Жорий мавсумга қадар фақат битта жамоа еврокубоклардаги дебютида Чемпионлар Лигаси «плей-офф» босқичига чиқишни уддалаганди - 2002 йили «Ньюкасл» шундай ютуққа эришган. Энди эса унинг сафига «Аталанта» ҳам қўшилди. Тўғри, Италиянинг бу клуби дастлаб бор имкониятларини кўкка совургандек туюлганди - учта ўйинда умумий 2:11 ҳисобида ютқазди. Кейин эса «Манчестер Сити» билан оғир дуранг (1:1), «Динамо» ва «Шахтёр» устидан қозонилган ғалабалар ортидан сенсацион воқеа кузатилди. Умуман, «Аталанта»нинг ушбу муваффақиятига ажабланмаса ҳам бўлаверади, зеро жамоа бунга анчадан буён тайёрланаётганди.

«Аталанта»нинг бош юлдузи - Гасперини

2016 йили «Аталанта» Жан Пьеро Гасперинини таклиф қилиб, ундан ҳеч бўлмаганда турнир жадвали ўрталарига чиқиш йўлида ёрдам кутди. Ваҳоланки, бу ҳамкорликнинг амалга ошиши сўроқ остида турганди. Гасперинига Италияда омад кулиб боқмаётганди: мураббийлик фаолиятидаги асосий жамоаси («Интер»)да муваффақиятсизликка учради, ўртамиёналар («Палермо» ва «Женоа») билан эса керакли натижаларга эришолмади.

«Аталанта» Гасперини учун рақобатда Франция, Англия ва Италия жамоаларини ортда қолдирди. Шу тариқа клубдаги ўсиш даври бошланди. Бир мавсумнинг ўзида 4-поғонага кўтарилди. Бир йилдан кейин чемпионатни кучли ўнлик (7-ўрин)да якунлади. Мавсум-2018|2019да 3-ўрингача чиқиб, ўз тарихида илк маротаба Чемпионлар Лигаси гуруҳ босқичида қатнашиш ҳуқуқини қўлга киритди.

Май ойида италиялик журналистлар ўзларини қўярга жой тополмадилар - барчалари Гасперинидан интервью олиш, унга деярли бир хил савол билан мурожаат этишни орзу қилишарди: «Буларнинг барини қандай уддаладингиз?». Мураббий эса хотиржам оҳангда жавоб қайтарди: «Чемпионлар Лигасига чиқишни орзу ҳам қилмагандик. Авваллари бундай ютуққа эришмагандик, аммо шунга лойиқ эдик. Ўйлашимча, «Аталанта» келгуси мавсум ЧЛда муносиб тарзда қатнашади».

Гасперини «Аталанта»да уч мавсумдан буён ишламоқда ва шу вақт мобайнида ўзига яраша обрў орттирди: уни ҳамма тинглайди, яхши кўради ва жуда ҳурмат қилади. Яққол мисол: ёзда Гасперини клуб президенти Антонио Перкассига учраб, клубда кучли футболчилар етарли эмаслигини айтди. Шу тариқа Муриэль, Пашалич ҳамда Руслан Малиновский сингари ўйинчилар «Аталанта» аъзосига айланишди.

Замонавий «Аталанта» - айнан Гасперини йўлга қўйган стратегия самарасидир. Бунга қадар жамоада ёши 30дан ошганлар (Борьелло, Пинилья ва бошқалар) етакчилик қилишарди. Ҳозир ёш кўрсаткичи бироз пасайган. Гасперини дастлабки суҳбатдаёқ Перкассига жамоа­ни ёшартириш орқалигина Турин, Неаполь, Милан ва Римдаги кучли рақибларга муносиб рақобат туғдириш мумкинлигини тушунтирганди. Гасперини функционерни бундай йўналиш нафақат натижалар, балки молиявий ҳисоботларга ҳам ижобий таъсир ўтказиши мумкинлигига ишонтирди.

Мураббийнинг режалари иш берди. Эвазига у Перкассининг чексиз ишончига сазовор бўлди. Ўтган мавсум Гасперинининг «Милан»га ўтиши мумкинлиги ҳақида хабарлар тарқалганда, Перкасси шундай деганди: «Улар мураббийимизни қўлга киритолмайдилар. Бунинг учун каттагина компенсация тўлашларига тўғри келади. Қолаверса, Жан Пьеронинг фикрини ҳам ҳисобга олиш керак - айни пайт унинг фикру хаёли бизнинг жамоа билан банд».

Гасперини футболчиларига ўзларини яхши кўришни ўргатди - ўтган вақт мобайнида у бирор маротаба шогирдлари билан кескин келишмовчиликларга дуч келмади. Аксинча, улар оммавий тарзда мураббийга миннатдорчилик билдиришади. Қуйида «Аталанта» ўйинчиларининг Гасперини ҳақидаги фикрларига эътибор қаратсак:

* Алехандро Гомес: «Мистер - жамоамизнинг юраги. У менга мураббий сифатида жуда ёқади. Шунингдек, унга футболга алоқадор бўлмаган бошқа масалалар юзасидан ҳам мурожаат этишим мумкинлигини биламан».

* Йосип Иличич: «Гасперини бу «Аталанта»га жуда керак. Билмайман, агар Жан Пьеро кетганида, жамоамиз шундай натижаларга эриша олармиди. У - бизнинг етакчимиз».

* Мартин Де Рон: «Гасперини билан ишлаш мен учун жуда қулай. У ягона, аммо қандайдир нотўғри жиҳатларни кўрса, уни тушунтиради. Жан Пьеро буюк мураббий».

«Аталанта» - катта клублар учун

«супермаркет»

Таркибни ёшартириш мавзусига қайтамиз. «Ювентус»да Гасперини ишни айнан ёшлар жамоасида бошлаган - «Юве» раҳбарияти унда навқирон футболчилар билан ишлашга бўлган иштиёқни пайқаган. Бу хоҳиш Гасперинига бутун мураббийлик фао­лиятида ҳамроҳлик қиляпти.

Айни пайт «Аталанта» штабида икки нафар маҳаллий, шунингдек, «Милан», «Лацио», «Верона», ва «Пескара»дан келган скаутлар ишлашмоқда. Жан Пьеро уларнинг ҳаммасини ўзига хос стратегия асосида танлаган.

Гасперини келгач, «Аталанта» ёш футболчиларни ўстириш ва уларни бошқа клубларга йирик суммага сотишга мослашди. Сўнгги трансфер ойналарига эътибор қаратсак (ёзги ва қишки бозор инобатга олинган):

Мавсум-2017|2018. Бастони, Гальярдини ва Конти 75,6 миллион еврога сотилди. Қўшимчасига, «Аталанта» Кессьени «Милан»га ижарага бергани учун 8 миллион олди.

Мавсум-2018|2019. Петанья, Кристанте кейинчалик сотиб олиш ҳуқуқи билан ижарага берилди.

Мавсум-2019|2020. «Аталанта» Кессье, Кристанте ва Петаньининг трансфер ҳуқуқларини сотиш орқали 57 миллион ишлади. Шунингдек, «Рома» Манчинини 2 миллион еврога ижарага олиб, шартномага футболчини кейинчалик 22 миллионга тўлиқ сотиб олиш тўғрисида банд киритди.

Гасперинига бундай шароитда ишлаш қулай. Мана тўртинчи мавсумдирки, ушбу стратегия «Аталанта»нинг янги мавсумга режалаштирган бюджетининг катта қисмини қопламоқда. Қўшимчасига, натижалар яхшиланмоқда. Футболчи сотиш орқали «Аталанта» жорий йилнинг ёзида таркибини Малиновский, Пашалич ва Муриэль ҳисобига кучайтирди. Бу ўйинчилар таркибга тезда киришиб кетишди, иккиси умуман, етакчиларга айланишди. Гасперинининг ўзи эса анчадан буён таъкидлайди: «Ёш футболчиларга ишонаман. Баъзан улар «қария»лардан кўра кўпроқ фойда келтиришади».

Ақлли стратегия четдан ҳам даромад келтиряпти. 3,5 йил ичида Гасперини идеал таркиб тузди, ЕЧЛ «плей-офф» босқичига чиқди ва шу тариқа 40 миллион евро ишлади. Football Italia тарқатган хабарга кўра, ушбу пуллар эвазига «Аталанта» Пашаличнинг трансфер ҳуқуқини «Челси»дан сотиб олади.

«Аталанта» - Италия «Лестер»и

Forbes вакили Хлое Бересфорд қизиқарли фикр билдирди. Унинг таъбирича, бугунги «Аталанта» кўп жиҳатдан АПЛ чемпионлигини қўлга киритган Ранье­рининг «Лестер»ига ўхшайди:

1. «Аталанта», худди «Лестер» каби, мавсумда катта натижалар қайд этишга ошиқмаяпти: Гасперини «А» серияда қолиш жамоанинг асосий вазифаси эканини таъкидлади.

2. «Аталанта»нинг «А» сериядаги ҳозирги ҳолати «Лестер»нинг АПЛдаги ҳолатига ўхшаш. La Gazzetta dello Sport нашрининг йиллик молиявий ҳисоботи кўрсатди: «Аталанта» «А» серия клубларидаги маошлар рейтингида 13-ўринни эгаллаб турибди.

3. Гасперини рақиб қайси жамоа бўлишидан қатъий назар, ҳужумкор футбол кўрсатишни хоҳлайди. Бересфорднинг фикрича, бу ҳам «Аталанта» ва «Лес­тер» ўртасидаги муштаракликнинг бир кўриниши.

А.ҲАМИДОВ тайёрлади.