Англия чемпионатида ўйнаётган футболчилар маоши ҳақидаги янги маълумотлар ошкор қилинди. «Маош халтаси»га қараб, қандай хулосалар чиқариш мумкин? Қаранг, Месут Озил («Арсенал») ва Поль Погба («МЮ») ҳамон энг катта маошга эга 5 нафар футболчи қаторида. Оҳ, уларга қандай мазза-я... Айтиш жоиз, АПЛдаги маош тўловини ўз ичига олган янги маълумотлар АҚШнинг Spotrac сайти томонидан эълон қилинди. Ушбу портал 2007 йилдан буён профессионал спортчиларнинг шахсий шартномасини ўрганиш билан шуғулланмоқда. Тўғри, америкаликлар асосан АҚШ лигалари - MLB, NBA, NFL, NHL ва MLSга эътибор қаратишади. Мана, Spotrac энди АПЛ бўйича ҳам «тафтиш» олиб борди. Championat.com сайти эса дарҳол маълумотларга қараб, 10та асосий фактни ажратиб кўрсатди.
1-факт: футболчининг фойдали ҳаракатлари ва маоши ўртасида боғлиқлик қидириш ярамайди. Ҳа, айрим футболчиларнинг маоши ошириб юборилгандек кўринади. Ҳар ҳолда, сумма унинг эгасининг жамоа муваффақиятларига қўшаётган ҳиссасига мувофиқ эмас. Бу борада биринчи навбатда, Поль Погба ва Месут Озилни ажратиб кўрсатиш мумкин. Улар ҳамон маош рейтингининг кучли 5талигида туришибди. Ваҳоланки, «МЮ» вакилининг боши жароҳатлардан чиқмаяпти, «Арсенал» ярим ҳимоячиси эса ҳаттоки, соғлом бўлган пайти ҳам камдан-кам ҳолда асосий таркибдан жой оляпти. Яна Антони Мартиалнинг «Ливерпуль» етакчиларидан бири Муҳаммад Салоҳдан кўпроқ маош олаётгани эътиборга молик.
2-факт: дарвозабон 1-ўринда - аномалия (кутилмаган фавқулодда ҳолат). Энг ажабланарли томони, АПЛда энг катта маош голкиперга тегишли. Шунинг баробарида ҳужумчилар хизматининг юқорироқ баҳоланиши хусусидаги тенденция сақланиб турибди. Қисқаси, агар АПЛ тарихида энг кўп маош эвазига ўйнаган (ёки ўйнаётган) 10 нафар футболчини олсак (жумладан, Алексис Санчес ҳам бор), биргина Давид де Хеадан ташқари барча ўйинчилар олдинги чизиқ вакилларидир. Дарвозабоннинг аномал маоши эса, испанияликнинг икки марта «МЮ» билан эркин агент мақомида хайрлашишга яқин келгани билан боғлиқ. Яъни манчестерликлар уни олиб қолиш учун маошини кескин оширишдан ўзга чора тополмаганлар. Акс ҳолда, клуб янги дарвозабон трансферига янада кўпроқ ажратишга мажбур бўларди. Шунинг учунми, «МЮ» Давид де Хеага белгиланган иш ҳақини «осмон» қадар кўтарган. Испаниялик эса 2015 йили («Реал»га трансфери амалга ошмаганидан сўнг) ва 2019 йили яхшиланган шартнома остига бамайлихотир имзо чекди.
3-факт: Трент-Александер Арнольд «Ливерпул»да атиги 20-ўринда. 2019 йилнинг бош кашфиётларидан бири ҳаттоки, ўз клубида ҳам 19 нафар футболчидан камроқ маош олса-я... Ваҳоланки, Трент-Александер Арнольд аллақачон «Ливерпуль» асосий таркибининг алмаштирилмас вакилига айланиб улгурди. «Қизиллар» ҳар бир ўйинда ўнг қанот орқали эффектли ҳужумлар ташкил этишяптики, бунда англиялик ҳимоячининг хизмати катта. Дейлик, Трент-Александер жорий мавсумда «Ливерпул»нинг бош узатмачиси (26та турда 10та самарали «пас») бўлиб турибди. Бутун АПЛ миқёсида эса, у биргина Кевин де Брюйнедан орқада, холос. Яна бир салмоқли факт - айнан Арнольд ижросидаги бурчак зарбаси туфайли «Барселона» ЧЛ-2018|2019дан тушиб кетганди. Бироқ шундай муҳим футболчи клубнинг маош варақасида атиги 20-ўринда, унинг йиллик иш ҳақи 2,47 млн. еврога тенг...
4-факт: Роман Абрамович иқтисод тартибига ўтди. Эълон қилинган маълумотлар анчадан буён айтилаётган гапларни тасдиқлади. Роман Абрамович Англияда муайян чекловларга юз тутгач (у ҳаттоки, ўз жамоаси ўйинларига ҳам ташриф буюролмаяпти), «Челси»да чиндан ҳам, иқтисод тартибини жорий қилган. Буни ёш таркиб ва ёш мураббийга таянилаётганидан ҳам сезиш мумкин. Энди асосий фактга эътибор қаратинг: АПЛда энг кўп маош олаётган 15 нафар футболчи орасида «Челси»дан бирор вакил йўқ. Лондон клубида энг кўп маош эгаси бўлиб турган дарвозабон Кепа Аррисабалага умумий рўйхатнинг 19-қаторида...
5-факт: Алексис Санчес АПЛ тарихида энг кўп маош олган (олаётган) футболчиларнинг кучли учлигида. Ҳа, айни пайт АПЛда тўп сураётганлар футболчилар орасида Алексис Санчес йўқ, бироқ «МЮ» ижара келишуви асосида «Интер»да ўйнаётган чилилик ҳужумчининг маошидан маълум қисмини тўлашда давом этмоқда. Санчес ва Англия клуби ўртасидаги шартнома 2022 йилнинг ёзидагина ўз кучини йўқотади. Чилилик унга кўра, йилига 19,37 млн. евро миқдорида маош олади. Бу сумма маош рейтингининг 2-ўрнида бораётган Кевин де Брюйне иш ҳақидан озгина кам, холос.
6-факт: Жеймс Мэдисон «Лестер» маош варақасида 10-футболчи. «Тулкилар» жорий мавсум кутилганидан анча яхши иштирок этишмоқда, Жеймс Мэдисон эса жамоа етакчиларидан бири ролида гавдаланмоқда. У чиндан ҳам, АПЛнинг янги юлдузи мақомига бош даъвогар. Қизиғи, Мэдисон «Лестер»да 9 нафар футболчидан кам ва 2 нафар клубдоши билан тенг миқдорда маош олмоқда. Айни пайт футболчига «МЮ» даъвогарлик қилаётганини назарда тутсак, бу катта аҳамиятга молик факт ҳисобланади.
7-факт: Жон Флекнинг маоши 492 минг еврога тенг. Шубҳа йўқ - чемпионат дебютанти «Шеффилд Юнайтед» АПЛга ўзгача шукуҳ олиб кирди. Transfermarkt портали маълумотлари бўйича айтсак, жамоа лигада энг арзон таркибга эга. Шунга қарамай, шеффилдликлар ҳаттоки, ЕЧЛ йўлланмасига умид боғлашмоқда. «Шеффилд Юнайтед» етакчиси Жон Флек эса йилига 0,5 млн. евродан камроқ маош олади. Таққослаш учун айтсак, Россия премьер-лигасидаги ҳаттоки, ўртамиёна клублар ҳам етакчи футболчига бундан икки-уч баравар кўп ҳақ тўлайди, топ-жамоалар ҳақида эса гапириш шарт эмас...
8-факт: кўринишидан, «Олтин тўп» маошга таъсир қилади. Мавсумни фантастик тарзда ўтказаётган «Ливерпул»да дейлик, «Барселона» (Лионель Месси) ёки «Бавария» (Роберт Левандовски)даги каби яққол ажралиб турган ягона етакчи йўқ. АПЛда энг катта маошга эга 15 нафар футболчи орасида эса «қизиллар»дан уч киши бор. Жумладан, «Олтин тўп»га даъвогарлик қилишган Виржиль ван Дейк ва Муҳаммад Салоҳ. Кўринишидан, таркиби баланслашган жамоада бу фактор ҳам маош миқдорига таъсир қилади.
9-факт: «МЮ» - маош тўлаш бобида етакчи. Deloitte таҳлил гуруҳининг охирги тадқиқоти натижаларига кўра, «МЮ» ҳамон Англиянинг энг сердаромад клуби бўлиб турибди. Манчестерликлар шунинг баробарида маош тўлаш бобида ҳам етакчиликни қўлдан чиқаришмаяпти. Мисол учун, АПЛда энг кўп маош олаётган 20 нафар футболчи орасида «МЮ»дан 7 киши бор: Давид де Хеа, Алексис Санчес, Антони Мартиаль, Поль Погба, Маркус Рэшфорд, Гарри Магуайр ва Хуан Мата.
10-факт: Кристиан Бентеке «Тоттенхэм» етакчиларидан бири Деле Аллига нисбатан кўпроқ маош олади. Ниҳоят, охиргиси - «Кристал Пэлас»даги суръати ва самараси анча паст ҳужумчи Кристиан Бентекега белгиланган йиллик маош (7,38 млн. евро) «Тоттенхэм»нинг анча тезкор ва самаралироқ вакили Деле Алли (6,15 млн. евро)никига қараганда, бир миллион 230 минг евро кўпроқ...
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20