Яқинда АПЛда ноодатий юбилей нишонланди. Лига тарихида биринчи марта! Аниқроқ айтсак, 18 январь куни (шанба) бўлиб ўтган «Арсенал» - «Шеффилд Юнайтед» ўйини (1:1)дан олдин «Эмирейтс» стадионида бош ҳакам сифатида тайинланган Майк Дин алоҳида шарафланди. Чунончи, 51 ёшли рефери шу куни Англия чемпионатида 500-ўйинни бошқариб борди. У бош ҳакам ролида дебют учрашувини салкам 20 йил олдин (2000 йилнинг сентябрида) ўтказганди. Диннинг бу борадаги энг яқин таъқибчиси Мартин Аткинсон ҳали анча орқада. Яъни унинг ҳисобидаги ўйинлар сони 400тага ҳам етгани йўқ (398та).
Чин профессионал, аммо...
«Арсенал» - «Шеффилд Юнайтед» учрашуви бошланишидан олдин Майк Динга ўз рекорди хусусида савол йўллашгач, у оддий жавоб берди: «Албатта, 500та ўйин довони мен учун улкан воқелик ҳисобланади. Бироқ ҳозир бу ҳақда ўйлашга вақт йўқ. Зеро, аввало, бўлажак баҳсни сифатли бошқариб боришим керак. Бор эътиборим шунга қаратилган». Чинакам профессионалга хос ёндашув. Лекин Англияда ҳамма ҳам Динни ҳақиқий профессионал ўрнига кўрмайди. Чунки у ўзига хос характерга эга ҳакам ва ҳамиша диққат марказида бўлишни ёқтиради. Гап фақат унинг хатти-ҳаракатларию, қарорлари эмас, балки юриш-туриши ва мимика (юз ифодаси)сида ҳам. Майк осонгина минг хил қиёфага кира олиш қобилиятига эга.
«Арсенал» учун
душман, гўё...
Дин — ижтимоий тармоқлар юлдузи. Унинг иштирокидаги энг шов-шувли лавҳа 2015 йили «Тоттенхэм» ва «Астон Вилла» учрашувида кузатилган эди. Ўшанда «шпорлар» ярим ҳимоячиси Мусса Дембеле ўйин бошидаёқ ҳисобни очган, Дин эса тўп дарвоза чизиғини кесиб ўтишидан олдинроқ қўлларини марказ томон бурган ва беихтиёр бельгиялик томон югурганди, гўёки, уни табриклаш учун. Бу ҳакамнинг «Тоттенхэм» голидан «қувонган» ягона ҳолати эмас. Майк яна «Лондон дербиси»да «шпорлар» «Арсенал» дарвозасини ишғол қилишганида ҳам, хурсанд бўлганини сездириб қўйган ва шу билан «канонирлар» мухлислари нафратига учраганди.
2017 йилнинг декабрида эса Арсен Венгер «Арсенал»нинг «Вест Бромвич» билан учрашуви якунига етгач, Дин ишини «шармандалик» сифатида баҳолаган ва оқибатда 40 минг фунт миқдорида жарима тўлаган, қолаверса, 3та ўйинга дисквалификация қилинганди. Ҳа, бу рефери ва Лондоннинг «қизил-оқ» қисми ўртасидаги муносабатлар дарҳақиқат, жуда ёмон. Тақдир тақозосига кўра, Диннинг юбилей кўрсаткичи ва уни шарафлаш маросими айнан «Эмирейтс»даги ўйинга тўғри келганига нима дейсиз? Тўғри, Майкни нафрат қўзғатувчи шахс сифатида қабул қилишга ўрганган бу арена ўша куни унинг ҳурматини жойига қўйди.
Агуэро билан ҳазил
Умуман олганда, Динни ҳар бир клуб билан қандайдир ноодатий воқелик боғлаб туради. Мисол учун, «Вест Хэм» стадионида ҳар сафар унинг шарафига ҳавога совун кўпиги учириш одат тусига кирган. Бироқ Диннинг ўзи бу анъанани унча хушламайди... Шунга қарамай, Дин «Вест Хэм» мадҳиясини мароқ билан тинглайди. У ҳаттоки, яқинда жамоанинг «Арсенал»га қарши учрашувини трибунада томоша қилди ва мадҳияни қисман мухлислар билан бирга куйлади. Диннинг қандай инсон эканлигини кўрсатиб берган яна бир машҳур вазият 2 йилча олдин «Манчестер Сити» ва «Челси» ўртасидаги баҳс (6:0)да кузатилди. Ўша учрашувда «хет-трик» қайд этган Серхио Агуэро тўпни эсдалик сифатида олиб қолишни истади. Бироқ Дин уни орқасига (либоси ичига) яшириб, аргентиналикка мулойимгина сўз қотди: «Йўқ, тўп менда эмас». Агуэро эса ҳакамнинг орқасидаги юмалоқ нарсага ишора қилгач, барча футболчилар роса кулишганди.
ҲаҚиҚий фанат
Дин яна жуда эътиборли, эҳтироси эса ғайритабиий. Тўғри, у майдонда шу эҳтиросини яширишни уддалайди. Айтишларича, ҳакам фақат севимли клуби - «Транмер Роверс» иштирокидаги ўйинларда эҳтиросларига борича эрк бериши мумкин. У камтарин жамоанинг учрашувларини кўпинча стадионда кузатишга ҳаракат қилади ва унинг голлари ёки ғалабасини камерага қараб нишонлашгача боради. Ҳаттоки, ўриндиқ устига чиқиб, қандайдир хатти-ҳаракатларни кўрсатиши ҳам мумкин. Ўтган мавсум «Транмер» тўртинчи дивизиондан учинчисига сакраш имконини берувчи «плей-офф» босқичида иштирок этиш ҳуқуқини қўлга киритди. Табиийки, Дин буни назардан қочирмай, «Ньюпорт»га қарши кечган финал ўйинини «Уэмбли»да бевосита томоша қилди. «Транмер» ҳужумчиси Женнингс ўйиннинг 119-дақиқасида ғалаба голини ургач, Дин ақлини мутлақо йўқотди, гўё. Трансляцияда Диннинг қандай ҳолатга тушганини кўрганлар шунчаки, оғиз очиб қўйган бўлсалар, ажабмас
100тадан кўп «Қизил»
Дин ҳеч қачон топ-реферилар қаторига қўшилмаган. Мисол учун, АПЛдек турнирда 500та ўйин маррасига етган ҳакам на жаҳон ва на Европа чемпионатида ишлаган. У ҳаттоки, Европа Чемпионлар Лигаси учун ҳам бегона. Лекин Англиянинг ўзида Майк энг таниқли ҳакамлардан бири, агар энг таниқлиси бўлмаса. Диннинг тан олиб айтишича, унинг учун энг муҳим ўйин - бу Англия чемпионати-2011|2012 охирги туридан ўрин олган «Манчестер Сити» - «КПР» тўқнашуви. Эсингизда бўлса, ўша баҳсда «шаҳарликлар» Серхио Агуэро томонидан қўшиб берилган вақтда урилган гол эвазига 3:2 ҳисобида ғалаба қозониб, биринчи чемпионликни нишонлашган эди.
Майк Дин пенальти белгилаш ва футболчиларни майдондан четлаштиришни жуда хуш кўради. Дейлик, ўтган мавсум АПЛда 100 марта қизил карточка кўрсатган биринчи ҳакам бўлди. Дарвоқе, Дин «имзо»сидаги юбилей «қизил» Эшли Янг («МЮ»)га насиб этди.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20