AS нашри таклифига кўра, Colossal Sports Management агентлигининг икки вакили ҳамроҳлигида Lowry меҳмонхонасида жойлашган офисга ташриф буюрган «Манчестер Сити» етакчиларидан бири Раҳим Стерлинг испаниялик касбдошларимизга махсус интервью берди. Англиялик ярим ҳимоячи|ҳужумчи жароҳат туфайли сафдан чиқишига қадар «шаҳарликлар» сафидаги энг сермаҳсул футболчи бўлиб турганди - 20та гол, 6та самарали узатма. Эътиборли томони, Раҳим мулоқотга киришишидан аввал клуб мутасаддилари журналистларга УЕФАнинг «Сити»га нисбатан қўллаган жазо чораси (ЧЛда қатнашмаслик) хусусида савол бермаслик талабини қўйишди. Шу тариқа суҳбатдошлар асосан Хосеп Гвардиола жамоасининг «Реал»га қарши кечадиган учрашуви (ЧЛ 1|8 финали) ҳақида гаплашишди.
- «Манчестер Сити»нинг ЧЛ-2019|2020 «плей-офф» босқичи дастлабки раундида «Реал»га қарши ўйнашидан қаерда ва қандай хабар топдингиз? Умуман, қуръа натижасини қандай қабул қилдингиз? Жамоадошларингизчи?
- Ўша куни клуб базасида машғулотимиз бор эди. Қуръа ташлаш маросимини барчамиз бирга жонли тарзда томоша қилдик. Ўзи одатимиз шундай - ҳар сафар қайси жамоага дуч келишимизни бирга кузатамиз. «Реал Мадрид» билан куч синашишимиз - бу оддий ҳолат, менимча. Биласизми, номдор рақиб муаммо эмас. Нуфузли мусобақада орттирган тажрибамизга таяниб, шундай гапиряпман. Ахир ўз олдига юксак мақсадларни қўйган жамоа рақиб танламаслиги керак. Қолаверса, кучли жамоаларга қарши тўп суриш қўшимча мотивация бағишлайди. Хуллас, «Реал»дек мега-жамоага қарши майдонга тушиш биз учун айни муддаодир.
- «Реал»нинг ўтган йилги таркиби ҳозиргидек ўта кучли эмасди. Мадрид жамоасининг тараққиёти ҳақида нима дея оласиз?
- Ҳа, «Мадрид» анча кучайди, лекин очиғи, бунинг ортиқча аҳамияти йўқ. Зеро, бу жамоа қандай ҳолатда бўлмасин, унга қарши беллашувлар ҳамиша бирдек оғир кечади. Яна Мадриддаги муҳит, тарихий стадион салобати ҳам ҳар қандай рақибга таъсир кўрсатади, барибир. Тўғри, «Реал» юксак савияда ўйнаётган паллада у билан беллашиш янада қийин бўлиши тайин. Муҳими, агар биз ўз ўйинимизни рисоладагидек намойиш эта олсак, ортга ғалаба билан қайтишимизга ишонаман.
- Зайниддин Зидан «Реал»даги реал тараққиётнинг асосий меъмори бўлиб турибди. Испаниялик мутахассислар уни омад фариштасига қиёслашмоқда ҳатто. Буюк Зизунинг омад манбаи эканлигига ишонасизми?
- ЕЧЛдек нуфузли турнирда бир неча марта, айниқса, қаторасига ғолиб чиқиш жуда мураккаб иш. Демак, Зиданнинг муваффақиятини шунчаки, омадга йўйиш тўғри эмас. Барчаси муайян формулага асосланган фаолият маҳсулидир. Ҳа, айримларда табиий ғолиблик менталитети бўлади. Улар турли усуллар ёрдамида зафарга эришадилар. Менимча, Зиданнинг муваффақияти ҳам омадга боғлиқ эмас, у буюк футболчилик фаолиятини мураббийликка кўчирмоқда. Бунда унга айнан ғолиблик менталитети қўл келмоқда. Қисқаси, Зидан омад манбаи эмас, балки муваффақият калитидир.
- «Шаҳарликлар» сўнгги дақиқаларда кўп гол уришлари билан донг таратишган. «Реал»да ҳам шундай хислат борлигини биласизми?
- Ҳа, хабаримиз бор. Ўйлашимча, бўлажак учрашув биз учун жиддий синов ҳисобланади. Умуман, жорий мавсумни юксак натижа билан якунлашдан умидвормиз. Биласиз, АПЛдаги иштирокимиз унча ўхшамаяпти. Энди бор салоҳиятимизни халқаро аренада намойиш этишимиз шарт. Ўйлашимча, бизни тўхтатишга қодир жамоалар кўп эмас. Олдимизда мураккаб вазифа турганини ҳис этиб турибмиз ва бутун эътиборни уни адо этишга қаратамиз, албатта.
- Тасаввур қилинг, мураббийсиз. Қизиқ, шунда Мадрид клуби таркибидан қайси футболчини ўз жамоангизга жалб этишни хоҳлардингиз?
- Лука Модрични. Англия ва Хорватия терма жамоалари ўртасидаги олишувда унга қарши икки марта майдонга тушганман. Модрич кичик ҳудуддаги ҳаракати билан кўпчилик қатори мени ҳам лол қолдирган. У доимо энг керакли паллада энг керакли нуқтада пайдо бўлади.
- Хўш, унга бошланғич таркибдан жой берармидингиз?
- 100 фоиз кафолат билан.
- Энди айтингчи, ўзингизни «Реал» сафида қандай тасаввур қиласиз, «Қироллик клуби» ўйинига мослаша олармидингиз?
- Қизиқарли савол... Ҳозирча «Сити»даман ва ўзимни ғоят бахтиёр ҳис этяпман. Лекин «Реал»нинг буюк жамоа эканлигини инкор қилмайман. Жамоанинг оппоқ либосига кўзингиз тушиши биланоқ унинг жуда сервиқорлигини англайсиз. Лекин такрор айтаман, ҳали «Сити» измидаман ва жамоага ҳамиша ҳурмат билан ёндашаман.
- Браимидан ташқари, «Мадрид»нинг яна қайси ўйинчисини шахсан танийсиз? Балки «реалчилар» билан ижтимоий тармоқлар орқали боғланиб турарсиз...
- Йўқ, улар билан алоқа ўрнатмаганман. Очиғи, айрим футболчилар билан турли тадбирларда 1-2 марта кўришганмиз. Янглишмасам, Иско ва Марсело билан. Агар Браимининг саҳифасига кўзим тушиб қолса, «Шундай давом эт» ёки «Омад» ибораларини ёзаман, холос.
- Фаолиятингиз охирига қадар «Олтин тўп» ёки йилнинг энг яхши футболчисига аталган совринни ютиш ниятингиз ҳам борми?
- Ўтган мавсумни ўта муваффақиятли ўтказиб, ички мусобақаларда ғолиб чиққанимизга қарамай, ҳаттоки, Англиянинг энг кучли футболчиси мақоми ҳам бизга насиб этгани йўқ. Тўғри, тан оламан, соврин ҳақли равишда бутун мавсум давомида ажойиб тарзда ўйнаган «Ливерпуль» футболчисига берилди. Агар бундан олдинги мавсумларга қарасак, ярим ҳимоячи позициясида тўп сургани ҳолда 20та гол урган Яя Туре ҳам йилнинг энг яхши футболчиси бўлолмаган. Қаранг, 7 йилдан буён жамоамизда кўплаб ҳайратомуз голлари билан яққол ажралиб турган Агуэро ҳам нуфузли совринга лойиқ топилмаган. Ўйлашимча, сўнгги йилларда айрим футболчиларга ўзгача муносабатда бўлишмоқда. Мисол учун, илк бор чемпионликни нишонлаганимизда, де Брюйне тенгсиз ўйин кўрсатганди, аммо соврин бошқа футболчига берилди. Кейинги мавсумларда ҳам яна бир неча марта шоҳсупага кўтарилдик, аммо мукофот бошқа жамоалар вакилларига берилди. Демак, индивидуал соврин ютиш ўзимизга боғлиқ бўлмаган масаладир.
- Бу борада кўп ўйлайсизми?
- Ҳа. Ўзингиз ўйлаб кўринг, жамоа 4-5 марта чемпионликка эришсаю, унинг бирор аъзоси йил лауреатига айланмаса... АПЛда ғолиб чиққан бошқа жамоаларда бу соврин соҳиби топилади, албатта. Мана, кўрасизлар, жорий мавсум якунида «Ливерпуль» шоҳсупага кўтарилади, унинг қайсидир аъзоси эса Англиянинг энг яхши футболчиси сифатида эътироф этилади.
- «Мадрид» хизматингизга қизиқиш билдирган экан, бу борадаги гап-сўзлар ҳанузгача давом этмоқда. Ўзингиз қандай фикрдасиз?
- Бу тез-тез тилга олинадиган мавзу. Факт битта - ҳамон Манчестердаман ва бундан мамнунман. Гарчи АПЛдаги иштирокимиз кўнгилдагидек кечмаётган бўлсада, нолишга асос йўқ. Мана, бунинг эвазига ЧЛда ажойиб имкониятга эгамиз. Хуллас, «Реал»нинг буюклигини эътироф этган ҳолда, «Сити»да бахтиёр эканлигимни таъкидлайман.
- Вақтида ҳар бир киши юксакликка интилиши, башанг кийинган ҳолда, серқуёш гўшада юришга ҳаракат қилиши зарурлигини айтгандингиз. Хўш, қачондир «Реал» либосида майдонга тушишни хоҳлашингиз мумкинми?
- Саволга қандай жавоб қайтарсам экан? Камера суҳбатимизни ёзиб оляптими ёки фақат суратга оляпти? Келажакда нима бўлишини ҳеч ким билмайди. Ҳамма қатори ўйинчиман ва янги синовларга доимо шай тураман. Аммо ҳозир «Манчестер Сити»да бандман. Келажакни фақат вақт кўрсатади.
- «Сити»га нисбатан берилган жазо ҳақида сўрамаслигимиз мумкин эмас, барибир...
- Бу борада деярли ҳеч нарса билмаймиз. Чунки тасдиқланган далиллар йўқ. Клуб олис йўл олдида турибди, бизда эса воқеалар ривожини кутишдан ўзга чора йўқ. Умуман олганда, клубга 100 фоиз ишонаман.
- Англия ва Испания тема жамоалари ўйинида Серхио Рамос билан муаммога дуч келгандингиз. Унинг таъкидлашича, сизга қўполлик ишлатмаган экан. Бу борада гаплашиб, орани очиқ қилганмисизлар?
- Ўйлашимча, тортишув - ўйинда учраб турадиган оддий ҳодиса. Ўша баҳсда иккимиз ҳам ғалабага интилган ва ўз ватанимиз шарафини ҳимоя қилаётгандик. Ўйинда муаммо юзага келган бўлсада, ўзаро ҳурматга путур етмаган. Серхио - ўрнак олишга арзийдиган футболчи. Умуман, ўша учрашувни ҳам яхши кайфиятда якунлаган эдик.
- Англия термаси Евро-2020 турнирига ажойиб таркиб шакллантирмоқда. Нима деб ўйлайсиз, қитъа чемпионатида қатнашиш сизга насиб этармикан?
- Миллий жамоамиз Англия футбол ватани эканлигини исботлаш учун ажойиб имкониятга эга. Таркибда жамланган йигитлар ҳозир юксак савияни намойиш этишмоқда. Аксарият футболчилар ўз клубларида етакчилар қаторидалар. Энг муҳими, улар ҳар қандай топшириқни уддалай оладиган навқирон ёшдалар. Шундай экан, менимча, Англия терма жамоаси учун ўз салоҳиятини катта саҳнада намойиш этадиган вақт келди. Мана, охирги жаҳон чемпионатида чакки кўринмадик. Шундан буён янада ўсдик, айниқса, ҳужум чизиғида иқтидорлар етарли. Энди барчасини амалда намойиш этиш қолди, холос. Бу - нафақат мен, балки бутун ватаним учун эзгу орзу. Шахсан ўзим бўлажак мусобақага бошқа турнирларга нисбатан кўпроқ тайёрман.
- Англия терма жамоасини турнир фаворитлари қаторига қўшсак бўладими?
- Йўқ, жамоамизни фаворит сифатида эътироф этишни хоҳламайман. Умидворманки, рақиблар жамоамизга ортиқча эътибор қаратишмайди ва ўз навбатида, биз сермазмун ўйинимиз билан барчани лол қолдирамиз.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20