Кўрсаткичлар тилга кирса...

26.12.2019 05:33

538

CIES футбол обсерваторияси евромавсумнинг биринчи қисмини сарҳисоб қилиб, энг яхши футболчилар рейтингини тузиб чиқди. Гуруҳ экспертлари бунда InStat Index маълумотларига таянишган. Рейтинг шакллантиришнинг тизими оддий - ҳар бир футболчининг ўйинлардаги фойдали ҳаракатлар коэффициенти ҳисобга олинади. Оддий ифода этганда, голлар ва самарали узатмалардан тортиб, оддий «пас»лар, тўп олиб қўйишлар, ютилган яккакурашлар, қўйингки, футболнинг барча элементлари сонига эътибор қаратилади.

CIESнинг янги рейтингида бир қатор кутилмаган натижаларни кўриш мумкин. Ҳисоб-китобларга кўра, «Олтин тўп»нинг янги ва эски соҳиби Лионель Месси ҳаммадан кўп балл йиғди. «Барселона» етакчисининг энг яқин таъқибчиси 34 баллга ортда қолди. Йўқ, гап Криштиану Роналду ёки Эден Азар эмас, балки «Аякс» хавбеки Ҳаким Зиеш ҳақида кетмоқда. Энг яхши футболчилар рейтингида 3-қаторга Килиан Мбаппе жойлашди. Роналду-чи? У ...25-ўринда. Виржиль ван Дейк (11-ўрин), Садио Мане (12-ўрин), Роберт Левандовски (13-ўрин) ва Раҳим Стерлинг (16-ўрин)га ҳам кучли 10таликдан жой топилмади. Алехандро Гомес («Аталанта»), Рикарду Перейра («Лестер») ва Мемфис Депай («Лион») каби нисбатан камтарин футболчилар эса рўйхатнинг дастлабки 20талигига киришди. Яна Роналду ҳақида: «Ювентус» етакчиси ҳаттоки, «А» серия рейтингида ҳам атиги 5-ўринни эгаллади. Италия чемпионатида Чиро Иммобиле («Лацио»), Алехандро Гомес («Аталанта»), Дуван Сапата («Аталанта) ва Стефано Сенси («Интер») португалиялик юлдуздан кўпроқ балл тўплашди.

Евромавсум-2019|2020нинг энг яхши футболчилари (топ-10)

Ўр.	Футболчи	Чемпионат	Клуби	Позицияси	Индекс
1	Лионель Месси	Испания	«Барселона»	Ҳужумчи	401
2	Ҳаким Зиеш	Нидерландия	«Аякс»	Ҳужумчи	377
3	Килиан Мбаппе	Франция	«ПСЖ»	Ҳужумчи	366
4	Риёд Маҳрез	Англия	«Манчестер Сити»	Ҳужумчи	362
5	Анхель ди Мария	Франция	«ПСЖ»	Ҳужумчи	360
6	Неймар	Франция	«ПСЖ»	Ҳужумчи	358
7	Тимо Вернер	Германия	«РБ Лейпциг»	Ҳужумчи	357
8	Чиро Иммобиле	Италия	Лацио	Ҳужумчи	355
9	Кевин де Брюйне	Англия	«Манчестер Сити»	Ярим ҳимоячи	354
10	Эндрю Робертсон	Англия	«Ливерпуль»	Ҳимоячи	353

Дарвозабонлар рейтингига алоҳида назар ташласак, Фредерик Реннов («Айнтрахт») етакчи бўлиб турибди. Диққатга сазовор томони, бу рўйхатнинг 6-ўрнида «Зенит» вакили Михаил Кержаков қайд этилди.

Ўр.	Футболчи	Чемпионат	Клуби	Индекс
1	Фредерик Реннов	Германия	«Айнтрахт»	317
2	Войцех Шесни	Италия	«Ювентус»	314
3	Марвин Хитц	Германия	«Боруссия» Д.	313
4	Стив Манданда	Франция	«Марсель»	312
5	Каспер Шмейхель	Англия	«Лестер»	308

Ҳимоячилар орасида Эндрю Робертсон («Ливерпуль») жамоадоши Виржиль ван Дейкни озгина ортда қолдирди. «Лестер» вакили Рикарду Перейранинг 3-ўринни банд этгани эътиборга молик факт.

Ўр.	Футболчи	Чемпионат	Клуби	Индекс
1	Эндрю Робертсон	Англия	«Ливерпуль»	353
2	Виржиль ван Дейк	Англия	«Ливерпуль»	350
3	Рикарду Перейра	Англия	«Лестер»	336
4	Жоэль Фелтман	Нидерландия	«Аякс»	335
5	Бен Чилуэлл	Англия	«Лестер»	332

Кутилганидек, «Манчестер Сити» ярим ҳимоячиси Кевин де Брюйне ўз амплуадошлари орасида мутлақ тенгсиз. 2-ўрин соҳибига қаранг - «Аталанта»ни олға бошлаётган Алехандро Гомес.

Ўр.	Футболчи	Чемпионат	Клуби	Индекс
1	Кевин де Брюйне	Англия	«Манчестер Сити»	354
2	Алехандро Гомес	Италия	«Аталанта»	344
3	Марко Верратти	Франция	«ПСЖ»	337
4	Стефано Сенси	Италия	«Интер»	332
5	Луис Альберто	Италия	«Лацио»	330

Лионель Месси - ҳужум қироли! Риёд Маҳрез («Манчестер Сити») ва Анхель ди Мария («ПСЖ»)нинг олдинги чизиқ рейтингида кучли 5таликдан жой олишгани ғалати. Ахир улар аслида ҳужумчи эмаслар-ку... 2-ўриндаги Ҳаким Зиеш ҳақида ҳам шундай дейиш мумкин.

Ўр.	Футболчи	Чемпионат	Клуби	Индекс
1	Лионель Месси	Испания	«Барселона»	401
2	Ҳаким Зиеш	Нидерландия	«Аякс»	377
3	Килиан Мбаппе	Франция	«ПСЖ»	366
4	Риёд Маҳрез	Англия	«Манчестер Сити»	362
5	Анхель ди Мария	Франция	«ПСЖ»	360

Шомуродов 173-ўринда...

InStat Index баллари бўйича Россия Премьер-лигасининг биринчи қисмида Артём Дзюба («Зенит») етакчи — 315 очко. ЦСКА вакили Марио Фернандес (313 балл) ва «Краснодар» ҳужумчиси Вандерсон (312 балл) ундан бироз орқада қолишди. Чемпионатнинг топ-10талигига яна Вячеслав Караваев, Гжегож Криховяк, Алексей Миранчук, Дуглас Сантос, Магомед Оздоев, Никола Влашич ва Самуэль Жиго киришди. «Ростов»да тўп сураётган ҳамюртимиз Элдор Шомуродов эса 286 балл олиб, еврофутбол ҳужумчилари рейтингида 173-ўринни олди. Эслатма, Элдор Whoscored талқинидаги рейтингда Россия чемпионатининг иккинчи рақамли футболчиси сифатида эътироф этилганди (Артём Дзюбадан кейин).

Манба: interfutbol.uz

InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.