Вақтида ЖЧдек турнирда ёрқин таассурот қолдирган туркиялик Ҳоқон Шукур бугун такси ҳайдовчиси сифатида кун кўрмоқда. Умуман олганда, турли касб этагини тутган собиқ футболчилар жуда кўп. Бу сафарги фотожамланма (манба - soccer.ru сайти) айнан профессионал спортдан кейин одатий юмушлар билан шуғулланишга қарор қилган машҳур футболчилар ҳақида.
Ҳоқон Шукур - таксичи. УЕФА кубоги соҳиби, ЖЧ совриндори ва Туркия миллий жамоаси тарихидаги энг яхши тўпурар ҳозирда Вашингтонда китоб сотяпти, Uber такси хизмати ҳайдовчиси сифатида ишламоқда. Ҳоқон бунга қадар Сан-Франциско ва Истанбулда қаҳвахона очишга уринди, бироқ бизнесда «куйиб» қолди. Тўғрироғи, унга Туркияда сиёсий айблов (давлат тўнтаришига боғлиқ) қўйилди, мол-мулки мусодара қилинди.
Ли Бойер - фермер. Майдонда муросасизлиги ва ўта қўпол тўп суриши билан ажралиб турган Ли Бойер («Лидс», «Вест Хэм» ва «Ньюкасл»нинг собиқ ярим ҳимоячиси) 2015 йили Франциянинг Шампань ҳудудидан кўл сотиб олди. У айни пайт балиқчилик билан шуғулланмоқда. Умуман олганда, Ли азалдан балиқ овини хуш кўрарди.
Сократес - врач. Бразилиялик бўйдор ўйинчи юқори интеллекти туфайли профессионал фаолиятида «Доктор» лақабини олганди. Қолаверса, Сократес Сан-Паулу университети дипломига эга эди. Хуллас, Бразилия миллий жамоасининг афсонавий футболчиси бутсасини михга илгач, врач сифатида ишлади. Аниқроғи, педиатр мақомида болаларни даволаш билан шуғулланишдан ташқари, ТВ ва газеталарда нафақат спорт, балки сиёсат ва иқтисодиёт масалаларида ҳам доимий чиқиш қиларди. 6 нафар фарзанднинг отаси 2011 йили 57 ёшида ҳаётдан кўз юмди.
Том Финни - сантехник. «Престон Норд Энд» клуби ва Англия миллий жамоасининг афсонавий ҳужумчиси отаси раъйига қарши бормай, «оддий» касб танлади. Гап инглизлар бош жамоаси сафидаги 76та ўйинда 30та гол урган футболчи ҳақида кетмоқда. Умуман олганда, ўтган асрнинг 40-йиллари фақат футбол ортидан оила тебратиш қийин бўлган. Хуллас, Том спортдаги фаолиятига параллель равишда сув кранларини таъмирлаш орқали қўшимча пул топарди ва шунга яраша «Престонлик сантехник» лақабини олган. Дарвоқе, Финни 1998 йили Британия империяси орденига лойиқ кўрилган.
Гуннар Нордаль - экскурсия йўлбошчиси. Швеция миллий жамоасининг 33та ўйинида 43та гол (!) урган «А» сериянинг 5 карра энг яхши тўпурари футболчилик фаолиятидан кейин сайёҳларга гид ролида хизмат кўрсатган. Голлар сони бўйича «Милан» рекордчиси ва Олимпиада чемпиони қарилик чоғигача сайёҳлик фирмасида ишлаган. Тўғри, Нордаль аввалига мураббийлик соҳасига бош суқишга уринган, аммо омадсизликка учраганди.
Арьян де Зеув - полициячи. «Уиган» ва «Портсмут» клубларида ном қозонган марказий ҳимоячи футбол билан хайрлашгач, Нидерландияга қайтиб, полиция академиясида таҳсил олди. Йўқ, де Зеув йўл полициячиси эмас, балки терговчи бўлди. Дарвоқе, у аслида шифокорликка ўқишни ният қилганди, аммо сўнгги паллада ҳуқуқ-тартибот органида ишлашни маъқул кўрди.
Кахабер Каладзе - сиёсатчи. «Милан»да ёрқин из қолдирган ҳимоячи -Тбилиси мэри ва маҳаллий партиялардан бирининг раиси. Балки Каладзе келажакда Грузия президенти бўлишга ҳам уриниб кўрар ҳали...
Йохан Кройфф - ТВ эксперти. Тўғриси, телевидение ёки газеталарда футбол таҳлилчиси сифатида ишлаган-ишлаётган соҳа юлдузлари жуда кўп. Бу собиқ ўйинчилар учун энг осон юмуш-да...
Ежи Дудек - пойгачи. Футболдан кейин спорт оламида қолганлар ҳам етарли. Хусусан, польшалик дарвозабондан ташқари, Фабьен Бартез ва Сантьяго Канисарес ҳам ўзларини пойгага уришди. Қаранг, фақат голкиперлар...
Гаиска Мендьета - хонанда. «Валенсия» афсонаси тунги клубда қўшиқ куйлайди, лекин пул етишмаслиги учун эмас, албатта. Шунингдек, Кристиан Вьери ва Руслан Нигматуллин ҳам ди-жей мақомида кўриниш беришган.
Роналдо - покер устаси. Бразилиялик буюк «сўйлоқ» покерда ҳам маълум ютуқларга эришгандир. Лекин у бу ўйин билан шунчаки, ҳавас учун шуғулланган бўлса керак, худди Томас Гравесен ва Томас Бролин каби.
Дарвоқе...
Мирослав Клозе профессионал фаолиятига қадар қурувчи сифатида тер тўккан, АПЛдаги дебютини 30 ёшида нишонлаган Рики Ламберт вақтида бозорда сабзавотлар сотиш билан шуғулланган, хорватиялик Дадо Пршо эса автомеханикка шогирд тушган. Яна Жейми Вардининг ҳам сотувчиликдан хабари бор.
Олдин футбол сердаромад йўналиш саналмаган. Дейлик, «Ливерпул»нинг афсонавий футболчиси ва мураббийи, яна иккинчи жаҳон уруши қатнашчиси Боб Пэйсли бўлажак турмуш ўртоғи Жесси билан ғалабадан кейин танишади. Футболчи маҳбубаси қўлини сўраш учун унинг ота-онаси ёнига борганида, қизиқ ҳолат юзага келади. Яъни Жессининг отаси бўлажак куёви олдига дангал савол қўяди: «Футболчи эканлигинг яхши, хўш, асосий касбинг нима?» Боб шунда ғишт териш қўлидан келишини айтади. «Буниси ажойиб мутахассислик. Очликдан ўлмайсизлар», - дейди қизнинг отаси ва тўйга розилик беради. Алессандро Дель Пьеронинг онаси эса ўғлини айнан «жиддий иш» топишга ундайди ва у ҳисобчи дипломини олади. Гордон Рэмзи эса машҳур ресторанда бош ошпаз сифатида ишлаган.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20