Бу йил хорватиялик Лука Модричнинг ўйини яққол орқага кетди, шунга қарамай, у Golden Foot совринига муносиб кўрилди. Алоҳида таъкидлаш керак, ҳаттоки, Криштиану Роналду ва Лионель Мессининг бой коллекцияларида ҳам бу мукофот йўқ. «Реал» сафидаги митти ярим ҳимоячи ўтган йили деярли барча энг нуфузли индивидуал сов-ринларга эга чиқди, жумладан, «Олтин тўп» ҳам хорватнинг мулкига айланди. Кейин эса Луканинг ўйинида яққол пасайиш кузатилди ва у охирги 26 йил бадалига энг обрўли шахсий соврин соҳиби сифатида кейинги мавсум танловида даъвогарлар рўйхатидан жой ололмаган биринчи футболчи бўлди...
Лука Модричнинг ўйин бобида кескин орқага силжишида бир неча сабаблар бор: кичик жароҳатлар, ёши, чарчоқ, қолаверса, «Реал»нинг пассивлиги. «Тўғриси, шундай мавсум ўтказишни асло ўйлаган эмасдик. Афсуски, бизни ранжитган реалликни бошдан кечирдик», - деди бу борада Модричнинг ўзи. Луканинг шахсий кўрсаткичларига келсак, у жорий мавсум Примеро доирасидаги 7та ўйинда майдонга тушиб, ҳар бирида ўртача ҳисобда атиги 52 дақиқадан тўп сурди. «Олтин тўп»нинг амалдаги соҳиби учун жуда паст статистика. Боз устига, Модрич аввалги мавсум охирида ҳам жуда хира кўринди, худди «Реал» каби. Шуларни назарда тутсак, Golden Foot-2019нинг айнан Модричга топширилгани бироз ғалати. Лекин факт шуки, хорват «чумоли»си махсус овоз бериш жараёнида Криштиану Роналду, Лионель Месси, Роберт Левандовски ва бошқа тан олинган футболчиларни ортда қолдирди. Хорватия терма жамоасининг ЖЧ-2018да финалга қадар етаклаган футболчи 12 ноябрь куни Монте-Карлода ўтказилган тантанавор тақдирлаш маросимида яна бир соврин ютганидан алоҳида ғурурланишини таъкидлади: «Ҳозир чиндан ҳам, жуда бахтиёрман. Негаки, ушбу мукофот олий даражадаги эътироф демакдир. Аввалги йиллар бир қатор буюк ўйин-чилар лауреат бўлишганини биламан. Шундай экан, бу сов-рин менга катта ғурур бағишлайди». «Реал» клуби ва Хорватия миллий жамоасининг ижтимоий тармоқларидаги расмий саҳифаларида тақдирлаш маросимидан олинган кўплаб кадрлар борки, бу ҳам Модричнинг обўсидан далолат.
Golden Foot - обрўли соврин, лекин унинг алоҳида томони бор. Чунончи, мукофотни 28 ёшли ёки ундан катта ўйинчига футболдаги натижалари учун топширишади. Модрич бу шартларга тўғри келади: 34 ёшни уриб қўйган футболчи «Реал» билан Испания чемпионатида ғалаба қозонди, Европа Чемпионлар Лигасида 4 марта шоҳсупага кўтарилди, яна бир қатор турнирларда зафар қучди. Шахсий совринлари орасида эса «Олтин тўп» алоҳида ажралиб туради. Асосийси, Модрич нисбатан камтарин Хорватия термаси билан ЖЧ кумуш медалини қўлга киритди. Шундай экан, митти футболчи фаолияти давомида чиндан ҳам, муносиб натижаларга эришди.
Криштиану Роналду ва Лионель Мессининг ҳали Golden Foot ютишмагани лауреатни аниқлаш форматига боғлиқ бўлса керак. Ҳар ҳолда, ҳар икки юлдуз ҳам бу совринга муносиб ва яқин йиллар ичида лауреатга айланишса, ажабмас. Айтганча, соврин 2003 йили таъсис этилган. Даъвогарлар рўйхатини турли мамлакатлардаги журналистлардан тузилган махсус гуруҳ шакллантиради. Ғолиб эса онлайн-сўров воситасида аниқланади.
Golden Foot: барча лауреатлар
2003 йил - Роберто Баджо (Италия)
2004 йил - Павел Недвед (Чехия)
2005 йил - Андрей Шевченко (Украина)
2006 йил - Роналдо (Бразилия)
2007 йил - Алессандро Дель Пьеро (Италия)
2008 йил - Роберто Карлос (Бразилия)
2009 йил - Роналдиньо (Бразилия)
2010 йил - Франческо Тотти (Италия)
2011 йил - Райан Гиггз (Уэльс)
2012 йил - Златан Ибрагимович (Швеция)
2013 йил - Дидье Дрогба (Кот-д`Ивуар)
2014 йил - Андрес Иньеста (Испания)
2015 йил - Самуэль Это`О (Камерун)
2016 йил - Жанлуижи Буффон (Италия)
2017 йил - Икер Касильяс (Испания)
2018 йил - Эдинсон Кавани (Уругвай)
2019 йил - Лука Модрич (Хорватия)
А.ҲАМИДОВ тайёрлади.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20