҳасиз. Лекин ҳеч ким кафолат беролмайди.

А.ИСРОИЛХОНОВ тайёрлади