Ҳозирда Туркия биринчилигида тўп сураётган сенагаллик Демба Ба «Ливерпуль» 2014 йили АПЛдаги нақд чемпионликни қандай қўлдан чиқарганини битта «твит» воситасида ажойиб тарзда эсга олди. Ижтимоий тармоқда «433» аккаунти мини-футбол (футзал) жамоалари ўртасидаги ўйиндан лавҳалар берди. Унда ўйинчилардан бири жамоадошидан тўпни қабул қилиб олгач, марказий ҳудуд томон ҳаракатланган ва қўққисдан сирғаниб кетиб, полга қулаган. Натижада рақиб футзалчисида  қарши ҳужум бошлаш учун жуда зўр имконият юзага келган, бироқ у тўпни шунчаки, паркетдан чиқариб юборган. Хуллас, «433» таҳририяти ўз обуначилари олдига савол қўйди: «Бу вазиятда сиз нима қилардингиз?» Қарангки, кутилмаганда, Демба Ба саволга лўнда жавоб ёзди: «Урардим».

Демба Ба йўллаган жавоб - 2014 йили АПЛда чемпионлик тақдирига катта таъсир қилган «Челси» ва «Ливерпуль» ўртасидаги ўйинга соф ишора. Ҳа, «қизиллар» мавсум-2013|2014даёқ хотиржам ҳолда узоқ кутилган чемпионликни нишонлашлари мумкин эди. Бироқ «Челси»га қарши кечган ўйинда кимсан Стивен Жеррард майдонда сирғаниб кетган ва Демба Ба тўпни эгаллаб олганча майдон ярми бўйлаб чиройли юришни амалга ошириб, якунда «Ливерпуль» дарвозасига гол урганди. Ўша ўйин «Челси»нинг 2:0 ҳисобидаги ғалаба билан якунланганди. Шу натижа ортидан олтин медаль учун курашган «Манчестер Сити» турнир жадвалида «Ливерпул»ни атиги 2 очкога ортда қолдирганди.

Айтганча, айни пайт «Глазго Рейнжерс»ни бошқараётган Стивен Жеррард кейинчалик ўша вазиятни фаолиятидаги энг даҳшатли лаҳзалар сифатида тилга олганди: «Бу бутун футболчилик фаолиятимда кузатилган энг ёқимсиз ва қўрқинчли ҳолат бўлса керак. Ахир АПЛда ниҳоят, чемпионликни нишонлашга жуда яқин келгандик, афсуски, мен йўлга қўйган аҳмоқона хато барчасини барбод қилди. Тўғриси, ўша вазиятни тўғрилаш имконияти берилиши учун бор-будимдан айрилишга ҳам тайёрман...».