Қишки трансферлар бозори яқин. Демак, айрим етакчи клубларнинг мураббийлари раҳбариятдан янги футболчилар харидига катта маблағ сўрашлари табиий ҳол. Дейлик, деярли бир йил давомида ҳордиқ чиқарган ва ниҳоят, «Тоттенхэм»да мураббийлик фаолиятини қайта жонлантирган буюк ва даҳшатли Жозе Моуриньо бир қатор трансферларга қўл урса керак. Ҳар ҳолда, португалиялик «Беназир» тарихда футбол бозорида энг кўп пул сарфлаган мураббий ҳисобланади. Қарангки, шундай мутахассис энди трансферлар бобида анча зиқна саналган клуб билан ҳамкорлик қилмоқда. Қизиқ, Моу «Тоттенхэм» раҳбариятининг бу борадаги қарашини ҳам ўзгартира олармикан? Бу саволга яқин орада жавоб оламиз. Ҳозирча эса soccer.ru сайти маълумотлари асосида футбол оламининг энг серхаражат мураббийлари рейтинги билан танишиб турамиз.
10. Диего СИМЕОНЕ
(Аргентина) - 0,66 млрд. евро
Аргентиналик жўшқин Симеонени олдинда ҳамюрти Маурисио Почеттинонинг қисмати кутиб тургандир балки, ахир 2012-2014 йиллар оралиғида даҳшатли кўринган «Атлетико» шундан кейинги даврда атиги 2та соврин ютди - ЕЛ кубоги ва Европа суперкубоги. Ваҳоланки, у «матрасчилар» таркибини кучайтириш йўлида йилдан йилга кўпроқ харажат қилмоқда. Мисол учун, «Атлетико» раҳбарияти ўтган ёз янги футболчилар хариди учун 126 млн. евро ажратди. Факт шуки, «Эль Чоло» сайёрамизнинг энг серхаражат 10 нафар мураббийи қаторида. Яна бир томони борки, «Атлетико» кечагина «донор клуб» мақомида эди.
9. Унаи ЭМЕРИ (Испания) - 0,66 млрд. евро
Дунё футболининг энг қимматбаҳо хариди қайси мураббий учун амалга оширилган? Унаи Эмери учун: «ПСЖ» Неймарга эга бўлиш йўлида «Барселона»га 222 миллион евро тўлаган вақт Париж жамоасини айнан испан мутахассиси бошқараётган эди. «ПСЖ»нинг унга яна бир совғаси - Килиан Мбаппе. Тўғри, Эмерини барча клубларда шундай сийлашмаган, акс ҳолда, у рейтинг етакчисига айланарди...
8. Рафаэль БЕНИТЕС
(Испания) - 0,75 млрд. евро
Катта тажрибага эга, бироқ турлича таассурот уйғотган испаниялик яна бир мураббий. Фарқи шуки, у иккинчи даражали еврокубоклар ва французча совринлар билан чекланиб қолаётган Эмеридан фарқли ўлароқ, ЧЛда буюк ғалабани тантана қилган. Умуман, Рафаэль фаолияти давомида «Ливерпуль», «Интер», «Реал», «Челси», «Валенсия» ва «Наполи» каби йирик клубларни бошқарди. Шундай экан, умумий харажати 0,75 миллиард еврога етганида ажабланадиган томони йўқ.
7. Клаудио РАНЬЕРИ
(Италия) - 0,8 млрд. евро
Раньери эҳтимолки, катта мураббийлар орасида энг омадсизидир. Мисол учун, «Ювентус» Клаудио даврида 120 миллион еврога футболчи сотиб олган, аммо у «кекса синьора» музейига бирорта соврин қўшолмаган. Парадокс: Раньери кейинчалик «Лестер»да катта харажатсиз ҳам оламшумул «сюрприз» тақдим этди - камтарона таркиб билан АПЛ шоҳсупасига кўтарилди.
6. Роберто МАНЧИНИ
(Италия) - 0,8 млрд. евро
Италиялик Раньери ва Манчини томонидан сарфланган сумма тенг, фақат шуниси борки, Клаудио ҳамкасбидан 14 ёш катта. Оддий айтганда, Роберто 800 миллионни юқори суръатда «сочган». Унинг зиммасидаги суммадан кўпи «Манчестер Сити»га тегишли. Манчини эндиликда терма жамоада ишламоқда, демак, яқин орада умумий харажат миқдори ошмайди.
5. Массимилиано АЛЛЕГРИ (Италия) - 1,03 млрд. евро
Мана, миллиард евро довонидан ошган жаноблардан биринчиси. Биласизми, 1 миллиард евро энг юқори қийматга эга купюра (500 евро) билан ўлчанса, тарозида қанча тош босади? 2 тонна ва яна 200 килограмм! Шунча пулни қўлда кўтариб туриш иложсиз, аммо Макс Аллегри нақ 1 миллиард еврони «ўйнатгани» билан мақтаниши мумкин. Итальян мураббийи коллекциясининг жавоҳири - Криштиану Роналду. Унга португалияликни «Ювентус» тортиқ этганди.
4. Мануэль ПЕЛЛЕГРИНИ (Чили) - 1,05 млрд. евро
Чилилик мутахассис учун ҳам бир сафар айнан Криштиану Роналдуни сотиб олишганди. Пеллегрини розилиги билан амалга оширилган сара трансферлар орасида яна Карим Бензема ва Хаби Алонсоники ҳам бор. Барчаси Мануэль «Реал»ни бошқарган даврда рўй берган. Чилилик кейин «Манчестер Сити»да тўкин ҳаётдан яйради. Бироқ у энг серхаражат мураббийлар қаторида энг кам эффект келтиргани бўлиб қолди. 1 миллиарддан кўп маблағ эвазига атиги 3та соврин - бу улкан муваффақиятсизлик, шубҳасиз.
3. Хосеп ГВАРДИОЛА
(Испания) - 1,15 млрд. евро
Таққослаш учун: Гвардиола трансферларга Пеллегринига нисбатан атиги 100 миллион евро кўп сарфлаган ҳолда, нақ 26та соврин ютди. Тўғри, Хосепнинг яхшигина старт позициясига эга бўлганини унутмаслик керак. Ҳарқалай, «Барселона»да Хави, Андрес Иньеста, Карлес Пуйоль ва албатта, Лионель Месси каби ижрочиларга бир чақа ҳам сарфлагани йўқ. Муҳими, Пеп Германия ва Англияда ҳам юқори савиясини намойиш эта олди. Гвардиола — қимматбаҳо мураббий, лекин футболда натижа йўлида харажат қилмаса бўлмайди...
2. Карло АНЧЕЛОТТИ
(Италия) - 1,23 млрд. евро
Эътибор бердингизми, рейтингда испаниялик ва италиялик мутахассислар кўп. Аниқроқ айтсак, Испаниядан 3 нафар вакил бор - Эмери, Бенитес, Гвардиола. Италия эса 4 нафар серхаражат мураббийга эга - Раньери, Манчини, Аллегри ва Анчелотти. «Карло ота» фаолияти давомида энг сара клубларни бошқарди, шундай экан, унинг шов-шувли трансферлардан яхшигина тўплам ҳосил қилгани - оддий ҳол.
1. Жозе МОУРИНЬО
(Португалия) - 1,56 млрд. евро
Мана, ниҳоят, беназиргина Жозега ҳам етиб келдик. Қаранг, у энг яқин таъқибчисини «қандайдир» 300} миллион еврога ортда қолдирмоқда. Моу «бой жамият»да яшаш ва хоҳлаган футболчини сотиб олишга ўрганган. Португалиялик ҳозир «Тоттенхэм» таркибидан тўлиқ қаноатналаётганини айтиш баробарида баъзи ўйинчиларга кўз олайтирмоқда. Демак, клуб фалсафасини бироз ўзгартириш ҳаракатига тушган кўринади...
А.ҲАМИДОВ тайёрлади.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20