Узоқ музокара жараёнидан кейин ниҳоят, «МЮ» билан шартнома тузган португалиялик Бруну Фернандеш янги жамоасида дебют қилишга ҳам улгурди. 25 ёшли футболчи «қизил иблислар» аъзоси сифатида берган илк интервьюсида «Олд Траффорд»га ташрифи сабаби, танловида ҳамюрти Криштиану Роналдунинг таъсири ва кейинги режалари хусусида тўхталди.

- Бруну, Манчестерга хуш келибсан! Шундай жамоа таркибидан жой олиш қандай таассурот уйғотди?

- Жуда ажойиб! Айнан «МЮ» сафига қўшилганимдан бағоят бахтиёрман. Бу клуб аъзоси бўлиш - улкан шараф. Айтиш мумкинки, энг катта орзуларимдан бири амалга ошди.

- Кўринишидан ҳамиша АПЛда ўйнашни истагансан?

- Ҳа, шунга интилганман. Мана, орзумдаги клуб - «МЮ» таркибида тўп суриш имкониятига эга бўлдим.

- Ҳозир 25 ёшдасан. Ўзингдек навқирон жамоада муваффақиятга эришишни қандай тасаввур қиляпсан?

- Номдор клуб билан шартнома тузиш менга ўзгача илҳом бағишлади, ҳозир кўтаринки кайфиятдаман. Мақсадим - барчага ёрдам бериш ва тажрибали жамоадошларимдан сабоқ олиш.

- Оле-Гуннар Сульшер билан илк учрашувинг ҳақида нима дея оласан?

- Танишув кўнгилдагидек ўтди. У жамоада ўзига хос мавқега эга. Шундай мутахассис билан ҳамкорлик қилишимдан мамнунман.

- «МЮ» мухлислари ҳам сени улкан орзу-умидлар билан кутиб олишди ва юксак савияда тўп суришингдан умидворлар.

- Албатта, улар билан учрашувни сабрсизлик билан кутяпман. Майдонда бор иқтидоримни намойиш этишни хоҳлайман.

- Мухлислар орасида ўйин услубингдан бехабарлари ҳам бор. Уларга қандай маълумот бера оласан? Айрим мутахассислар сени Руи Коштага қиёслашаётган экан...

- Кошта билан ўртамизда улкан тафовут бор. Унинг самарали фаолияти ҳавас уйғотиши турган гап. Табиийки, янада самаралироқ ўйнашни хоҳлайман. Тушунаман, бу осон эмас. Мақсадим - кун сайин камолотга яқинлашиш. Хуллас, мухлисларни чиройли ўйин билан қувонтирсам, бас.

- Мана, олдинга улкан қадам ташладинг. Оила аъзоларинг бунга қандай муносабатдалар?

- Улар ҳам жуда мамнунлар. Чунки орзум рўёбга чиққанидан хабардорлар. Албатта, энди уларни янада қувонтиришим керак.

- Болалигингда инглиз футболини томоша қилармидинг? Ўша даврдан қандай хотиралар қолган?

- Жуда кўп ўйинларни кўрганман. Зеро, Португалияда Англия чемпионати баҳслари трансляция қилинарди. Тушунарлики, «МЮ» иштирокидаги ўйинларни ўзгача иштиёқ билан кузатардим. Чунки Криштиану Роналду шу клуб сафида тўп сурарди. У жуда зўр футболчи, мен учун - даҳо. Кришнинг даражасига етиш - чинакам орзу.

- Криштиануга оид савол: унинг «МЮ»га трансфери ва ҳайратомуз ўйини нечоғли ёдингда?

- Албатта, ҳаммасини яхши эслайман. Криштиану «Спортинг» ва «МЮ» ўртасидаги ўртоқлик учрашувида одатдагидек ажойиб тўп суриб, ҳамманинг олқишига сазовор бўлганди. Энди мен ҳам буюк жамоа тарихидан муносиб жой олмоқчиман, лекин йўлим Роналдуникидан фарқланади. Ахир у дунёнинг 1-рақамли футболчиси, 15 йилдан буён чўққидан тушмай, тўп сурмоқда. Бундай барқарорлик ҳамманинг ҳам қўлидан келавермайди.

- Криштиану билан «Юнайтед» ҳақида гаплашдингми?

- Ҳа, «МЮ»га ўтиш вариантини бирга муҳокама қилдик. У фақат ижобий фикр билдирди. Яна ўз орзуларини амалга оширишни айнан «МЮ»да бошлаганини алоҳида таъкидлади. Ўйлайманки, Роналду шу клубни танлаганимдан мамнун. Шунингдек, у Оле-Гуннар мен ҳақимда жуда илиқ фикрлар билдирганини айтди. Биз Португалия терма жамоасида ёнма-ён тўп сурамиз. Демак, Криш мени яхши билади. Ўз навбатида, уни чинакам инсон сифатида ҳурмат қиламан ва изидан боришни истайман.

- Сўнгги йилларда «Спортинг»да собиқ «қизил иблис» Нани билан бирга тўп сурдинг. Ушбу ҳамкорлик кутилган самара бердими? 

- Албатта. Умуман олганда, фаолиятим давомида АПЛ ва бошқа етакчи чемпионатларда муваффақиятга эришган кўплаб ўйинчилар ёнида ўйнаб, улардан етарлича сабоқ олдим. Нани - шундай футболчилардан бири. У «Спортинг»га қайтгач, сардор сифатида барчамизни олға ундади. Хуллас, Нанидан айрим муҳим жиҳатларни ўргандим. Дарвоқе, трансферим тасдиқлангач, у биринчилардан бўлиб, табрик йўллади.

- Терма жамоадаги шеригинг Бернарду Сильва ҳам Манчестерда. У билан боғландингми?

- Ҳа, чоршанба куни SMS-хабар йўллаб, унга қарши тўп суришга улгурмаганим омади келганидан нишона эканлиги хусусида ёзибди. Мен эса аксинча, ҳазил тариқасида менга дуч келмагани учун бамайлихотир юргани, тез орада адабини бериб қўйишимни маълум қилдим.

- Нима деб ўйлайсан, АПЛ, Португалия Примероси ва «А» серия ўртасида қандай яққол фарқли томонлари бор?

- Португалияда ҳаммаси ўйинчилар иқтидорига боғлиқ. Ўйинчилар ривожланиш йўлида академияларда қаттиқ ишлашлари шарт. Айнан ўзини кўрсатган футболчи хорижнинг номдор жамоаларига йўл олади. Португалияда ҳар бир истиқболли ўйинчидан шундай улкан қадам ташлашни кутишади. Италияга келсак, шахсан мен у ерда кўп нарсаларни ўзлаштирдим. «А» серияда мураббийлар асосий эътиборни тактикага қаратишади. Ўйлашимча, Италия элит дивизионида малака оширган футболчи ҳар қандай чемпионатда бемалол ўйнаб кетади.

- 2017 йили Италиядан Португалияга қайтдинг ва «Спортинг» билан аввал забт этилмаган чўққиларга кўтарилдинг, 2 мавсум ичида маҳсулдорлигинг сезиларли даражада ошди. Хўш, айнан ниманинг эвазига қитъанинг энг яхши ярим ҳимоячилари сафига қўшилдинг?

- «Спортинг» - катта жамоа ва талаб ҳам шунга яраша жуда юқори. Футболчи ўзини кўрсатишни истаса, 100 фоиз эмас, балки ундан ҳам кўпроқ куч сарфлаши керак. Тўғри, юксак савияли жамоадошлар кўмагида юксак натижаларга эришиш осонроқ. Лекин астойдил тер тўкиб ишламасанг, ҳеч нарсага эришолмайсан. Менимча, «Спортинг»даги давр мен учун рисоладагидек ўтди. Мураббийлар, футболчилар ёрдамида шундай мақомга эришдим.

- Айтчи, ассистентлик худди гол ургандек завқ улашадими?

- Шахсан мен ҳар гол уриш ва самарали узатма беришга бир хил қарайман. Менимча, бу ўринли ёндашув. Ҳа, гол жамоани ғалабага яқинлаштиради. Гол аввало, унинг муаллифига завқ бағишлайди, ғалаба эса бутун жамоага кўтаринки кайфият улашади. Албатта, ҳар қандай футболчи гол уриш асносида танилишни истайди. Лекин гол ортида бутун жамоа меҳнати борлигини унутмаслик керак. Бас, шундай экан, ассистентлик ва тўпурарликни тенг баҳолайман. Агар шу икки вазифани ёки бирини уддасидан чиқсам, бахтиёрликни туяман, албатта. Қайтараман, энг асосийси гол, самарали узатма ёки «сэйв» эмас, балки жамоавий натижадир.

- «Олд Траффорд» майдонига илк бора қадам босиш ва ажойиб мухлислар қаршисида тўп суриш онлари қандай ҳиссиётларни бериши мумкин?

- «Олд Траффорд» трибуналари остида, минглаб мухлислар гувоҳлигида тўп суриш - эзгу орзу! Шундай имкониятга эга эканлигимдан бахтиёрман.

- Жамоада 18-рақамни танладинг. Қизиқ, бунинг қандай ўзига хос аҳамияти бор?

- Аввало, бу рақам ўзимга ёқади. Охирги 3 йилда 8-рақам остида тўп сурдим. Бинобарин, отам вақтида айни шу рақамли либосда ўйнаган. Қолаверса, «8» - туғилган санам. «18» эса рафиқамнинг таваллуд куни. Шунингдек, мен учун қадрли саналган Пол Скоулзнинг рақами ҳам. Албатта, шунча сабаб менга улкан масъулият юклайди.

- Исмингнинг тўғри талаффузи қандай - Бруно, Бруну, Фернандеш?

- Талаффуз муҳим эмас. Гол урсам ёки ассистентлик қилсам, исмим стадионда янграса, бас. Менга кўпинча Бруну, деб мурожаат этишади. Яна иккинчи бирикмадан ҳам фойдаланишлари мумкин - Фернандеш. Тўғри, португал тилидан хабари йўқ кишилар исмимни тўғри айтишга қийналишади. Дейлик, Италияда ҳеч ким тўғри талаффуз қилолмасди. Шундай экан, оддийроқ бирикма - «Бруну»ни қўллашлари тўғрироқ, менимча.

- Шу ҳафтада майдонга тушиш-тушмаслигинг ҳақида аниқ маълумот бўлмасада (Оле-Гуннар Сульшер матбуот анжуманида Брунуни таркибга қўшишини айтди ва шундай қилди), Португалия футболи таъсирида анча кучайган «Вулверхемп­тон»га қарши ўйнаш ўзинг учун қизиқарли, албатта. Ҳар ҳолда, болаликдаги кумирларингдан бири -Жоау Моутинью билан учрашишинг мумкин...

- Тўғри, у мен кузатиб юрадиган футболчиларнинг бири. Жоау услубини ёқтираман. Болалигимда у Португалиядаги энг сара ўйинчилар қаторида эди. Болалар учун кимдандир ўрнак олиш, у каби тўп суришга интилиш жуда муҳим. Моутинью, Роналду ва Нани каби юлдузлар фазилатларини ўзлаштира олсанг, етук футболчига айланишинг аниқ.

- Шахсан сен учун ўйиндаги энг муҳим жиҳат қайси?

- Зафар қучиш. Ҳамиша ғалаба қозонишни истайман, шунинг илинжида яшайман. Истагим - ҳар бир ўйинда ғалаба нашидасини суриш.

- Ниҳоят, «МЮ» мухлисларига нима дейишни истайсан?

- Шуни таъкидлашим керак, бу ерга жамоага самарали ёрдам бериш ниятида келдим. Кўплаб ғалабаларни биргаликда байрам қилишдан умидворман.

Бруну Фернандеш «МЮ» билан 5,5 ярим йиллик шартнома тузди. Шарт­лашувга мувофиқ, томонлар келишувни автоматик тарзда яна 1 йилга узайтиришлари мумкин. Аввалроқ португалиялик футболчининг йилига 6 миллион евро миқдорида маош олиши айтилганди. «Юнайтед» Бруну трансферига 55 миллион евро тўлайди. Бу суммага 25 миллион евро миқдорида бонус тўлови қўшилиши мумкин. «Брунуни бир неча ой кузатдик. Унинг ўйини илиқ таассурот қолдирди. Фернандеш ажойиб характерга эга ажойиб йигит. Ўйлайманки, у мавсумнинг қолган қисмида ўйинимизни кучайтиришга қодир», - деди «МЮ» бош мураббийи Оле-Гуннар Сульшер клуб расмий сайтига берган интервьюсида.