Таниқли футбол мутахассиси Алишер Никимбаевнинг «Телеграм»даги «Футболиум» каналида ёзишича, Осиё футбол конфедерацияси ОФК кубоги-2019 финалини Пхеньяндан Шанхай шаҳрига кўчирди. Хўш, нега? «КХДРнинг «25 апрель» ва Ливаннинг «Ал-Аҳад» жамоалари ўртасидаги финал 2 ноябрь куни Пхеньян шаҳрида ўтказилиши керак эди. Бироқ ОФК ҳал қилувчи баҳсни Шанхайга кўчирди. Бунинг бош сабаби - КХДР ҳукуматининг телевизион трансляцияларга тақиқ қўйгани. Эслатиб ўтаман, бир ҳафта муқаддам КХДР томони мамлакат миллий жамоасининг ЖЧ-2022 саралашидан ўрин олган Жанубий Корея термасига қарши ўйинини трансляция қилишга ҳам рухсат бермаганди. Боз устига, бу учрашувга журналистларни қўйишмади, меҳмонлар делегацияси таркиби чекланилди. Бироқ бу ўйиннинг қолдирилишига сабаб бўлолмади. ОФК энди нисбатан қатъийроқ турмоқда. Эҳтимолки, ОФК кубоги финали трансляция ҳуқуқи ўзига тегишли эканлиги учундир... Ҳар ҳолда, трансляция амалга ошмаса, конфедерация маълум даражада зарар кўради. КХДР - Жанубий Корея ўйини трансляция ҳуқуи эса маҳаллий футбол федерациясига тегишли эди. Шундай экан, бу учрашувнинг намойиш этилмаганидан ОФК ҳеч қандай моддий зарарга йўлиқмаган...», - деб ёзди Никимбаев ўз каналида.