Декабрь ойида Озарбайжоннинг «Кешля» клуби билан шартнома имзолаган Шоҳруҳ Гадоев куни кеча янги жамоаси машғулотларида иштирок эта бошлади. Azerisport.com сайти вакиллари эса шу фурсатдан фойдаланиб, ҳамюртимиздан интервью олишди.

— Озарбайжон чемпионатига ўтишингиз қандай юз берди?

— Ушбу мамлакат жамоаларини уларнинг еврокубоклардаги иштироки орқали биламан. Айниқса, «Қорабоғ»­нинг ўйинлари ёдда қолди. «Кешля»нинг «Қорабоғ»га қарши сўнгги учрашуви (2:2)ни стадиондан томоша қилдим. Менга футбол савияси ва янги жамоамнинг ўйини ёқди.

— Демак, ўз жамоангиз ҳақида кўп нарса биласиз...

— Бу клуб яхши таассурот қолдирди. Айниқса, «Қорабоғ» каби жамоага қарши учрашувда. Умид қиламанки, «Кешля»га ёрдамим тегади ва биз келаси мавсум Европа Лигасида иштирок этамиз.

— Ўзбекистон ва Озарбайжон чемпионатлари ҳақида нима дея оласиз?

— Битта ўйиндан кейин хулоса чиқариш қийин. Аввал «Кешля» сафида бир нечта учрашувларда майдонга тушай, кейин сизга қайси чемпионат кучли эканини айтишим мумкин.

— Озарбайжонда ўз олдингизга қандай вазифаларни қўясиз?

— Олдиндан катта гапирмоқчимасман. Фаолиятимни бошласам, уёғини кўраверамиз.

Манба: www.azerisport.com