«Монпелье» ярим ҳимоячиси Дамьен Ле Таллек Россия паспортини олишга қарор қилди. Боз устига, 29 ёшли футболчи ушбу мамлакат термаси сафида тўп сурмоқчилигини билдирди. Бунга қадар у рус футболи билан танишишга улгурган: Ле Таллек бир ярим мавсум - 2014 йилнинг июлидан 2015 йилнинг декабригача «Мордовия» таркибида ўйнаган. Айни пайтда эса Франция чемпионатида 12-ўринни эгаллаб турган жамоа аъзоси.

Бу қонунийми?

Россияда беш йилдан ортиқ тўп сурган ҳар бир футболчи РФ юридик паспорти олишга даъвогарлик қилишлари мумкин. Масалан, Гильерме ва Ари айнан шундай йўл тутишган. Марио Фернандеснинг паспортга эга бўлишига эса мамлакат президенти Владимир Путиннинг фармони сабаб бўлган. Ле Таллек Россияда беш йил ўйнамаган, ихтиёрида президент фармони ҳам йўқ, аммо рафиқаси россиялик, Москвада уйи бор, ўғли ҳам РФ фуқароси. Шундай экан, футболчида иккинчи паспортни олиш учун асослар етарли.

Ле Таллек нима дейди?

- Россия фуқаролигини олишга бир неча ой олдин киришдим. Ҳужжатлар ва қоғозлар бўйича кўплаб масалаларни ҳал қилдим. Билишимча, паспорт тез орада тайёр бўлади. Россияни, ушбу мамлакат маданиятини, одамларининг менталитетини яхши кўраман. Мен учун Россия термасида тўп суриш катта шарафдир. Миллий жамоа бош мураббийи ўйинимни кўриб, термага потенциал номзод сифатида кўриши, номимни унутмаслиги учун қўлимдан келган ҳамма ишни қиламан, - деди Ле Таллек «Известия» нашрига берган интервьюсида.

У Қандай футболчи?

Асосий оёғи - ўнг. Бу мавсум асосий таркиб футболчиси сифатида тўп сурмоқда. Франция чемпионатининг 18та тур учрашувларининг ҳаммасини бошланғич таркибда бошлади. Одатда, Ле Таллек таянч ярим ҳимоячиси (баъзан марказий ярим ҳимоячи) позициясида ўйнайди. «Мордовия»да ҳам худди шу позицияда тўп сурганди. Саранск клуби собиқ бош мураббийи Андрей Гордеев «Чемпионат» вакилига берган интервьюсида Дамьеннинг Россия термасига ёрдами тегиши мумкинлиги ҳақида гапирганди.

«Мордовия» Ле Таллекни «Црвена Звезда»га 250 минг еврога сотганди (футболчининг шартномаси ярим йилдан кейин тугарди). Transfermarkt сайти берган маълумотларга кўра, шундан сўнг ярим ҳимоячининг нархи 4 млн. еврогача ошган. Ле Таллекка Россия термасида рақобат туғдириши кутилаётган футболчилар ҳам бундан арзон эмаслар: Оздоев (4 млн.), Ахметов (8 млн.), Кузяев (11 млн.), Зобнин (14 млн.). Мазкур ҳолатда россиялик бу ўйинчиларнинг Дамьендан ёшроқ эканликлари ҳам нархга таъсир кўрсатган.

Бир «лекин»и бор...

Афсуски, Ле Таллек РФ паспортини олгани билан Россия термасида ўйнай олмайди. Бу ҳақда спорт юристи Юрий Зайцев хабар берди.

- Агар Дамьен Франция термаси сафида расмий ўйинда қатнашган бўлса, Россия миллий жамоасида тўп суролмайди. Терманинг даражаси бу ерда аҳамиятсиз - ўсмирларми ёки ёшлар жамоасими, фарқи йўқ. Агар Франция термасида ўйнаган пайтида Россия фуқаролигига эга бўлганида, бошқа гап эди. Аммо унда бизнинг паспорт йўқ. Хуллас, у Франция миллий жамоасида ўйнамаган бўлсада, Россия термаси сафига қўшилолмайди, - деди Зайцев.