Сан-Марино миллий жамоаси Евро-2020 саралаши доирасидаги 10та ўйинда 10 марта мағлубиятга учради. Умумий тўплар нисбати шунчаки, даҳшат - 1:51. Ўзи Сан-мариноликлар катта футболда нима қилишяпти? Йўқ, улар суперсалбий натижалар туфайли сиқилишмаяпти, жазавага ҳам тушишмаяпти. Аксинча, Сан-Маринода футбол байрами ҳавоси ҳукмрон. Бунга якунланган саралаш босқичида урилган ягона гол сабабдир. Ахир жамоа Қозоғистон термасига қарши кечган 9-тур учрашувида охирги 6 йил бадалига ўз майдонида илк марта гол қувончини туйди. Оддий айтганда, Сан-маринолик футболчилар 2013 йили Польша термаси дарвозасини ишғол қилишганидан буён (ўша баҳсда поляклар 5:1 ҳисобида ғалаба қозонишган) ўз майдонларидаги ўйинларда гол уролмай келаётгандилар. Умуман, Сан-Марино термаси бундан олдинги голини 2017 йилнинг сентябрида Озарбайжонда нишонлаган эди...
Хуллас, Қозоғистон термаси билан ўйинда урилган гол Сан-мариноликлар учун ҳар томонлама қадрли, бебаҳо, нодир... Бас шундай экан, Филиппо Берарди номига ёзилган голнинг ўзгача нишонланганида ғайритабиий томони йўқ. Мана, терма жамоанинг «Инстаграм»даги расмий саҳифасида қолдирилган «пост»га эътибор қаратинг: «73 ойдан кейин ниҳоят, қайтдик. Ажойиб». Бу вақтда оддий мухлислар «Твиттер»ни шунчаки, ёндиришмоқда:
- Голголголголгол, ха-ха-ха...
- Ҳаммаси бир тийин! Биз гол урдик!
- Ҳа, Берарди! Хоҳлаганингни олишинг мумкин, сен чинакам йиртқичсан.
Ўзи Сан-Марино термаси ғаро-йиб жамоа. У Қозоғистон термасига қарши ўйиннинг биринчи бўлимидан кейин 0:3 ҳисобида орқада борди, лекин танаффусдан қайтгач, нодир гол уриб, ўзига ҳақиқий байрам ҳозирлади.
Филиппо Берарди урган гол атрофида фактлар шу қадар кўпки, улардан фақат энг асосийларини келтириб ўтиш имконияти бор:
*** Қозоғистон термаси дарвозасига урилган гол жамоа учун охирги 2 йилдаги биринчисидир. Сан-мариноликлар бу оралиқда ўз дарвозаларидан нақ 79 марта тўп олиб чиқишди.
*** Камтарин жамоа 6 йилдан буён ўз мухлислари кўз ўнгида гол уролмаётган эди.
*** Филиппо Берарди Сан-Марино миллий жамоаси тарихидаги 16-гол муаллифига айланди.
Берарди футболга ягона иш сифатида ёндашадиган Сан-маринолик кам сонли ўйинчилардан биридир. Дейлик, жамоа таркибида турли касб эгалари бор - стоматологлар, сантехниклар... Айни пайт Берарди Сан-Марино термаси таркибидаги энг ёш футболчилар қаторида. Аниқроқ айтсак, у атиги 4 нафар жамоадошидан катта, холос. Муҳими, Берардини ҳозирдан жамоа тарихидаги энг омадли ўйинчилар сафига қўшишмоқда.
Дарвозабон Элиа Бенедетти кўпчиликка таниш «Новара» клуби шарафини ҳимоя қилади. Тўғри, Италиянинг анча таниқли ушбу жамоаси айни пайт «С» серия «А» гуруҳида иштирок этиш билан чекланмоқда. Берарди ҳам шу лигада тўп суради, фақат унинг клуби - «Вибонезе» «С» гуруҳи вакилидир. Умуман, Сан-маринолик икки етакчи футболчининг клуб миқёсида ўзаро тўқнаш келиши эҳтимоли жуда паст. Зеро, «Новара» ҳам, «Вибонезе» ҳам ўз гуруҳи турнир жадвалида ўртача мавқега эга ва «В» серияга йўлланма берувчи «плей-офф» раундида ўйнашга жиддий даъво қилолмаса керак. Бош қаҳрамон - 22 ёшли Берарди ақлини танибдики, «Милан»да ўйнашни орзу қилади. У яқинда Сан-Марино терма жамоаси матбуот хизматига берган интервьюсида ҳам буни яширмади. Бироқ футболчининг фаолияти Туринда ривожланган. Филиппо аввалига «Римини» ёшлар жамоасида шуғулланди, кейин «Торино» билан бирданига 3 йиллик шартнома тузди. Тўғри, жамоа мураббийлари йигитчани дарҳол ижара асосида «сафар»га жўнатишди. Шу тариқа Берарди «Юве Стабиа» («Ювентус»га дахли йўқ) ва «Монополи» жамоаларида тажриба тўплади. «Вибонезе» эса Сан-маринолик йигит трансферини 125 минг еврога сотиб олди. Дарвоқе, Бенедеттининг трансфер баҳоси ҳам шунча. Қисқаси, айни пайт шу иккиси Сан-Марино футболининг энг қимматбаҳо ўйинчилари бўлиб турибди.
Сўз
- Терма жамоамиз савияси қандайлигини яхши биламан. Албатта, қачондир мамлакатимиз ҳукумати футболни талаб даражасида ривожлантириш учун маблағ топишидан умидвормиз. Бизда одамлар ажойиб, менталитетимиз ҳам зўр. Дейлик, жуда тинчликпарвар ва меҳнаткашмиз. Қисқаси, Сан-Марино савия жиҳатидан яхшигина миллий жамоага эга бўлишга муносиб. Филиппо Берарди (Сан-Марино терма жамоаси ҳужумчиси).
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20