«Барселона» ёзда «Интер» ҳужумчиси Лаутаро Мартинесни сотиб олиш ниятида. Daily Star хабарига кўра, каталонияликлар футболчига 16 миллион фунтга тенг йиллик маошни ўз ичига олган шартнома таклиф қилмоқчилар. Аввалроқ «Интер» Мартинес эвазига «Барселона»дан айрим футболчиларни олмоқчи эканлиги айтилганди. Аргентиналикка «МЮ» ҳам даъвогар эканлигини унутмаслик керак. Эътиборлиси, «Барса» етакчиси Лионель Месси ҳамюртини ўз жамоасида кўришни хоҳлаяпти. Унинг шартномасида кўрсатилган товон пули - 111 миллион евро. Айрим манбаларда таъкидланишича, «Барселона» Мартинеснинг ўзи билан келишиб олди ва энди «Интер»ни кўндирса, бас.

Айтганча, «Барса» клуби «РБ Лейпциг»нинг бирданига 3 нафар футболчисига кўз тикмоқда. Mundo Deportivo нашрининг маълум қилишича, Каталония клуби рўйхатидан Дайот Упамекано, Анхелиньо ва Тимо Вернер жой олишган. «Барселона» техник котиби ўринбосари Рамон Планес ўтган сешанба куни Германия клубининг Чемпионлар Лигаси доирасида «Тоттенхэм»га қарши кечган баҳсида ушбу футболчилар ҳаракатини бевосита стадионда кузатган. «РБ Лейпциг» Упамекано билан шартномани узайтириш бўйича келишолмаяпти, шу боис ёзда уни сотиш вариантларини кўриб чиқади. Трансфер ҳуқуқи «Манчестер Сити»га тегишли Анхелиньо эса Германия клубида ижара муддатини ўтамоқда. Вернерга келсак, унга «Ливерпуль» ҳам даъвогарлик қилмоқда. Тимонинг шартномасида 60 миллион евро товон пули қайд этилган.