Бразилияда ташкил этилган 17 ёшгача ўсмирлар ўртасидаги ЖЧ мезбонларнинг ғалабалари билан ниҳоясига етди. Турнирнинг «Олтин тўп» соврини чемпион жамоа аъзоси Габриэль Веронга насиб этди. Энг йирик мусобақада энг яхши футболчи унвонига сазовор бўлиш ёш иқтидор соҳибининг юксак эътирофга лойиқ кўрилганидан далолат, албатта. Бироқ ўсмирликда тенгсиз деб топилган нуфузли мукофот соҳибларининг кўпчилигини мухлислар унутиб улгуришган. Боиси, улар ёшликдаги муваффақиятни катта футболда такрорлай олишмаган. 1985 йилда асос солинган турнир 18та кичик мундиалларни ўтказди. Демак, шунча ёш футболчи «Олтин тўп»ни қўлга киритишди. Биз эса уларни танимаймиз. Сиз-чи? Эътиборингизга 17 ёшгача бўлган ўсмирлар ЖЧларидаги нуфузли соврин соҳиблари ҳақидаги қисқача маълумотни ҳавола этамиз.
1985 йил. Ғолиб - Нигерия. Энг яхши футболчи - Виллиам Оливейра (Бразилия)
Бразилия терма жамоаси 3-ўрин билан кифояланди, паст бўйли (166 см.) ноёб иқтидор Оливейра эса ҳужумкор ярим ҳимоячи позициясида тўп сургани ҳолда, 5та гол урди, ажойиб узатмаларни амалга оширди. Унинг тўп билан муносабати Марадонаникидан қолишмасди. Лекин ёрқин ўйинлар кўрсатиш Виллиамга насиб этмади. У Жанубий Америкадаги ўнлаб жамоаларда ўз омадини синаб кўрди, қуйи лигаларда, кейинчалик Колумбия ва Перу клубларида тўп сурди.
1987 йил. Ғолиб - Собиқ иттифоқ. Энг яхши футболчилар - Мусса Траоре (Кот-Д~Ивуар), Филип Осунду (Нигерия)
Аслида энг яхши футболчи соврини чемпион жамоа дарвозабони Юрий Никифоровга берилганида адолатлироқ бўларди. Бироқ ташкилотчилар африкалик икки ёш иқтидор соҳибларини афзал кўришди. Траоре асосий фаолиятини Франциянинг қуйи дивизионларида ўтказди, Ивуар термаси сафида 15 марта майдонга тушиб, битта гол урди. Нигериялик Осундуни «Андерлехт» ўз таркибига қабул қилганди. Аммо футболчи ишончни оқлай олмади. Кейинчалик Франциянинг қуйи лигаларида баҳолиқудрат тўп сурди. Ёши 30га чиққанида фаолиятини якунлади.
1989 йил. Ғолиб - Саудия Арабистони. Энг яхши футболчи - Жеймс Уилл (Шотландия)
Дарвозабон Уиллнинг сэйвлари Шотландиянинг финалда ғолиб чиқиши учун камлик қилди, пенальтилар сериясида араблар устун келишди. Шунга қарамай, Жеймс юксак мукофотга лойиқ топилди. Кейинчалик шотландиялик посбон «Арсенал» эътиборини қозониб, шартнома имзолади. Лекин 3 йил ичида бир марта ҳам майдонга тушмасдан, Лондонни тарк этди. Охир-оқибат, Жеймс ўз юртининг қуйи лига жамоалари - «Данфермлин Атлетик», «Таррифф Юнайтед», «Деверонвейл» ва «Питерход»лар шарафини ҳимоя қилди.
1991 йил. Ғолиб - Гана. Энг яхши футболчи - Нии Лэмпти (Гана)
Мундиалда бу футболчи «янги Пеле» тахаллуси билан сийланиб, кейин «Андерлехт» ва ПСВда рисоладагидек тўп сурди. Аммо Англияга йўл олгач, ҳаммаси остин-устун бўлиб кетди: Нии 12 мамлакатнинг 13та клубида ўз ўрнини топишга уриниб кўрди. Лекин барқарор ўйин кўрсата олмади. Шу тариқа фаолиятини якунлаган бўлсада, Лэмпти ортиқча куюнмади. Айтишича, у ғаройиб саргузаштларни бошдан кечирган экан.
1993 йил. Ғолиб - Нигерия. Энг яхши футболчи - Даниэль Аддо (Гана)
Ўсмирлар ўртасидаги мусобақаларда антропометрик устунликка эга бўлган африкалик футболчилар кўпинча етук ўйин кўрсатишади. Мазкур ЖЧда Гана терма жамоаси ярим ҳимоячиси тенгсиз, деб топилди. 15 ёшли Аддони «Байер» мундиал арафасида харид қилганди. Бироқ футболчи «доришунослар» сафида ҳам, бошқа жамоаларда ҳам талаб даражасида ўйнай олмади. 25га чиққанида Даниэль Германиянинг қуйи лигаларига тушиб кетганди. Кейин Ливан, Македония ва Гана клубларида тўп сурди.
1995 йил. Ғолиб - Гана. Энг яхши футболчи - Муҳаммад ал Катири (Уммон)
Айтинг-чи, бирор-бир уммонлик футболчи номини биласизми? Шубҳа йўқки, ал Катири илк футболчи бўлади. Мақола сўнгида сиз бу номни унутиб улгурасиз. Ўша мундиалда Уммон кутилмаганда 4-ўриндан жой олганди, ушбу жамоа вакили эса «Олтин тўп»га лойиқ топилди. Ал Катири ҳозир ҳам ўз юртида, соғ-саломат юрибди. Айтишларича, бир пайтлари тўп сурган экан.
1997 йил. Ғолиб - Бразилия. Энг яхши футболчи - Серхио (Испания)
«Малага» ҳамда «Барселона»нинг тарбияланувчиси «Олтин тўп» учун рақобатда шахсан Роналдиньодан устун келганди. Аммо кейинчалик Каталония гранди сафида 10тача ўйин ўтказиб, ғойиб бўлди.
1999 йил. Ғолиб - Бразилия. Энг яхши футболчи - Лэндон Донован (АҚШ)
Қаҳрамонларимиз орасидаги дастлабки таниқли футболчи. Донован Европада муносиб ўйин кўрсата олмади, «Бавария» ва «Эвертон»даги қисқача иштирокдан кейин ватанига қайтди. «Соккер» ишқибозлари учун у чинакам афсона. Терма жамоа сафида 157 учрашувда 57та гол урган, «Лос-Анжелес Гэлакси» билан 4 марта МЛС кубогини қўлга киритган.
2001 йил. Ғолиб - Франция. Энг яхши футболчи - Флоран Синама-Понголь (Франция)
Турнирнинг энг яхши футболчиси ва тўпурари ўша йили «Ливерпуль» ва «Атлетико»да ўз ўрнини топишга уриниб кўрди, «Ростов»да ҳам бўлди. Лекин фақат Тайпейнинг «Чайнат Хорнбилл» жамоаси талабларини қондира олди, холос.
2003 йил. Ғолиб - Бразилия. Энг яхши футболчи - Сеск Фабрегас (Испания)
Ниҳоят, чинакам юлдуз! Сеск ўша мундиалда 7та гол уриб, энг яхши тўпурарлар учлигидан жой олди ва «Олтин тўп»га эга бўлди. Лекин финалдан кайфиятсиз ҳолда қайтди. Чунки Испания Бразилиядан енгилганди. 7 йилдан кейин Фабрегас «қизил фурия» таркибида катта мундиал ғолибига айланди.
2005 йил. Ғолиб - Мексика. Энг яхши футболчи - Андерсон (Бразилия)
Балки нуфузли совринга чемпион Карлос Вела муносиброқ бўлгандир, лекин мутасаддилар Андерсонни мукофотлашга қарор қилишди. Кейинги йилларда Андерсон ишончни оқлаб, «Гремио»да порлади, «Порту»даги қисқа фаолиятдан сўнг «МЮ»га ўтди. Алекс Фергюсон раҳбарлигида 200га яқин учрашувда майдонга тушди, «Челси»га қарши ЕЧЛ финалида пенальтиларнинг бирини голга айлантирди. Аммо сэр Алекс ортидан у ҳам жамоани тарк этди. Аввалига Бразилияда, кейин Туркиянинг 2-лигасида тўп сурди. 31 ёшида фаолиятини якунлади.
2007 йил. Ғолиб - Нигерия. Энг яхши футболчи - Тони Кроос (Германия)
Идеал топқирлик! Тони Кроос ўсмирликдаги юксак мукофот учун кейинги фаолиятида муносиб жавоб қайтарди: футбол оламининг юлдузига айланди, 4 марта ЕЧЛда ғолиб чиқди ва Бундестим таркибида жаҳон чемпиони унвонига сазовор бўлди.
2009 йил. Ғолиб - Швейцария. Энг яхши футболчи - Сани Эммануэль (Нигерия)
Бу эса 100 фоизлик оқланмаган ишонч. Кичик мундиалдаги юксак эътироф кўмагида «Лацио»дан ўрин олган нигериялик ҳужумчи қониқарли ўйнай олмади, «В» серия ва Швейцария клубидаги ижаралар ҳам ёрдам бермади. Кейинчалик Сани Исроил ва Швециядан қўним топа олмагач, 23 ёшида катта футболни тарк этди.
2011 йил. Ғолиб - Мексика. Энг яхши футболчи - Хулио Гомес (Мексика)
«Олтин тўп»нинг мазкур соҳиби энди 25га чиққан бўлсада, футболни бутунлай тарк этган. У «Пачука»дан муқим жой олмагач, аввал Мексика бўйлаб ижарада юрди, 2-лигада ҳам ишлари юришмади, сўнгра футбол билан хайрлашди.
2013 йил. Ғолиб - Нигерия. Энг яхши футболчи - Келечи Ихеаначо (Нигерия)
Бу футболчи анча таниш, «Манчестер Сити»да жокерлик ролини рисоладагидек адо этган Келечи «Лестер»да бутунлай сўнди. Жорий мавсумда у ҳанузгача майдонга тушгани йўқ. Ваҳоланки, ёши 23га чиқди.
2015 йил. Ғолиб - Нигерия. Энг яхши футболчи - Келечи Нвакали (Нигерия)
Кичик мундиалнинг энг яхши снайпери Виктор Осимхен самарали фаолиятини «Лилл»да давом эттираётган бўлса, «Олтин тўп» соҳиби «Арсенал» ёшлари сафида тўп сурди. Бироқ асосий жамоага ўта олмади. Шу боис, Голландия ва Португалия клубларига ижарага юборилди. Ёзда уни Сегунда вакили «Уэска»га жўнатишди. Бироқ ҳанузгача дебютдан дарак йўқ.
2017 йил. Ғолиб - Англия. Энг яхши футболчи - Фил Фоден (Англия)
Гвардиоланинг суюкли шогирди бундан 2 йил аввал Англия ўсмирларининг ғалабасига муносиб улуш қўшганди. Ҳозир мураббий етарли имконият беролмагани учун Филдан узр сўрамоқда, аммо Давид Сильва ўрнига ҳеч кимни харид қилмаслиги ва янги мавсумда Фоден мунтазам равишда майдонга тушишини ваъда қилмоқда.
2019 йил. Ғолиб - Бразилия. Энг яхши футболчи - Габриэль Верон (Бразилия)
«Палмейрас» тарбияланувчисининг номи аргентиналик буюк афсоналар (Габриэль Батистута, Хуан Себастьян Верон)ни эслатади. Боз устига, у ўз ватанидаги ўсмирлар мундиалида бор маҳоратини кўрсата олди. Тўғри, юқорида зикр этилган фактларнинг аксарияти кичик Габриэль буюк афсоналарга муносиб ворис бўлишига кафолат беролмайди. Муҳими, юксак эътирофга лойиқ кўрилган ёш футболчи тинимсиз изланиш ва тер тўкишда давом этса, футбол тарихида ўчмас из қолдирган ёрқин юлдуз даражасига кўтарилади.
МУҲАММАДСОДИҚ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20