Жорий йилги миллий чемпионат баҳслари ҳам аста-секин финишга яқинлашмоқда. Чемпион аниқ - «Пахтакор». Аммо қолган ўринлар учун курашда ҳамон интрига сақланиб турибди. Мавсум бошида ўз олдига юқори мақсад ва вазифаларни қўйган Наманганнинг «Навбаҳор» клуби учун мавсум барқарор ўтмаяпти. Биринчи давра охирида россиялик мутахассис Андрей Канчельскиснинг кутилмаганда ишдан олиниши, унинг ўрнига Деян Журжевичнинг тайинланиши жамоа ўйинига ижобий таъсир қилди, дейиш қийин. Оқибатда бундай ўзгаришлар мухлислар томонидан катта эътирозларга сабаб бўлди. Канчельскиснинг қайтиши эса йўқолиб бораётган ишонч ва футболчилардаги иштиёқнинг қайтишига сабаб бўлди. Яқинда «Навбаҳор» етакчиларидан бири Мирзоҳид Ғофуровдан интервью олиб, унга ушбу мавзуда ҳам саволлар бердик.
- Мирзоҳид, даставвал «Сурхон»га қарши кечган ўйин ҳақида гапирсангиз...
- Ўйин қийин бўлди. Кўряпсиз, биз учун бу йили ҳеч қайси баҳс осон ўтаётгани йўқ. Ғалаба қозонган беллашувларимизда ҳам жиддий қаршиликка дуч келяпмиз. Умуман олганда, рақиблар бизга қарши икки ҳисса куч билан майдонга тушишади. Боз устига, айрим жамоалар ҳимоявий футбол таклиф қилаётгани боис очко ишлаш қийин бўляпти. Энди қолган турларда максимал очколар жамғариб, турнир жадвалидаги ўрнимизни яхшилаб олишимиз зарур. Назарий жиҳатдан кучли учликка кириш имконияти бор. Аммо бу ҳам осон бўлмаслиги аниқ.
- Суперлига-2019 баҳслари сизга нимаси билан манзур бўлмоқда?
- Бу йилги чемпионат анча қизиқарли ва шиддатли кечмоқда. Кўриниб турибдики, кучсиз клубнинг ўзи йўқ. Жумладан, Суперлигага маълум фурсатдан сўнг қўшилган «Андижон» ва «Сурхон», шунингдек, «Динамо» жамоалари яхши ўйин намойиш этишяпти. Тўғри, самарқандликларнинг иккинчи даврада унчалик омадлари келмаяпти. Бироқ чемпионат бошида улар барча клублар учун «чақилмас ёнғоқ»қа айланишганди. Ёдингизда бўлса, 2:2 ҳисобидаги дуранг билан якунланган «Динамо» - «Навбаҳор» қарама-қаршилиги жорий мавсумнинг энг қизиқарли ўйини сифатида эътироф этилганди. Гарчи биринчиликда «Пахтакор» аллақачон чемпионликни қўлга киритиб улгурган бўлсада, кумуш ва бронза медаллари ва элитада «жон» сақлаш учун кураш сўнгги тургача давом этиши эҳтимоли катта. Шундан билса бўладики, Суперлига-2019 кескин курашлар остида давом этмоқда.
- Андрей Канчельскисни ўзбекистонлик мураббийлардан ажратиб турадиган қандайдир жиҳат борми? Унинг қайси фазилатларини юқори баҳолайсиз?
- Андрей Антанасович футболчилик фаолияти давомида кўплаб кучли жамоаларда тўп сурган. Киевнинг «Динамо», Донецкнинг «Шахтёр», Англиянинг «Манчестер Юнайтед», «Эвертон», Шотландиянинг «Глазго Рейнжерс» ҳамда Италиянинг «Фиорентина» клубларида улкан тажриба тўплаган. Валерий Лобановский ва сэр Алекс Фергюсон каби ўз даврининг етук «профессор»ларидан сабоқ олган. Шу омиллар сабаб у жамоага Европа ҳавосини олиб кирди. Машғулотларга ранг-баранглик бағишлади.
- Мураббийни кучли психолог дея таърифласак бўладими? Бир неча учрашувларда кўрдикки, «Навбаҳор» ирода кўрсатиб, қийин вазиятдан чиқиб кетишни уддалади...
- Канчельскис бизга футбол 90 дақиқа давом этишини кўп уқтиради. Учрашувда қандай ҳисоб қайд этилишидан қатъий назар, таблога қарамасликни буюради. Унинг ушбу ўгитлари ҳар сафар самара келтирмоқда. Айниқса, «Пахтакор» билан сафарда 2:0 ҳисобида ортда бораётиб, Тошкентдан бир очко билан қайтишни уддаладик. Қисқаси, Канчельскис ажойиб инсон. У билан келажакда кўплаб ютуқларга эришамиз, деб ўйлайман.
- Ўтган мавсумдаги натижа (3-ўрин)ни яхшилаш клубнинг асосий мақсади эди, бироқ «Навбаҳор» бу йил турнир жадвалининг ўрта поғоналаридан жой олиши эҳтимолдан холи эмас. Сизнингча, жамоага барқарорликка эришиш учун нима етишмади?
- Биринчи навбатда, аксарият учрашувларда омад биздан юз ўгирганини алоҳида таъкидлаб ўтмоқчиман. Чунки кўп ўйинларда хавфли вазиятлар яратиш ва тўпни назорат қилиш бўйича катта ташаббусга эга бўлсакда, улардан самарали фойдалана олмадик ва бу ҳол ҳамон давом этмоқда. Бундан ташқари, мураббийнинг алмашиши ҳам таъсир кўрсатмай қолмади. Канчельскиснинг услубига эндигина мослашаётганимизда, у истеъфога чиқарилиб, ўрнига Деян Журжевич тайинланди. Янги мураббийнинг фалсафасини тушуниш ҳам озмунча вақт талаб қилмасди. Сербиялик мутахассис бошчилигида ўз ўйинимизни намойиш этолмай, совринли ўринлар учун курашда имкониятларимизни пасайтириб юбордик. Нима бўлганда ҳам таслим бўлмай, охиргача курашишни ният қилганмиз.
А.ИСКАНДАРОВ суҳбатлашди
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20