Бундеслига шунчалик бадавлат чемпионат бўлиб қолдими? Ахир 13-ўринда бораётган жамоаси ҳам бир мавсумда 111 миллион сарфлаяпти-ку?! Чиндан ҳам «Герта»нинг харажатлари кўпчиликни ҳайрон қолдиряпти. Жамоа атрофида аслида қандай воқеалар рўй бераётгани ҳақида қуйидаги мақоладан атрофлича маълумот бериши мумкин.
Tennor Holding компанияси 49,9 фоиз акцияга эга бўлди. Клубдагилар мунтазам равишда Чемпионлар Лигаси ўринлари, кейинчалик каттароқ совринлар ва Европадаги катта обрў учун курашиш ниятидалар. Хўш, «Герта» аввал қандай эди-ю, қай тариқа ҳозирги ҳолатга келди?
20 йил олдин мухлислар қувончи ичларига сиғмасди. «Герта» еврокубокларда барқарор қатнашар, бир сафар ҳатто Чемпионлар Лигасида «Челси», «Милан» ва «Барселона» каби жамоаларга қарши ўйнаганди. Бу ҳолат узоқ чўзилмади, аммо рақибларини қийнагани ҳам рост, ички чемпионатда эса кучли олтиликдан пастга тушмасди.
2010 йилдан кейинги давр мутлақо бошқача кечди. Европа Лигасидаги атиги икки мавсум - ҳар иккиси жуда қониқарсиз ўтди, икки марта Бундеслигани тарк этган жамоа сўнгги ўн йиллик охирларида кўпчиликнинг қизиқишини йўқотган ўртамиёнага айланди-қолди. Мавсум-2018|2019да «Герта» жуда зерикарли тарзда финишга 11-ўринда етиб борди. Янги мураббий (Анте Чович авваллари олий даражада ишламаганди) ҳамроҳлигида бошланган мавсумнинг дастлабки ўйинларида ғалати хатолар серияси кузатилди.
Қайсидир паллада «Герта» вазиятни ўнглагандек туюлганди, аммо кузда қаторасига бешта ўйинда имкониятни бой берди. Айниқса, элитада «жон» сақлаш учун курашаётган «Аугсбург»га 0:4 ҳисобида ютқазгани Човичнинг истеъфога чиқарилиши билан якунланди. Кўнгилсизликлар давом этди: бир ҳужум пайтида дарвозабонинг ҳам гол ўтказиб юбориб, ҳам майдондан четлатилганини охирги марта қачон кўргандингиз?
Бўш қолган мураббийлик курсисини Юрген Клинсманн эгаллади ва «Герта» ушбу мутахассис бошчилигида 7 ўйинда 11 очко жамғарди (масалан, «Байер»ни енгди, етакчилардан бири - «Боруссия» Менхенгладбах билан дуранг ўйнади). Берлинликлар бироз ўзларига келиб олишди - эндиликда аутсайдерлар поғонасидан уларни 7 очко ажратиб турарди, бироқ еврокубоклар ҳудуди анча узоқда, барқарорликдан эса дарак йўқ.
Ёзда немис футболидаги йирик келишувлардан бири амалга оширилгач, мухлислар кутишга рози бўлишди. Клубнинг 49,9 фоиз акцияси Ларс Виндхорстга тегишли Tennor Holding компанияси ихтиёрига ўтди (дастлаб 37,5 фоиз эди, қолганини ноябрда сотиб олди). Ушбу функционер мактабдаги ўқувчилик даврида компьютерлар йиғиш билан шуғулланган, 17 ёшида эса Германиядаги IT маҳсулотлар савдосига ихтисослашган фирмага асос солганди.
Кейинчалик бизнеси ривожланиб кетди, Давосда ўтказилган иқтисодий форумда қатнашди, Германиянинг собиқ канцлери Кельмут Коль билан ҳамкорлик қилди, бугунги кунга келиб, молиявий ҳолатини 3 миллиард еврога етказди. Виндхорст ҳар доим ҳам омадли бизнесмен бўлмаган. 2003 йили инқирозга учраб, кейинчалик яна бойиб кетди, кўп ўтмай қамоққа тушишига бир баҳя қолди. Ларс шунақа, қийин вазиятда тушкунликка тушмай, обрўсини қайта тиклаш устаси.
У футболни ёқтирадими?
Асло йўқ. Виндхорст Spiegel нашрига берган интервьюсида ростини айтди: футболга ҳеч қачон мухлислик қилмаган, бу харид эса шунчаки бизнес, пул ишлаб олиш манбаи, зеро футбол клубларининг иқтисодий ривожи мамлакатнинг иқтисодий ўсишини 8 баробарга ортда қолдиради. Виндхорст «Герта»ни «ПСЖ» билан таққослади - жамоаси реклама, уй учрашувларидаги егуликлар ва ичимликлар савдосидан 50 миллион евро топса, парижликларда бу кўрсаткич 200 миллионга тенг. Ишбилармоннинг фикрича, бу ерда ўсиш учун жиддий салоҳият мавжуд.
Хуллас, Берлин клубини сотиб олишдан кўзланган мақсад - маблағ орттириш, аммо Виндхорст даромадга эга бўлишдан аввал жиддий харажатлар қилиш кераклигини жуда яхши тушунади. Бизнесмен бунга тайёр ва ишонадики, жуда катта потенциал фойдага эга бўлади.
«Герта»нинг аҳволи билан юқорида атрофлича танишдик. Ёзда жамоа Лукебакиони сотиб олиш орқали таркибни кучайтирди. Ушбу футболчи 18 ўйинда «гол}пас» тизими бўйича 5}4 кўрсаткич қайд этди, рақиблар дарвозасини жуда чиройли тарзда ишғол қиляпти.
Қишки трансферлар дарчасида эса «Герта» 4 футболчи хариди учун 78 миллион евро сарфлади. Аргентиналик таянч ярим ҳимоячиси Аскасибар, «Лейпциг»нинг ёш форварди Кунья, «Милан»дан олиб келинган 27 миллионлик Пентекдан ташқари, ёзда келадиган Тузар учун «Лион»га 25 млн. евро тўланди. Бир-икки йил аввал «қандайдир» 8 миллион эвазига Дэви Зелькени сотиб олиб, ўз рекордини қайд этган клуб учун бу жуда катта натижа.
Бу мавсум жамоанинг қайси ўринни эгаллаши муҳим эмас, ҳаммаси кейингисига қолдирилиши турган гап - унда «Герта» қониқарли натижага эришиши, албатта, еврокубокларга йўл олиши лозим бўлади. Бунда янги мураббий (Юрген Клинсманн директорлар кенгашидан ўрин олади) ёрдам беради, шунингдек, клуб янги стадион қуришни режалаштирмоқда, чунки Берлиндаги «Олимпиаштадион» жуда катта, замонавийликдан йироқ ва «Герта»га тегишли эмас.
Яхши, пуллар манбаини топишибди. Лекин нега энди лойиҳани амалга оширишда айнан «Герта» танланди?
Биринчидан, мазкур ҳолатда йирик трансферларни кузатиш ҳар доим ёқимли - футболчилар қайси принциплар асосида ўтишяпти, умуман, ўша принцип борми ва қайси харидлар якунда ўзини оқлайди?.. Иккинчидан, пули бор клубга машҳур мураббийлар келишади - қайси мутахассис таклиф этилиши ҳам жуда қизиқ (айтишларича, ёзда «Герта» бошқарувини Нико Ковач ўз қўлига олади).
Учинчидан, «Лейпциг» бир неча мавсумдан буён «Бавария»нинг жаҳлини чиқаряпти, бу қаторга Менхен-гладбах «Боруссия»си ҳам қўшилиб, турнир жадвалида бамайлихотир пешқадамлик қилди. Қисқаси, Бундеслигадаги интрига янада ошди - қувонарли маълумот. Даъвогарлар рўйхатига «Герта» ҳам қўшилса, ҳамма учун фойдали бўлади.
Ниҳоят, тўртинчи омил. Клуб хўжайини уни фақат молиявий манфаат қизиқтираётганини яширмади. Даромадни эса фақат муваффақиятли клублар келтириши мумкин. Стратегия ва унинг ижроси қанчалик оқилона йўлга қўйилади - Германия футболи учун янги ва жуда ажойиб жумбоқ.
Ў.УМАРОВ тайёрлади
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20