Яқинда ОФКнинг махсус комиссияси Тошкентга ташриф буюриб, «Бунёдкор» академиясини кўздан кечирди ва мазкур таълим масканига «икки юлдузли» мақомини бериш масаласи кўриб чиқилиши белгиланди. Мазкур делегация таркибидан Ласло Иштван Салай ҳамда Рашид амир Рашид Саид ал Бадвавий жой олишди. Салай ОФК техник директори муовини ҳамда Ёшлар футболини ривожлантириш бошқармаси бошлиғи ҳисобланса, Саид ал Бадвавий ушбу бошқарма аъзоси саналади. «Бунёдкор» академияси Марказий Осиёда биринчи бўлиб «икки юлдузли» мақомига талабгор бўлди. Яқинда мазкур таълим муассасаси директори Вадим Шодиматов билан суҳбатлашиб, ўзимизни қизиқтирган саволларга жавоб олдик.
- Вадим Шахиржанович, аввало, ОФК вакилларининг ташрифи хусусида гапирсангиз.
- Мазкур ташрифдан кўзланган асосий мақсад клуб қошидаги болалар ва ўсмирлар академиясини баҳолаш ва унга «икки юлдузли» мақомини беришдан иборат эди. Меҳмонлар бизга қадар Баҳрайндаги академияларнинг бирида бўлиб, «уч юлдузли» мақомини бериш юзасидан шарт-шароитлар билан танишишди. Энди ОФК хулосасини кутяпмиз. Делегация вакиллари клубимизнинг техник базаси, ҳужжатлар, мураббийлар штаби билан яқиндан танишишди. Кейин эса Андижонга йўл олишди.
- «Бунёдкор»да витаминлаш тизими қандай йўлга қўйилган? Биламиз, яқинда Жанубий Кореядан соғлиқни сақлаш вазирлиги ходимлари айнан шу масалада ташриф буюришганди.
- Турли йиғинлар, машғулотлар пайтида тарбияланувчиларимиз жароҳатлар олишади. Ўйинлар ва машғулотларни ҳар доим навбатчи шифокорлар кузатишади ва ҳамиша биринчи ёрдамни кўрсатишга тайёр туришади. Кейинчалик шикастланган футболчилар чуқурлаштирилган тиббий кўрикдан ўтишади. Сўнг даволаш муолажаси бошланади. Умумий реабилитация амалга оширилади, бунинг учун бизда реабилитолог мураббий ишлайди. Умумий қилиб айтганда, бу тизим яхши йўлга қўйилган. Академиямизда ушбу соҳада етарли билимга эга мутахассислар бисёр.
- Академияда Диёр Усмонхўжаев, Александр Хвостунов, Саҳоб Жўраев каби ёш мураббийлар ишлашмоқда. Уларнинг малакасини ошириш учун қандайдир дастурлар қабул қилинганми?
- Мураббийлар даражаларини ошириш бугунги куннинг устувор вазифаларидан бири ҳисобланади. Уларнинг савияси ва маҳоратини янада кучайтириш мақсадида октябрь ойида тест ўтказдик, фаолларни тақдирладик. Айрим мураббийларнинг лицензиялари даражасини кўтардик. Хуллас, мураббийларимиз доимо изланишдалар.
- Бир неча мавсумлар олдин водийда иш олиб боргандингиз. Хўш, у ердаги футболнинг айни дамдаги ҳолатини қандай баҳолайсиз?
- «Бунёдкор»да 2007 йили иш бошлаганман. Бу орада Андижондаги футбол мактабига ишга ўтдим, ҳозир у вилоят футбол академияси деб номланади. Бунга қадар эса «УзДонгЖу» қошидаги академия ҳисобланарди. Зоир Эргашевич Ҳасанов билан иш бошлаганмиз. Инфратузилма, моддий базани янада ривожлантиришга ҳаракат қилдик. 2015 йили Рустам Абдуллаев мени «Қўқон-1912»га катта мураббий сифатида таклиф қилди. Футболчилар ва раҳбарият билан илиқ муносабат ўрнатдик. Мақсадимиз жамоани кучлилар сафида олиб қолиш эди. Ўша мавсум яхши жамоа тузишни уддалагандик. Носир Отақўзиев, Алексей Николаев каби тажрибали футболчилар, шунингдек, бир қатор иқтидорли ёшларга ишонч билдирдик. Фурсатдан фойдаланиб, Рустам Раҳмоновичга миннатдорчилик билдираман. Наманганда ҳам катта ҳажмдаги ишлар олиб борилмоқда. «Навбаҳор» чемпионлик учун курашадиган клубга айланди. Фарғона футболи ҳақида бирор нарса дейишим мушкул. Умуман олганда, водийда миллионлар ўйинини ривожлантириш бўйича ишлар тўғри йўлга қўйилган.
- Юқорида айтиб ўтдик, клуб академияси «икки юлдузли» мақомини олишга даъвогарлардан ҳисобланади. ОФК вакиллари ташриф давомида бу борадаги фикр ва таклифларини билдиришдими?
- Уларнинг фикрлари биз учун қониқарли ва ёқимли бўлди. Биринчи галда стадионларга разм солишди, клуб офислари, ишчилар учун яратилган шароитлар, музей, тиббиёт хоналари, академиямиз ҳудуди, яшаш ва ўқиш жойлари, спорт зали - умуман, барчасини кўздан кечиришди ва ижобий хулоса чиқаришди. Қизиғи, экспертлардан бири аввалги йили БАА терма жамоаси билан базамизда шуғулланганди. Иккинчи мутахассис Ласло эса Венгриядан. Қисқаси, меҳмонлар ортларига ёқимли таассуротлар билан кетишди.
Абдулазиз ИСКАНДАРОВ Суҳбатлашди
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20