Газетамизнинг аввалги сонида «Пахтакор»нинг сербиялик футболчиси Драган Чераннинг mozzartsport нашрига берган интервьюсининг дастлабки қисмини эътиборингизга ҳавола этгандик. Қуйида мазкур суҳбатнинг давоми билан танишишингиз мумкин.

 - Ўзбекистондаги ОАВда тарқалган хабарларга кўра, улар сизга фуқароликни таклиф қилиб, шу тариқа миллий жамоада тўп суришингизни хоҳлашган экан. Шу ростми?

- Ҳа, бу таклиф ҳамон ўз кучини йўқотмаган. Бироқ ФИФАнинг қоидаси бунга тўсқинлик қилади - қайсидир мамлакат термасида ўйнашни хоҳласангиз, у ерда камида 5 йил яшаган бўлишингиз керак. Менга паспортни эртагаёқ тақдим этишлари мумкин, аммо ФИФА тартиби - ҳақиқий муаммо. Ўзбекистонда 3,5 йилдан буён фаолият юритяпман. Миллий жамоанинг аввалги устози Эктор Купер мени термада кўрмоқчилигини билдирганди. Янги мураббий ҳам шу фикрда. Лекин ўзбек паспортини олганимда 34 ёшда бўламан, шу ёшда термага фойдам тегса, бу билан фахрланаман.

- Аммо сиз Ўзбекистондаги энг машҳур серб эмассиз. Ахир у ерда Любинко Друлович ҳам бор...

- Любе айни пайт олимпия термасини бошқаряпти, жамоа Токио Олимпиадаси йўлланмаси учун курашяпти. Друлович билан тез-тез кўришиб турамиз. У яхши инсон ва маҳоратли мутахассис, уни Ўзбекистонда ҳам қадрлашади. Олимпиада йўлланмаси улар учун жуда муҳим.

- «Пахтакор»даги мақсадларингиз қандай?

- 10 февралдан Чемпионлар Лигасидаги иштирокни бошлаймиз. Гуруҳимизда бизга амалдаги чемпион «Ал-Ҳилол», Дубайнинг «Ал-Аҳли» клуби ва саралашдан чиққан жамоа рақиблик қилади. Асосий мақсад - гуруҳ босқичини муваффақиятли ўтказиш. Ўтган йили 93-дақиқада «Ал-Аҳли»дан гол ўтказиб юбориб, «плей-офф»га чиқолмагандик. Жорий мавсум гуруҳдан чиқишни ният қилганмиз.

- У ерда яна қанча қолмоқчисиз?

- Билмайман. Ҳозирча кетиш ниятим йўқ. Ҳали чарчамадим. Ўзим ёқтирган иш билан шуғулланяпман, мамлакатнинг энг яхши клубида ўйнаяпман, тузуккина шартномага эгаман, оилам ёнимда, ҳеч нимани ўтказиб юбормаяпман... Одамлар мени ҳурмат қилишади, қадрлашади. Ўзгаришдан нима наф? Мақсадим аниқ - олдинда яна икки йиллик шартномам бор.

- Бошқа клублардан ҳам таклифлар бўлганмиди?

- «Персеполис» мени кузатганидан хабарим бор. Улар менга компенсация тариқасида бир миллион беришларини айтишди, у ерда ўзимни синаб кўришга тайёрланаётгандим, чунки бу Эроннинг энг катта клуби. Аммо менинг Исроилда ўйнаганимни билишгач, ҳаммаси тугади. Исроилда яшаганлар Эронда иш топишдан умидини узса бўлаверади.

- Ўзбекистонда тўп суриш орқали бошқа сербларга ҳам эшик очдингиз. Қайсидир маҳаллий жамоа сербиялик футболчини таклиф қилмоқчи бўлса, сиздан ҳам маслаҳат олишадими?

- Албатта. Улар алоқага чиқишади, клипларини жўнатишади, мен эса қўлимдан келганча ёрдам бераман. Фақат таклиф билдираман, аммо муайян бир футболчининг сотиб олинишини ҳал қилмайман. Шу тариқа Славко Лукичга ёрдам берганман. Иттифоқо, мен билган мураббий ўнг қанот ҳимоячиси кераклигини айтганда, унга дарҳол Лукичнинг видеосини жўнатгандим. Мураббий мени ҳурмат қиларди, фикрим билан қизиқарди, Славко ҳам ишончни оқлади, мақтовларим бекор эмаслигини майдондаги ҳаракатлари билан исботлади. Биз Ўзбекистонда ўзимизни бегонадек ҳис қилмаймиз.

- Энг яхши ўзбекистонлик футболчиларни ажратиб кўрсата оласизми? Жамоадаги энг кучли шеригингиз ким?

- Айни пайт бу Жалолиддин Машарипов. Хоҳ ишонинг, хоҳ ишонманг, у мавсум давомида 37та самарали узатмани амалга оширди. У жамоа натижасини белгилайдиган футболчилардан бири. Ҳар икки қанотда хотиржам тўп суради, техникаси юқори, футболни жуда севади. Тўп билан ажойиб финтларни амалга оширади, рақибларини қийнайди. Яқинда Хави унга қўнғироқ қилиб, Машариповни «Ал-Садд»да кутаётганини билдирди. Бу жуда муҳим нарса.

- Нима деб ўйлайсиз, улар «Звезда» ёки «Партизан»га қарши қандай ўйнашлари мумкин?

- Ишончим комилки, «Пахтакор» «Звезда»ни ҳам, «Партизан»ни ҳам мағлубиятга учрата олади.

- Ушбу клубларимиз иштирокини, умуман, серб футболини кузатиб борасизми?

- Албатта. Барча серблар кафеда тўпланиб, ўзимизникиларга мухлислик қиламиз. Маҳаллий ишқибозлар ҳам сафимизга қўшилиб, биргаликда қўллаб-қувватлашади. «Звезда» ва «Партизан» бизнинг клублар ва табиийки, уларга мухлислик қиламан. Тақдир тақозоси билан мамлакатимизни тарк этишимизга тўғри келди, лекин ўзимизда нималар рўй бераётганини кузатамиз. Қайси жамоага ишқибозлик қилишимиздан қатъий назар, клубларимизни севамиз, руҳлантирамиз, уларнинг ғалабаларини интиқлик билан кутамиз.