Энди Флориданинг ўз «Интер»и бор. Қуйида  Дэвид Бекхэм раҳнамолигида ташкил этилган мазкур клуб ҳақида сўз юритилади.

Клубнинг яралиш тарихи

Бу «Интер»нинг тарихи 12 йил аввал бошланган, 2007 йили «Реал»­ни тарк этган Дэвид Бекхэм МЛСга ўтиб, «Лос-Анжелес Гэлакси» шарафини ҳимоя қилганди. АҚШда профессионал спортчилар клублар билан эмас, лига билан шартнома тузишади ва Бекхэмни МЛСга ўтишга кўндираётганда, унинг лигада ўзига хос имтиёзларга эга бўлиши (жумладан, бу ерда хусусий клубини ташкил этиши) ҳам назарда тутилганди. Нархларда эса 25 миллион еврогача чегирма қилиб беришларини айтишган.

Бекхэм бутсаларини михга илгач, МЛСда янги клуб ташкил этиш масаласи ўртага ташланди: АҚШ жануби-шарқидаги йирик сайёҳлик маркази, Атлантика океани соҳилидаги «Майами Фьюжн» клуби 2001 йилдан буён «ухлаётганди» ва унинг ўрнига бирор-бир жамоа тузиш мақсадга мувофиқ деб топилди. Дэвид узоқ ўйланиб ўтирмади, 2014 йили керакли ҳуқуқларга эга бўлгач, шериклари ҳамроҳлигида йирик футбол лойиҳасини ишга туширишга шайланди. Унга кинопродюсер Саймон Фуллер ва боливиялик миллиардер Марсело Клауре ёрдамлашишди. Кейинчалик Бекхэмнинг инвестицион гуруҳига Хорхе ва Хосе Мас, япониялик Масаеси Сон ҳам қўшилишди.

«Интер» МЛСда қачон ўйнайди?

Дастлаб лигадаги старт 2017 йилга белгиланганди, аммо «Ин­тер»га ўз стадионини қуриш учун яна икки йил вақт керак эди. Бекхэмни худди футбол тўпи сингари у ёқдан бу ёққа «тепишди»: порт ҳудудида бизнесменлар қарши чиқишди; соҳилдаги жойга бадавлат кишилар йўлатишмади, арена уларнинг чиройли манзарасини тўсиб қўйиши мумкин эди; маҳаллий бейсбол жамоаси стадиони ёнидан жой ажратишни эса ер эгалари хоҳлашмади. Натижада «Интер»нинг «Майами Фридом Парк» деб номланувчи стадиони 2022 йилда қуриб битказиладиган бўлди ва у шаҳарнинг нисбатан нотинчроқ бўлган ҳудуди - Овертаунда қад ростлайди. Кейинги икки йилни жамоа мартда фойдаланишга топшириладиган «Локхарт» стадионида ўтказади. «Фридом Парк» битганидан кейин эса «Локхарт» академия ва ўсмирлар жамоаси ихтиёрига топширилади. «Интер» МЛСдаги иштирокини 2020 йилдан бошлайди.

Нега айнан «Интер»?

Ушбу номнинг танланишини Бекхэм қуйидагича изоҳлади: «Интер Майами» - жаҳоннинг энг ноёб шаҳарларидан бирида ҳукм сураётган муҳитни ўзида жо қилади. Бу шаҳар турли миллат, ирқ ва диний қарашларга эга одамларни қарши олади. «Интер»нинг логотипи алоҳида эътиборга лойиқ, унда қарқара ва тутилаётган қуёш тасвирланган. Маълум бўлишича, қуёшдан чиқаётган 7 нур - шу рақам остида тўп сурган Бекхэмнинг фаолиятига кўрсатилган ҳурмат ифодаси экан, қуш эса - куч, сабр ва озодлик рамзи. Интернационал, мус­тақил, эркин, кучли - Дэвид ўз клубини айнан шундай ҳолатда кўрмоқчи.

Дебют қачон?

Яқинда Бекхэм жамоасининг МЛСда қачон дебют қилиши аниқ бўлди. Тақдир тақозоси билан, «Интер» ўзининг дастлабки ўйинини хўжайиннинг собиқ клуби - «Лос-Анжелес Гэлакси»га қарши ўтказадиган бўлди. Учрашув 2020 йилнинг 14 мартида «Интер» майдонида ўтказилади. Афсуски, Златан бу баҳсда қатнашмайди: швед яқинда «фаришталар шаҳри»ни тарк этишини билдирди.

Мураббий ким бўлади?

Ҳозирча жамоага бош мураббий тайинланмади, аммо Бекхэм бу борада муносиб номзодларни тезроқ аниқлаши керак. Матбуотда турли номларга кўзимиз тушди - Дэвид Мо­йесдан тортиб, Женнаро Гаттузогача, аввалроқ Роберто Карлос ва Сантьяго Солари ҳақида гапирилди, лекин бу мутахассислардан қайсидир бири «Интер»ни бошқариши амримаҳол. Дэвид ва спорт директори Пол МакДоно кўпчиликни ҳайрон қолдиришлари мумкин.

Майдонда кимлар ўйнайди?

Айни пайт «Интер» таркибида 7 футболчи бор. Сўнгги бўлиб «Торонто»нинг канадалик ҳужумкор ярим ҳимоячиси Жей Чепмен келганди. Шунингдек, рўйхатда аргентиналик Маттейс Пеллегрини ва Хулиан Карранза, мексикалик Виктор Ульоа, яна бир канадалик Давид Норман, венесуэлалик Кристиан Макун ҳамда америкалик Жорж Акоста ҳам бор. Юлдузлар йўқлигининг ўзига яраша сабаблари бор, «Интер» қишки трансферлар дарчасида Европадан кучли футболчиларни таклиф қилиши мумкин. Эҳтимол, айрим келишувлар амалга оширилган бўлса, ажабмас, аммо ҳозирча улардан бехабармиз.

«Интер» қандай кучаймоқчи?

Қизиқ савол, зеро Бекхэм жамоасини юлдузларсиз тасаввур қилиш қийин. Майами клуби Испания гранд­лари сафида тўп сураётганларга қизиқмоқда. Лука Модрич ва Луис Суарес ҳақида гап-сўзлар тарқалди, умуман, «Барселона» уругвайлик форвардини ёзда «Интер»га текинга қўйиб юбориши мумкин экан. Льорис, Кавани, Давид Сильва, Фалькао — хабарларда ушбу номлар ҳам янгради, лекин Лионель Месси билан келишувга эришилса, мана шу ҳақиқий йирик воқеага айланарди. Лео келажаги борасида бир тўхтамга келолмаяпти, балки Бекхэмнинг таклифини кўриб чиқаётган бўлиши ҳам эҳтимолдан холи эмас. Месси ҳар қайси мавсумда «Барселона»ни тарк этиши мумкин, шарти - фаолиятини Европада давом эттирмаслиги керак. Ҳа, аргентиналик юлдуз учун Майамининг «Интер»ига ўтишга тўсиқ бўладиган ҳеч нарса йўқ айни пайт.

А.ИСРОИЛХОНОВ тайёрлади