Такуми Минамино энди «Энфилд» ўғлони. Қизиқ, «Ливерпуль» кимни харид қилди? Жорий мавсум «Зальцбург»да порлаган япониялик иқтидор ҳақида нималарни билиш керак? Юрген Клопп унинг айни қайси хусусиятига қизиқиб қолди? Ўйлаймизки, Япония футболининг эртанги умиди билан яқинроқ танишиш фурсати етди. Бунда бизга soccer.ru сайти тўплаган маълумотлар жуда асқотади.

«Ливерпул»нинг «Уотфорд»га қарши ўйини арафасида Юрген Клопп япониялик журналистлар қуршовида қолди. Ўртадаги диалог мазмунига эътибор қаратинг:

Клопп (кулимсираганча): - Нега бу ердасизлар?

Япониялик журналист: - Ўйлайманки, бу саволингиз жавобини ўзингиз жуда яхши биласиз.

Клопп: - Ҳа (кулади)... Энди сизлар билан тез-тез кўришиб турсак керак.

Япониялик журналист: - Сизнинг Шинжи Кагава билан ишингиз зўр чиққанди. Бу япон футболида рўй берган энг яхши воқеликлардан бири. Сўрамоқчи бўлганим, япон футболчиси билан ҳамкорлик ўзингизга ёққанмиди?

Клопп:- О-о-о, қаранг-а! Демак, ҳозир Минамино эмас, Кагава ҳақида гаплашар эканмиз-да (кулади). Ажойиб! Кагава билан ишлаш менга мароқ бағишлаганди.

Суҳбат мазмунидан билиниб турибди - германиялик мураббий яна бир японни юқори даражага олиб чиқиш умидида. Хўш, Такуми Минамино ким? Гап жуссаси нисбатан кичик, тезкор, эпчил ва ҳаракатчан япон ҳужумчиси ҳақида кетмоқда. Такумининг бўйи ўртачадан бироз паст (174 сантиметр), лекин у ақл бовар қилмас даражада меҳнаткаш ва анча самарадор футболчи. Минамино деярли 5 йилдан буён Европада ўйнамоқда, гарчи жорий мавсумдагина яққол кўзга ташланган бўлсада. У бу даврнинг тўлиқ «Зальцбург»да ўтказиб, бинойидек статистика қайд этишга улгурди: Австрия клуби сафида жами 199та расмий ўйинда майдонга тушиб, 64та гол уришдан ташқари, 44та самарали узатма муаллифига айланди. «Гол } пас» тизимида 108 очко - муносиб натижа! Минамино 64та голидан бирини «Энфилд»да айнан «Ливерпуль» дарвозасига урди. Жорий ЧЛ гуруҳ босқичи доирасида ўтказилган «хушчақчақ» ўйинни бир эсланг: ўшанда трансляция режиссёри Такумининг голидан кейин Клоппни қайта-қайта кўрсатган эди. Чунончи, немис мураббийи худди ўз жамоаси футболчиси урган голдан лол қолгандек таассурот уйғотганди. Ҳа, энди ойдинлашича, у бўлажак шогирди зарбасидан ҳайратланган экан...

Савол: Минамино «Ливерпул»га нима учун керак?

1. Бу суперманфаатли келишув: Такуми Минамино ва «Зальцбург» ўртасидаги шартномада арзимас товон пули кўрсатилганди - 8 миллион евродан ҳам кам. Тан олайлик, бу сумма нафақат «Ливерпул»дек гранд, балки АПЛнинг ҳар қандай клуби учун «сариқ чақа» ҳисобланади. Футболчи эса 8 миллионга бемалол жавоб берадиган ҳолатда, айниқса, ҳозир.

2. Минамино ўйин услуби жиҳатидан «Ливерпул»га идеал даражада мос тушади. Мана, «Ред Булл» оиласига қарашли футбол клубларининг спорт бобидаги ишларини усталик билан бошқараётган тажрибали мутахассис Ральф Рангник сўзларига эътибор қаратинг: «Бизнинг жамоалар - «Зальцбург» ва «РБ Лейпциг»нинг ўйин услуби Юрген Клопп фалсафасига жуда ўхшаш. У жамоаси майдонда ҳамиша ташаббусга эришиши, тинимсиз «прессинг» қўллашини истайди. Биз эса ҳеч қачон тўпни орқага узатмаймиз, майдон эни йўналишида «пас» беришни ҳам оқламаймиз. Фақат олдинга, яна имкон борича тезроқ! Шундагина гол уриш учун қулай вазиятлар тез-тез юзага келади. Барчаси «Ливерпуль» ўйинини эслатмаяптими? Йўқ, бу шунчаки, тасодифий ўхшашлик эмас. Қаранг, «Ливерпул»нинг бугунги таркибида 4 нафар собиқ шогирдим тўп сурмоқда - Роберто Фирмино, Наби Кейта, Садио Мане ва Жоэль Матип. Юрген, менга раҳмат айтишинг шарт эмас. Ҳамма гап шундаки, иккимиз ҳамиша ўхшаш хусусиятларга эга футболчиларни қидирамиз. Менимча, Минамино ҳам «Ливерпуль» ижросидаги футболга идеал даражада мос. У япониялик кўплаб ўйинчилар каби ўта тезкор ва меҳнаткаш. Яна техник қобилияти баланд. Иштиёқ ва характер масаласида ҳам муаммоси йўқ. Асосийси, Такуми ҳали янада ўсиш имкониятига эга».

3. Минамино трансфери — бу яна «МЮ»га қаратилган зарба. Ҳар ҳолда, манчестерликлар бир неча ойдан буён япониялик йигитни кузатишаётганди. Кўринишидан, «МЮ» вакиллари Такумининг «Зальцбург» билан шартномасида «писта нархи»да товон пули белгиланганини билишмаган, шекилли. Акс ҳолда, трансфер масаласида амалий ҳаракат бошлашни бунчалик пайсалга солмасди.

4. Такуми Минамино ЧЛ гуруҳ босқичидаги 6та ўйинда 2та гол уриб, яна 3тасига ассистентлик қилди. ЧЛда ҳеч ким ўйин ҳолатидан жамоадошлари голларига «Зальцбург»нинг япониялик топилмаси каби 3 марта ҳаммуаллифлик қилгани йўқ (стандарт вазиятлардан узатилган тўплар ҳисобга киритилмаган). Бу жиддий натижа, шундай эмасми?

5. Smarterscout мутахассисларининг ҳисоб-китобларига мувофиқ, Минаминонинг ўйин ҳаракатларидаги кўрсаткичлари кўп жиҳатдан Адам Лаллана томонидан мавсум-2016|2017да қайд этилган натижаларга ўхшаш. Ўшанда англиялик футболчи Юрген Клопп жамоасида бош роллардан бирини бажарганди. Кутилишича, мавсум якунида шартномаси тугайдиган Лаллана ёзда «Ливерпуль» билан хайрлашади. Шуни назарда тутсак ҳам, Такуми трансфери мантиқан тўғридек.

Қизиқарли факт! Минамино 17 ёшидан футбол ичида. У Австрияга кўчиб ўтишидан олдин жонажон клуби - «Сересо Осака»да тўлиқ икки мавсум ўйнашга улгурганди (85та учрашувда 17та гол урган). Такуми жумладан, Японияда кимсан Диего Форлан билан елкама-елка тўп сурган. Машҳур уругвайлик «Сересо»да асосан марказий ҳужумчи ролини бажарган бўлса, Минамино чап қанотда ҳаракатланган. Такуми — универсал ҳужумкор ўйинчи. Бу ҳам «Ливер-пул»ни қизиқтириб қўйган сабаблардан биридир. Зеро, Клопп ўзининг ҳужумкор гуруҳида ҳар қандай позицияда бемалол тўп сурадиган футболчилар тўпланишларини истайди. Бу таркибда ротация қилиш, эффектлилик ва ўзгачалик даражасини ошириш учун муҳим. Шу маънода айтсак, Минамино — идеал номзод. Ёрқин мисол: япон йигити жорий мавсум камида 1 соатдан ўйин вақтини нақ 5та позицияда ўтказди. Яъни ўнг қанот хавбеки|вингери, марказий ҳужумкор ярим ҳимоячи, соф марказий ҳужумчи, чап қанот хавбеки|вингери, марказий ҳужумчи ролида ўйнади. Такуми шунинг баробарида Австрия чемпионатида кўпинча ўнг қанотга жавоб берди, ЧЛда эса ҳужумкор ярим ҳимоячи ёки ортга сурилган ҳужумчи сифатида ҳаракатланди. Эътиборли томони, Минамино «Ливерпул»нинг ҳужумкор учлиги (Муҳаммад Салоҳ - Садио Мане - Роберто Фирмино)да хоҳлаган футболчи ўрнини бемалол тўлдириши мумкин. Тўғри, барчаси Юрген Клоппнинг ўйин чизмасига боғлиқ. Эҳтимолки, у япон йигитидан марказда балансни ушлашда фойдаланар... Лекин Такуми ҳар қандай ҳолатда ҳам, ҳужумга яқин позицияга қўйилса керак. У яна Фирминони эслатади — меҳнаткаш ва 100 фоизга жамоавий ўйинчи. Японияда эса Минаминони негадир индивидуал томондан кучли саналган Неймарга қиёслашади. Бироқ бу ўхшатиш бироз ғалати, албатта.

Минамино АПЛга тайёрми? Буни билиш учун кутиш керак, холос. Футболчи чиндан ҳам, қизиқарли ижрочи, лекин иккинчи томондан қарасак, унинг «Зальцбург»даги кўплаб кўрсаткичлари «Ливерпуль» стандартидан пастроқ. Фақат ҳисобга олиш керак, нисбатан савияли жамоадошлар даврасига тушгач, Минаминонинг кўрсаткичлари бирдан кескин яхшиланиши ҳеч гап эмас. Албатта, Такуми Англияда жиддий юксалишга эришиши шарт. Акс ҳолда, Клопп ансамбидан жой олиши даргумон. «Қизиллар» эса ҳар қандай вазиятда ҳам, ютқазмасалар керак. Ахир Минаминонинг ўйини қовушмаса, уни бемалол ижара келишуви асосида бошқа клубларга юбориб, харажатни чиқариб олишлари мумкин.

Минамино ҳаҚида 7та факт

1. Арзимас товон пули. «Ливерпуль» Минамино учун «Зальцбург»га атиги 7,25 млн. евро тўлайди. Transfermarkt.de сайти эса японияликнинг трансферини 5 млн. еврога баҳолаган. Тўғри, энди унинг баҳоси кескин кўтарилса керак. Ҳар ҳолда, Такуми ЧЛдаги ўйинлари билан анча юқори баҳога лойиқлигини исботлади.

2. Позиция танламайди. Ҳа, Минаминонинг энг асосий устунлиги - бу универсаллик. У майдонда ярим ҳимоя ва ҳужумнинг хоҳлаган позициясида ўйнаш тажрибасига эга.

3. Форлан шогирди. Такуми фаолиятини худди Шинжи Кагава каби «Сересо Осака»да бошлаган. У бу клубда Диего Форлан билан тандем ҳосил қилиб, уругвайлик голеадордан кўп нарса ўрганган. Зальцбургга кўчиб ўтгач эса, ҳафтасига 2 марта немис тили курсига қатнади. Эътиборли томони, Минамино ҳозир 24 ёшда бўлсада, «Инстаграм»да шахсий саҳифаси йўқ.

4. Австриядан кетишни истамаган. Минамино фаолиятини аста-секин ривожлантиришни мақсад қилган. Дейлик, бир йил аввал ўшанда ЧЛда ўйнаётган «Олимпиакос»нинг манфаатли таклифини рад этганди.

5. Еврокубокларда «хет-трик»ка эришган биринчи япон. Такуми ўтган йили ноябрь ойида ЕЛ доирасида «Русенборг»га қарши кечган ўйин (5:2)да 3та гол уриб, ҳафтанинг энг яхши футболчиси мақомига эришди. Бунга қадар япониялик бирор футболчи еврокубок ўйинида «хет-трик» қайд этмаганди. Жорий мавсум ЧЛда эса «Энфилд»да «Ливерпуль» дарвозасини нишонга олишдан ташқари, Эрлинг Холанд голига ассистентлик қилди. The Times нашрида ёзилишича, ўша ўйиндан кейин «Ливерпул»нинг бир қатор футболчилари Клоппга мурожаат қилиб, японияликка алоҳида эътибор қаратишни сўрашган экан.

6. Япония термасининг янги юлдузи. Минамино 2018 йилдан  буён ўз мамлакати миллий жамоасида бош роллардан бирига чиқди. Дейлик, у ЖЧ-2022 саралаш босқичининг 4та ўйинида 5та гол урди. Японлар Осиё кубоги-2019да эса финалга чиқиб, Қатар термасига 1:3 ҳисобида ютқазиб қўйишди. Ўшанда ҳам «кунчиқар юрт» термасининг ягона голини Минамино урганди.

7. «Ливерпул»да дўсти бор. Минамино «Зальцбург»да Садио Мане билан дуч келиши мумкин эди. Бироқ япониялик футболчи Австрия клуби сафига қўшилганида, сенегаллик ҳужумчи «Саутгемптон» билан шартнома тузишга улгурганди. Лекин Такуми «Зальцбург»да Наби Кейта билан бирга ўйнаган ва ўрталарида дўстлик ришталари боғланган. Улар Австриядаги битта тўлақонли мавсумда биргаликда 27та гол уриб, 13та самарали узатмага муаллифлик қилишган.

У.УМАРОВ тайёрлади.