Футбол чархпалаги яна бир айланди ва бу сафар ҳам вакилларимизни ҳар 4 йилликнинг катта турнири йўлланмасидан маҳрум қилганча ортда қолдириб кетди. Ҳа, афсус, яна четда қолиб кетдик. Бармоқ тишлаганча ҳайрону лол қолавердик. Йўқ, бу туш эмас! Ярим финалда ҳам, 3-ўрин учун баҳсда ҳам рақибларга ютқазганимиз аниқ. Яна ютқаздик! Яна 4 йил кутиш, сабр қилиш керак энди футболимизни Олимпиадада кўриш учун... Эсласангиз, анча аввалроқ битта катта саволга жавоб излагандик: ўзи нимага ишониб, жаҳон чемпионати ва Олимпиада йўлланмасига кўз тикаверамиз? Қачонки, шунга муносиб бўлмагунча, балки бу масалани кун тартибидан четга суриб қўйган маъқулдир?! Футболдаги муваффақиятсизликлар сабаб минг-минглаб мухлисларнинг руҳияти издан чиқиб кетаётгани ҳақида ким ўйлайди? Фикримизча, йўлланма - ҲОЛВА. Ҳолва деган билан эса оғиз чучимайди. Йўлланмага ҳарчанд интилмайлик, тиришмайлик, биров уни қўлимизга тутқазиб қўймайди. «Шу мамлакат мухлис аҳли куйиб кул бўлди, кел, энди бир сийлайлик», демайди ҳеч ким ҳеч қачон. Куйиб-қовурилиб, ўз ёғимизда ўзимиз жизғанак бўлиб юраверамиз. Кимга керак бундайин самарасиз куйиб-ёниш ва ундан нима наф?!
Тўғриси, йўлланма масаласида сал эҳтиёткор муносабат шакллантириш лозимга ўхшайди. Ахир Ўзбекистон улкан ислоҳотлар жараёнига кириб бормоқда ва бунда соғлом руҳият, собит хушкайфиятнинг аҳамияти катта. Ўтдан олиниб, сувга солинаверганидан адо бўлган асаб тизими қандай ижобий натижа бериши мумкин?! Шунча мухлисни «Футбол кўрмайсан!» қабилида йўлдан қайтариб бўлмаса?! Европа, Хитой, Япония, Жанубий Корея учун футбол - ЎЙИН! Шу, холос. Ютқазилса ҳам, пинак бузмайди у томонларда футбол аҳли. Бизда-чи?! О! Муҳим учрашувлар арафасида ҳаёт тўхтайди, гўёки. Эркак зоти борки, телевизор қаршисига михланади. Мағлубиятдан кейин эса ижтимоий тармоқларда «портлаш» бошланади. Жўяли мулоҳазалар пойинтар-сойинтар сўкинишлар уммонига ғарқ бўлади, киноя-истеҳзолар авжга чиқади. Кимга фойда, нима наф бундан?! Шунча вақтдан буён бирор ўзгариш кузатилдими?! Натижа, ўзгариш йўқ-ку! Мутасаддилар, мураббийлар, футболчилар алмашаверади, тешик тоғора ўша-ўша. Атроф тўла лағмон осилган қулоқлар. Аянчли ва кулгули бу ҳолат...
«Бўри билан қўзичоқ» масалининг бошланиш мисрасини кўпчилик яхши билади: «Ёғочнинг бўшини қурт ейди доим». Футболимиз бўш, жуда-жуда бўш. Ҳатто бўм-бўш! Бу бўм-бўшлик ичра недир йўлланмани хаёл қилиш, юмшоқроқ айтганда, ғирт бемаъниликдир.
Лондон-2012 йўлида Кенжа Тўраев, Иван Нагаев, Фозил Мусаев, Салим Мустафоев, Абдуқаҳҳор Ҳожиакбаров каби футболчиларга ишондик. Қани улар? Нимани дўндиришди? Рио-2016 йўлланмасини бой берган авлод Саудия Арабистони бош жамоасини сафарда енгишга қодирми? Очиғини айтайликми? Кўзимиз етмайди бунга! Рақиб жарима майдонида оёғига тўп қулай келиб қолса, эсанкираганидан ҳушини йўқотадиган футболчидан ғалаба кутиш инсофдан-ми? Э йўқ, келинг, ноўрин хаёлга бормайлик, ҳозирдан ўзимизни қийнамайлик. Владимир Маминов, Олег Пашинин, Миржалол Қосимов, Олег ва Максим Шацкихлар, Сервер Жепаров, Александр Гейнрих, Темур Кападзе каби юлдузлар уддаламаган ишни энди кимларга вазифа сифатида юклаяпмиз?! Қаранг, Бобур Абдухолиқов, Санжар Қодирқулов, Жасур Яхшибоевдан Олимпиада йўлланмасини кутдик-а?! Демак, аввало, айб ўзимизда! Анча-мунча мақолларимиз бор-а шундай ҳолатларни ифодалайдиган. Энди эс-ҳушимизни йиғайлик ва футболимиз юзидаги зулмат пардасини биргаликда олиб ташлайлик. Рўзимбой Аҳмедов, Қувондиқ Рўзиев, Жалолиддин Машарипов ижтимоий тармоқлар орқали айтган аччиқ ҳақиқатлар яна баралла янграмаса, футболимиз ўзгармайди, тош қотганча тураверади безрайиб. Манфаат исканжасидаги футболнинг юраги туйғудан мосуво ва кўз ёшлар устидан мириқиб кулади. «Ҳаҳ, соддалар-а, қўзичоқлар-а, сенларга ачинамизку, афсус, қорнимиз оч-да...», дейилади ул икки оёқли «бўрилар».
Дарвоқе, Таиланд турнири гуруҳ босқичи якунланиши арафасида бир суҳбатга беихтиёр гувоҳ бўлиб, юрагимиз музлаганди. Оқшом чоғи таксининг олд ўриндиғида ишдан қайтар эканмиз, орқадаги йўловчи ҳайдовчига тушунтирди: «Кеча эшитдим, гуруҳдан чиқсак ҳам, Олимпиада бормаймиз! Пул тикканлар шунақа дейишди!» Ўша лаҳзада ер юзига яшин тушди, гўё. Наҳотки, шу рост бўлса ва биз шунчаки, алданмоқдамиз. Журналистлар орасида Шерлок Холмс борми???
Назаримизда, 2020 йил «Илм-маърифат ва рақамли иқтисодиётни ривожлантириш йили», деб номланишида ҳам футболимизга дахлдор бир ҳикмат яширингандек. Охир-оқибат, футболимизни илм-маърифат қутқаради, чоғи. Зеро, Президент мурожаатномаси ва «Ўзбекистонда жисмоний тарбия ва спортни янада такомиллаштириш ва оммалаштириш чора-тадбирлари тўғрисида»ги Президент фармонида биз назарда тутган ҳамда намоён бўлиши кутилаётган ҳақиқатларнинг барча-барчаси мужассам.
Муҳаммад ВАЛИ, "ИнтерФУТБОЛ" нашри
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20