«Барселона» янги футболчиси - Мартин Брейтуэйтни расман омма билан таништирди. Даниялик ҳужумчи маросимда финтни ўхшатолмади ва Кевин-Принс Боатенгдан қолган рақамни олди. Буларнинг барчаси бўм-бўш «Камп Ноу»да рўй берди. Айтиш жоиз, каталонияликлар бу трансферга истисно тариқасида рухсат олишди ва «Леганес»га ҳужумчи учун 18 миллион евро (шартномасида кўрсатилган товон пули миқдори) тўлашди.
Сўз
- Кучли томонларим: техника, жисмоний ҳолат ва тезлик. Ақлим жойида ва ҳар куни ўйинимни яхшилаш устида ишлаяпман. «Барса» — менинг орзум. Энди Месси билан бирга ўйнашимдан хурсандман. У мен учун барча замонларнинг энг яхши футболчисидир. Мартин Брейтуэйт («Барселона»нинг янги аъзоси).
** «Барселона» Усмон Дембеле жароҳат туфайли нақ 5 ой муддатга сафдан чиққани ортидан қўшимча трансфер қилишга рухсат олди. Ла Лига регламентида шундай қоида бор (фақат каталонияликларнинг бунинг учун махсус комиссияни кўндиришларига тўғри келди).
** «Леганес» бирор ҳужумчисиз қолди. «Фикримизча, бу адолатсиз қоида. Мана, «Барселона» ундан наф кўрди, «Леганес» эса жабр тортди. Бизга улкан зарар етказилди. Футболчилари жароҳатланган клуб нега энди бир томонлама тартибда бошқа жамоадан ўйинчи сотиб олиб, шу тариқа ўз муаммосини рақибига ўтказиши керак? Шуниси тушунарсиз. Агар бундай трансфер икки клубнинг ўзаро келишувига асосан амалга оширилса-ку, майли, бироқ ҳозирги ҳолат тенглик принципига зид», — дея эътироз билдирди «Леганес» бош директори Мартин Ортега.
** Даниялик ҳужумчининг таништирув маросими бўм-бўш «Камп Ноу»да бўлиб ўтди. Одатда бундай тадбирларга 10 минглаб мухлис йиғилади, бироқ бу сафар... Қолаверса, Мартин жонглёрлик санъати (ТВ учун)ни ҳам ўхшатолмади - тўпни ерга тушириб юборди.
** 28 ёшли Брейтуэйт 2024 йилнинг ёзигача мўлжалланган шартнома остига имзо чекди. Унда қайд этилган товон пули миқдорига қаранг - 300 миллион евро.
** Мартин «Барселона»нинг 19-рақамли футболкасини олди. Ўтган мавсум бу рақам Кевин-Принс Боатенгга берилганди. Ганалик футболчи ярим йил ичида Ла Лигада атиги 240 дақиқа ҳаракатланган ва якунда Италияга қайтган эди.
** Шартнома тузишга бағишланган матбуот анжуманида журналистлар «Барселона» президенти Хосеп Бартомеуга 8та, янги футболчига эса, атиги 2та савол беришди.
Манба: interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20