Янги йил совғаси - «Бетис»дан ажойиб акция. Жорий мавсум Испания Примеросида ишлари унча юришмаётган жамоа 2019 йил тақвимидан ўрин олган охирги ўйинида болаларни Рождество билан антиқа тарзда қутлади. Мухлислар учрашув танаффусида майдонга ўйинчоқларни ёғдиришди. Бу режалаштирилган акция. Ҳар ҳолда, «Бетис» раҳбарияти фанатларни майдонга ёмшоқ ўйинчоқлар улоқтириш бобида ўтган йили қайд этилган рекордни янгилашга чақирганди.
Муҳими, акция кутилган натижани берди. Табиийки, иккинчи бўлим бошланишига қадар майдонга отилган барча ўйинчоқлар йиғиштириб олинди. Улар кам таъминланган оилалар фарзандларига Рождество совғаси сифатида юборилади. 2018 йил якунида «Бетис» раҳбарияти «Эйбар»га қарши ўйин (1:1)да худди шундай ишга қўл уриб, қанчадан-қанча болалар қалбини шодликка тўлдирганди. Бу сафарги «ўйинчоқлар ёмғири» «Атлетико» билан баҳсга тўғри келди. Ҳа, «Бетис» 2019 йил ҳисобидан охирги ўйинни «матрасчилар»га 1:2 ҳисобида бой берди, шунга қарамай, стадионга йиғилган 50 мингдан кўп мухлис чинакамига яйради. Ўзингиз ўйланг, улкан стадионга ҳар томондан ўйинчоқлар учиб тушса, қандай ажиб манзара юзага келади.
Дарвоқе, майдонга ўйинчоқ улоқтиришни истаган мухлислар бир неча талабларга риоя қилишлари шарт:
1. Ўйинчоқ юмшоқ бўлиши керак. Яъни майдонга тушганида, синмаслиги ёки кимгадир тегиб, уни жароҳатламаслиги лозим;
2. Ўйинчоқ ичида ҳеч қандай батарея (қувват манбаи) бўлмаслиги керак;
3. Ўйинчоқ 35 сантиметрдан узун ва 300 граммдан оғир бўлмаслиги керак.
Асосийси, ҳамма ушбу асосий шартларга тўлиқ амал қилди. Энг диққатга сазовор жиҳати, «Бетис» акциясига меҳмон жамоа - «Атлетико» мухлислари ҳам қўшилишди. Шу тариқа танаффус чоғи икки рақиб тарафкашлари бирлашишди. Ўйинчоқларни териб олишда ҳам кўпчилик фаол иштирок этди, улар бир неча катта қопларга солинди. Демакки, фанатлар клуб илгари сурган акцияни чин кўнгилдан қўллаб-қувватлашди.
Айтганча...
Сентябрь ойида Голландиянинг «Фейеноорд» клуби ҳам шунга ўхшаш хайрия акциясини уюштирганди. Фарқи шуки, роттердамликлар стадионга маҳаллий болалар уйидан қалби ўксикларни таклиф этишган ва фанатлар уларни махсус олиб келинган ўйинчоқлар билан сийлашган эди.
МБАППЕ ҲАМ БОЛАЛАРНИ ҚУВОНТИРДИ
Франция чемпионати олий дивизионининг 2019 йил ҳисобидан охирги турида Лига 1 карвонбошиси «ПСЖ» ўз майдонида «Амьен» билан ўйнади. Парижликлар ёш ҳужумчиси Килиан Мбаппе 21 декабрь куни бўлиб ўтган учрашувда янги имидж - оқсоч кўринишида ҳаракатланди. Аслида бу бир марталик ҳавас эмас, балки анъанадир. Зеро, Килиан 20 декабрь куни туғилган айёмини нишонлайди ва шунинг шарафига ҳар сафар сочини оқ рангга бўяйди. У 3 йилдан буён шундай қилмоқда. «ПСЖ» йиллар оралиғидаги танаффусга хотиржам ҳолда йўл олди. Парижликлар ҳозирда энг яқин таъқибчи - «Марсел»дан 7 очко кўп жамғаришган, қолаверса, захираларида 1та ўйин ҳам бор. Мбаппе эса 11та гол билан тўпурарлар пойгасида биргина Виссам Бен-Йеддер (13та гол)дан орқада бормоқда. Лекин шуниси борки, Килиан «Монако» вакилидан 4та кам ўйин ўтказган. Охирги учрашувга қайтсак, Мбаппе ўз жамоаси голларидан ярмига муаллифлик қилди - «дубль». Якунда «ПСЖ» 4:1 ҳисобида ғалаба қозонди. Асосийси, Килиан ўйин давомида ўз ёнига дастхат сўраб, югуриб борган ёш фанат илтимосини рад этмади. Эътиборлиси, футболчи имзо чекиб бўлгач, болакайни қучиб қўйди ва у ҳаяжондан йиғлаб юборди. Учрашувдан кейин эса франциялик иқтидор Санта-Клаус қиёфасига кириб, бошқа болаларга ҳам қувонч улашди. «ПСЖ» раҳбарияти учрашувга шароити оғир оилалардан 250 нафар болани таклиф этганди. Улар «Амьен»га қарши ўйинни VIP-ложада кузатишди. Хуллас, болалар учрашувдан сўнг Мбаппе - Санта-Клаусдан совғалар қабул қилиб олишди. «Бу - болалар учун унутилмас оқшом. Қолаверса, ҳам клуб, ҳам жамғармамиз учун муҳим воқеликдир», - деди PSG Foundation хайрия маркази бошлиғи Сабрина Деланна.
У.УМАРОВ таёрлади.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20