Турли йилларда Ўзбекистон чемпионатида жуда кўплаб хорижлик футболчилар тўп суришди. Ҳаттоки, Ривалдодек дунё даражасидаги ҳужумчи ҳам ўйнади, мамлакатимиз майдонларида. Яқин йилларда эса биз Тиаго Безерра, Драган Черан ва Элгужа Григалашвили сингари юксак маҳорат соҳибларининг ҳаракатларидан баҳраманд бўлдик, айримларининг ўйинларини ҳамон кузатмоқдамиз. Шу билан бирга, легионер мақомига мос бўлмаган футболчилар ҳам борлигини унутмаслик лозим. Суперлига-2019да ҳам бундай ўйинчилар учради. Қуйида якунланган мавсумда элита клубларида тўп сурган хорижликлар ҳақида сўз боради.
«ПАХТАКОР»
«Шерлар» таркибида уч легионер тўп сурди: Марко Симич, Драган Черан ва давралар оралиғида бирров келиб кетган Гиди Канюк. Черногория терма жамоаси ҳимоячисининг бу йилги ишлари унчалик юришмади, мавсум давомида жароҳатлардан азият чекди. Шундай бўлсада, «требл» қайд этганлардан бирига айланди. Шартномаси якунига етган Симичнинг клубни тарк этиши эҳтимоли мавжуд. Драган Черанга эса ортиқча изоҳ бериш шартмас. У 23та гол билан тўпурарлар пойгасида биринчи бўлди. Ёзги танаффус вақтида жамоа таркибида машғулотлар ўтказган исроиллик Гиди Канюкка жавоб бериб юборилди ва томонлар ҳамкорликни тўхтатишди.
«ЛОКОМОТИВ»
«Темирйўлчилар» сафида бу йил Арсланмурат Аманов, Игорь Йелич, Филип Райевац, Ариагнер Смит Медина ва Йован Жокич ҳаракат қилишди. Осиё кубогидан сўнг таркибга қўшилган туркманистонлик ярим ҳимоячининг «Локо»га мослашиши қийин кечди. Шундай бўлсада, у аста-секин асосий таркибга кириб олди. Ўтган йили АГМКдаги ўйинлари орқали мухлислар меҳрини қозонган Жокич эса пойтахт клубида барқарорликка эришди. Ўртамиёна ҳужумчи Филип Райевацга биринчи даврадан сўнг жавоб бериб юборилди. У 8га яқин учрашувда майдонга тушиб, атиги бир бор тўп киритди, холос. Самвел Бабаян таклифига биноан «Локомотив»га келган никарагуалик Смит Медина ҳам кутилган ўйинни кўрсата олмади.
«БУНЁДКОР»
Мавсум аввалидаги трансферлар ойнасида у қадар фаол бўлмаган «қалдирғочлар» молиявий ҳолат изга тушгач, ёзда таркибга Евгений Чумак ва Дмитрий Островскийни қўшиб олишди. Чумак жамоага тез киришиб кетиши натижасида давра бошида асосий таркибдан ўрин олди. Гол урди, умуман, ёмон тўп сурмади. Лекин кейинчалик Абрамов унга ортиқ имконият бермади, ушбу футболчининг аслида қандай савияга эканлиги шу тариқа мавҳумлигича қолаверди. Яқинда «Бунёдкор» Чумак билан дўстона хайрлашди. Худди шу гаплар Островскийга ҳам тааллуқли.
«СЎҒДИЁНА»
Жиззахликлар аввалги мавсум таркибга қўшилган Милан Митрович ва Никола Милинковичларга ишонишда давом этишди. Янгилардан эса қирғизистонлик Шерзод Шакиров таклиф этилди. Бироқ унинг савияси кутилганидан пастроқ эканлиги ойдинлашди. Митрович кўплаб учрашувларда ўзини кўрсатди, бир нечта марта дарвозаси дахлсизлигини сақлаб қолди. Майдон марказида Кахи Махарадзе ва Никола Милинкович анча ишончли тўп суришди. Умуман, «Сўғдиёна» легионерлари мухлисларда ижобий таассурот қолдиришди.
«МЕТАЛЛУРГ»
Суперлиганинг бу иштирокчиси бир қарасанг, юқори ўринлардаги клублардан очко тортиб олади ёки аксинча, нисбатан кучсизроқ жамоаларига ютқазади. Андрей Шипилов легионер рўйхатига Сергей Тумасянни киритди. Бу футболчи илк турларда ёмон кўринмаганди, гол ҳам урди. Лекин вақт ўтиши билан унинг ўйинида пасайиш кузатилди, маҳаллий ҳужумчилардан устун жиҳатларини сезилмади. Тумасян кейинги мавсумни бошқа жамоа таркибида бошласа керак.
«СУРХОН»
Элитага қайтган термизликлар мавсум бошида таркибга мудофаа чизиғидаги ишончли ўйинлари билан ном қозонган Владимир Бубанья ва Дарко Станоевични қўшиб олишди. Ёзда эса бразилиялик Лукас ва Дуглас сафга қўшилишди. Тўғриси, ўзимизнинг футболчилар жанубий америкаликлардан нисбатан устунроқ эканликларини кўрдик. Шундай экан, бундай легионерларни таклиф этганда кўра, маҳаллий ёш иқтидорларга имконият берилса, ҳам ўзбек футболи, ҳам жамоа келажаги учун фойдали бўлиши турган гап. Станоевични кўпчилик яхши танийди, у айниқса, стандарт вазиятларда қойилмақом ҳаракат қилади, тезкор қарор чиқариши билан бошқа амплуадошларидан ажралиб туради. Бубанья ҳам ҳимояда ишончли ўйин кўрсатди.
АГМК
Аввалига олмалиқликларнинг легионерлар борасида омадлари чопмади. Вақт тиғиз пайтда Марко Зочевич ва Миролюб Костич билан шартнома имзоланди, аммо якунда бу қарорнинг хато эканлиги ойдинлашди. Оқибатда Миржалол Қосимов бу футболчиларга жавоб бериб юборишдан ўзга чора тополмади. Уларнинг ўрнига анча тезкор Элгужа Григалашвили ҳамда кўпчилик учун нотаниш бўлган Игорь Зонич билан шартнома тузилди. Грузиялик легионер Суперлигада 13 ўйинда 7та гол урди, кубок беллашувларида ҳам унинг самарадорлиги йўқолмади. Бир сўз билан айтганда, Элгужанинг ташрифи АГМКга фойда келтирди. Жамоага худди шундай - етакчиликни зиммасига оладиган, ҳужумларнинг якуний палласида совуққонлик билан ҳаракатланадиган ўйинчи етишмаётган эди.
«НАВБАҲОР»
«Лочинлар» мураббийлари Славко Лукич, Александр Касьян, Иван Соловьёв, Амирбек Жўрабоев каби хорижлик футболчилар хизматига ишонч билдиришди. Қайсидир маънода, уларнинг барчаси мухлисларга хуш ёқадиган ўйин кўрсатишди. Фақат мураббий алмашиши, жароҳатлар, шунга ўхшаш омиллар уларнинг барқарорликка эришишларига тўсқинлик қилди. Шунингдек, Элман Тагаев ҳам Наманганда ҳеч қанча ўйнаб улгурмасидан жамоани тарк этди.
«АНДИЖОН»
Бу жамоада Виталий Мирний ва Радосав Алексич каби хорижлик футболчилар тўп суришди. Шунингдек, Қирғизистон терма жамоасига Осиё кубогида тарихий голни туҳфа этган Аҳлиддин Исроилов ҳам таклиф этилди. Бу ўйинчилар «Андижон»да қай даражада муваффақиятли фаолият юритишди? Қирғизистонлик футболчига мавсум ўртасида жавоб бериб юборилди, Алексичнинг ҳаракатлари эса маҳаллий мухлисларга манзур бўлди, Мирний жамоанинг асосий дарвозабонига айланди.
«ҚЎҚОН-1912»
Қўқонликлар юқори мақсадларни кўзлаган ҳолда, Милош Николич, Боян Кнежевич, Франция ва Нигерия фуқаролигига эга Оливье Боннен билан шартнома имзолашганди. Шунингдек, легионерлар рўйхатида Марко Миличнинг номи ҳам бор эди. Нўъмон Ҳасанов салбий натижалар сабаб истеъфога чиқарилгач, унинг ортидан Кнежевич ва Николичга ҳам чиқиш эшиклари кўрсатилди. Умуман олганда, «Қўқон-1912»даги хорижлик футболчилар ўзларидан ижобий таассурот қолдирмадилар.
«БУХОРО»
Бахтиёр Ашурматов қайта шакллантираётган жамоасига Иван Фатич, Владимир Баенко ҳамда Артём Кулешани қўшиб олди. Лекин давралар оралиғида клубда жиддий ўзгаришлар юз берди. Бош мураббий курсисини Муҳсин Муҳаммадиев эгаллагач, «Бухоро» таркибига Липартиа Жаба, Милован Капор, Вили Исиани, Фатхулло Фатхуллоев кабилар қўшилишди. Асосийси, бу футболчилар якунда жамоанинг кучлилар сафида қолишига муносиб ҳисса қўшишди.
«ҚИЗИЛҚУМ»
Мунтазам равишда хорижлик футболчилар хизматига таянадиган «Қизилқум» биринчи даврадан сўнг Григалашвили ва Медина Смитни бошқа клубларга қўйиб юборгач, уларнинг ўрнини Мате Вацадзе, Лаша Тотадзе, Руслан Маргиев, Стивен Лустица ҳисобига тўлдиришга уринди. Лекин бу футболчилардан кутилган ёрқин ўйин намойиш этилмади. Навоийликлар эса мавсумни 13-ўринда тугатишди.
Бу йил фақат икки клуб - «Насаф» ва «Динамо» легионерлар хизматидан фойдаланмади.
Кўриниб турибдики, ҳамма клублар ҳам хориждан савияли футболчиларни жалб этишни уддалай олишмаган. Рост-да, ишончни оқлайдиган легионерни танлаш ҳам ўзига хос маҳорат. Тўғри танловни амалга оширганларнинг ошиғи олчи, акс ҳолда, маҳаллий ёшлар хизматига таяниш кўпроқ наф келтиришини биз «Насаф» ва «Бунёдкор» мисолида кўриб олдик.
АБДУЛАЗИЗ
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20