«Интер» - Женоа» ўйини (21 декабрь)нинг 64-дақиқасида «нерадзурралар» бош тўпурари Ромелу Лукаку пенльти тепиш ҳуқуқини кутилмаганда, 17 ёшли ўсмирга берди ва у дарвозани ишғол қилиб, голни онаси билан бирга нишонлади. Себастьяно Эспозито учун сеҳрли ўйин ва унутилмас оқшом. Ҳа, «А» сериянинг 17-турида чиройли воқелик кузатилди. «Интер» ўз майдонида «Женоа»ни енгишда муаммо сезмади (ўйин 4:0 ҳисобида якунланди). Учрашув қаҳрамони - Ромелу Лукаку «дубль» қайт этишдан ташқари, кўпчиликни бефарқ қолдирмаган ҳаракатни амалга оширди.

Ўйиннинг 64-дақиқаси, ҳисоб 2:0, албатта, «Интер» фойдасига. Роберто Гальярдини шу лаҳзада Генуя жамоаси жарима майдонига ёриб кириб, жамоасига пенальти тепиш ҳуқуқини олиб берди. Кейин 11 метрли жарима нуқтаси ёнига «Интер»нинг штатли пенальтичиси Ромелу Лукаку эмас, балки 17 ёшли Себастьяно Эспозито яқинлашди. Эътиборли жиҳати, «А» серия тўпурарлари пойгасида «Лацио» вакили Чиро Иммобилени таъқиб этиб келаётган бельгиялик ҳужумчи голлари сонини ошириш учун яхшигина имконияти бўла туриб, ёш Эспозитони зарба йўллашга чорлади. Муҳими, ўсмир йигит дарвозабонни доғда қолдириб, ҳисобни йириклаштирди. Шу тариқа Себастьяно «Интер» тарихида гол урган энг ёш футболчилар рўйхатида 2-ўринга кўтарилди. Бу борада клуб рекорди ўрнатилганига 60 йилдан ошди. Аниқроқ айтсак, Милан жамоаси сафида гол қувончини туйган энг ёш футболчи - Марио Корсо 1958 йили 17 ёшу 97 кунлигида рақиб дарвозасига йўл топганди. Эспозито эса «Женоа»га қарши ўйин куни 17 ёшу 177 кунлик эди. Эҳ, у рекордчи бўлиш учун қандайдир 80 кунга кеч қолди...

Эспозитонинг «нуқта»дан йўллаган голида яна бир ажойиб томони бор - йигитча уни онаси билан бирга нишонлади. «Меҳрибон онажоним - фариштам. У мени тўғри йўлга солди, ҳамиша кучлироқ бўлишимни талаб қилди. Шундай экан, ҳозирги натижам аввало, онамники. Барчаси учун раҳмат, ойижон, сени чинакамига яхши кўраман», - деди Эспозито ўйиндан кейин. - Оилам ҳар бир ўйинимига ташриф буюради. Ҳаттоки, сафар учрашувларига ҳам. Акам Сальваторе «Интер»нинг ашаддий мухлиси. Нав-батдаги голларимдан бирини айнан унга бағишлайман. Кейинги татуировкани эса онажоним учун чиздираман».

Эспозито - қаторасига 2 мавсумдан буён «Интер»нинг асосий таркибига жалб этилаётган ўсмир йигит. У «нерадзурралар»нинг Примаверасида энг катта универсаллардан бири эди. Ҳар ҳолда, йигитча ҳужумнинг ҳар бир позициясида бемалол ўйнай олади. Себастьяно айни шу хислати билан Лучано Спаллетти меҳрини қозонганди, энди эса Антонио Конте ҳам унга алоҳида эътибор қаратмоқда. Тўғри, Эспозито ўсмирлар жамоаларида кўпинча майдон марказига яқин ҳудудда тўп сурарди. Лекин иқтидорли футболчи улғайган сари ҳужум зонасига яқинлашиб борди, албатта, мураббийлар кўрсатмалари билан. «Интер» ёшлар жамоалари мураббийларининг айтишларича, Эспозитонинг асосий устун жиҳатлари кўп - гол «ҳид»ини яхши сезади, дриблинг маҳорати зўр, тезлиги чакки эмас, ўйиннинг ноодатий нозик томонларини тушунади.

Умуман олганда, футболда кўпни кўрган машҳур шахслар Эспозито ҳақида анча олдин гапира бошлагандилар. Мана, айрим фикрлар билан танишиб чиқиб, ўзингиз хулоса чиқаринг.

Антонио Конте («Интер» бош мураббийи): «Ишончим комил, Себастьяно ажойиб ўйинчи бўлиб етишади. Тўғри, у ҳали ўз устида жуда кўп ишлаши керак. Муҳими, Себастьяно  ақл бовар қилмас даражада меҳнаткаш йигит. Ўйлайманки, Эспозито келажакда «Интер»нинг муҳим футболчисига айланади. Бунинг учун унда ҳаммаси мужассам».

Лучано Спаллетти («Интер»нинг собиқ бош мураббийи): «Эспозито футболда катта-катта қадам ташламоқда. Йигитча жуда ақлли. Айни шуниси мураббийларни етарлича қизиқтиради. Агар ҳозирги иштиёқи ва ишга ёндашувини сақлаб қолса, менимча, келажаги ёрқин бўлади».

Жузеппе Бергоми («Интер» афсонаси): «Ўта масъулиятли ва тинмай ривожланаётган иқтидор. Эспозитонинг Антонио Конте ишончига ҳам киргани жуда ажойиб».

Мана, Себастьяно Эспозито 17 ёшига қадар 1-2та муҳим кўрсаткичларни қайд этишга улгурди:

- Европа Лигасидаги дебютини 16 ёшу 255 кунлигида нишонлади. Оддий айтганда, ушбу турнир тарихида майдонга тушган италиялик энг ёш иккинчи футболчи бўлди. Энг ёши - Габриэле Зербо.

- «Интер» тарихида гол урган иккинчи энг ёш футболчига айланди.

Эспозитонинг ўзи эса айрим гапларни тез-тез такрорлайди:

А). Антонио Конте бошқарувидаги машғулотлардан роҳатланаётганини;

Б). «Интер» мухлислари Мауро Икардини унча ҳурмат қилишмасада, айнан аргентиналик ҳужумчи савиясига яқинлашишга уринишини;

В). Ҳозирча ҳаётини «Интер»сиз тасаввур этолмаслиги ва жонажон клуби асосий таркибидан мустаҳкам жой олиб, унинг чин юлдузига айланишни орзу қилишини.