Футбол оламининг таниқли мураббийларидан бири - италиялик Арриго Сакки вақтида «Милан» билан имкони бор барча совринларни қўлга киритганди. У жумладан, Европа Чемпионлар кубоги турнирида қаторасига 2 марта ғалабани таъминлаш асносида итальян футболида чинакам инқилобни амалга оширганди. Кўпни кўпган Сакки бугунги футбол ҳақида қандай фикрда? Ўйлайманки, унинг бир қатор мавзуларга доир қарашлари кўпчиликни қизиқтиради.

- «Манчестер Сити»нинг жорий мавсумдаги иштирокини қандай баҳолайсиз? Хосеп Гвардиола жамоасининг беқарорлиги сизни ҳам ажаблантиряптими?

- Жамоа ЧЛ сафар учрашувидан йирик ғалаба билан қайтгач, Гвардиолага табрик жўнатдим. Пеп - футболни ўзгартириб юборган мураббийларнинг бири. Унинг иш услубини кузатиш кишига завқ бағишлайди. Қайси жамоани бошқармасин, ҳаммаси сермазмун ўйин кўрсатади. Омадсизликдан эса ҳеч ким тўлиқ ҳимояланмаган. Эсимда, мен бошқарган «Милан» ҳам Европа Чемпионлар кубогининг 1988 йилги финали арафасида мураккаб вазиятга тушиб қолганди. Муҳими, ўйинда «Стяуа»дан устун келиш йўлини топгандик. Қисқаси, Хосеп ва унинг ажойиб жамоасининг айни омадсизлиги фалокат эмас, менимча.

- «Олтин тўп» сўрови натижалари хусусида нима дея оласиз?

- Ўйлашимча, тақдирланганлар совринга ҳақли эдилар. Ҳа, кўпчилик Виржиль ван Дейкнинг ғолиб чиқишини истагани рост. Негаки, у мавсумни чиндан ҳам, жуда зўр ўтказди. Аммо бир пайтлар Франко Барези ҳам «Олтин тўп»га муносиб ўйнаган бўлсада, соврин унга насиб этмаганди. Айби - ҳимоячи эди, мукофот эса ўша йиллар ҳам асосан ҳужумкор футболчиларга бериларди.

- Маурицио Сарри ёзда «Челси»ни тарк этиб, «Ювентус» бошқарувини қўлга олди. Унинг Туриндаги фаолиятини кузатаётганингиз аниқ. Фикрингизча, Сарри «кекса синьора»ни тўғри етаклаяптими?

- Саррини футбол оламининг буюк стратеглари қаторида тилга олиш мумкин. У жамоани малакали касбдошидан қабул қилди. Лекин Массимилиано Аллегри ва Сарри қарама-қарши қутбдаги мутахассислар. Бири жануб,  иккинчиси шимолда ёки шарқ ва ғарбдаги каби. Ҳозирги футболчиларни Сарри танлаган эмас, трансферлар асосан Аллегри даврида амалга оширилган. Ўзи Маурицио спорт директорига ишонч билдиришни афзал кўради.

- Аарон Рэмзи ўйини хусусида нима дейсиз?

- Бу футболчи ҳақида етарли маълумотга эга эмасман. Шундай бўлсада, ҳозирча ўзини тўлиқ кўрсатолмаганини таъкидлашим мумкин. Умид қиламанки, Аарон яқин орада ўзи ва Сарри учун савияли ўйин намойиш этишга тушади. Умуман олганда, Маурицио айни пайт ўзига мутлақо нотаниш созандалардан тузилган оркестрни бош-қаришга уринмоқда. Бу жуда мушкул юмуш. Лекин битта факт бор - Сарри замонавий футболдаги энг кучли мураббийлардан ҳисобланади.

- Шахсан сиз фаолиятингиз давомида бирор марта клуб раҳбарияти таклиф этган ўйинчиларни қабул қилишдан бош тортганмисиз?

- Ҳа, шунақа ҳолатлар ҳам кузатилган. Аслида ҳамиша футболчилар трансфери билан шахсан ўзим шуғулланганман. Дейлик, Сильвио Берлусконидек ажойиб президентнинг кўплаб таклифларини рад этганман. Мисол учун, у вақтида Клаудио Боргини тавсия этганида, бу футболчи тезкор эмаслиги, ҳимоя чизиғида ишончли ўйнолмаслигини айтгандим. Шунда ҳам, президент мени кўндиришга уринган, аммо уни битта савол билан мулзам қилиб қўйгандим: «Жаноб Берлускони, айтингчи, сиз ўз қарашларингизга мос келмайдиган ходимни ишга олармидингиз?» Табиийки, у кутилган жавобни берди: «Йўқ». Хўш, унда нима учун мен бу ишни қилишим керак?

- «Ливерпул»нинг 4 нафар футболчиси «Олтин тўп» номзодларининг дастлабки 10талигидан жой олди. Бу инглиз футболининг устунлик белгисими?

- Қайсидир маънода, ҳа. Ўз вақтида «Милан» ҳам шундай натижага эришганди - рекорд. Кейинги мавсумда воқеа такрорланганини айтишим керак. Энди «Ливерпуль» футбол тимсоли мақомига кўтарилди, унга буюк мураббий раҳбарлик қилмоқда ахир. Фахрланишим мумкин - вақтида ўз шогирдларимни камолот сари етаклаганман. Айтайлик, ҳеч қачон қандайдир соврин ютган футболчини харид қилмасдик. Муҳими, мураббийлар штаби, раҳбарият ва футболчилар  ўртасида ҳамжиҳатлик юзага келганди. Демоқчиманки, ажойиб жамоа ва шундай президент билан самарали ҳамкорлик қилгандим.

- Халқаро тажрибангиз оз бўлишига қарамай, Европада ҳукмронлик ўрнатишга қодир жамоани қандай шакллантирган эдингиз?

- 1988 йили Скудеттони қўлга киритгач, бутун ёз Европанинг энг сара клублари билан куч синашиб чиқдик. Эътиборлиси, барча ўртоқлик учрашувларида ғалаба қозондик. Ҳаттоки, «Уэмбли»да ташкиллаштирилган турнир доирасидаги 2та беллашувда ҳам. Қисқаси, тинимсиз ва машаққатли меҳнат эвазига «МЮ», «Бавария», «Монако», ПСВ, «Реал» каби номдор рақиблардан устун келгандик.

- ЧЛнинг амалдаги ғолиби - Муҳаммад Салоҳга қандай таъриф ишлатиш керак, сизнингча?

- Мисрлик ҳужумчи Италияда ҳам рисоладагидек тўп сурганига қарамай, чемпионликка эришолмаганди. Энди Клоппнинг саъй-ҳаракатлари эвазига сезиларли тараққиётга эришди ва ҳақли равишда ЧЛ шоҳсупасига кўтарилди. У ва «Ливерпул»ни фақат ва фақат чин юракдан муборакбод этиш керак!